1 Ari 7 - Ing Mayap a Balita Biblia

Ing Palasyu nang Solomon

¹ Labing atlung banua ing milabas bayu ya meyari ing palasyung pepagawa nang Solomon.

² Pepagawa ne iting tuknangan na at mipamansagan yang Ing Bale king Gubat ning Lebanon. Dinalan limang pulung talampakan ya king kaba, pitu yang pulu't limang talampakan king lualas, at apat apulung talampakan ya king katas. Atin yang atlung hilerang asias a sedro a ating labing limang tanan a sedro balang metung.

³ Megawa ya king dutung a sedro ing bubungan na a makapatung karing apat apulu't limang asias a tia labing lima balang hilera.

⁴ Atlu lang hilera ding awang na at mitulid-tulid la.

⁵ Kuadradu la ring amba ra ding pasbul at awang a mitulid-tulid.

⁶ Pepagawa yang malualas a balkun; pitu yang pulu't limang talampakan king kaba at apat yang pulu't limang talampakan king lualas. Atin yang makabubung a balkun king arap pilatan da ring asias.

⁷ Pepagawa yang sala a mipamansagan Sala ning Hustisia, at karin ne pepabili ing tronung luklukan na neng babie yang kayatulan karing kasung pisasabian. Pepadinan neng tablang sedro ing suelo angga king bubung na.

⁸ Atyu la king gulut ding kuartu king tuknangan na at megawa lang kalupa da ring aliwang gusali. Makanyan ya naman a pangagawa ing bale a pepagawa na para king asawa na, ing anak ning ari ning Ehipto.

⁹ Megawa la ngan deting gusali karing e pangkaraniwan a batung mangaragul a metabas arap at gulut king kapamilatan na ning lagari.

¹⁰ Megawa la ring karelang pundasyun karing batung mangaragul a tia labing aduang talampakan king kaba, at ding aliwa naman labing limang talampakan la king kaba.

¹¹ Babo da reti, batu lang matas a uri a metabas ban milapat-lapat la at trosung sedro.

¹² Makapaligid ya ing malualas a patyu karing atlung hilerang batung tinabas, at makatumpak la babo da reti ding tanan a dutung a sedro. Makanyan ya naman kaayusan ing patyu na ning Templo ning Ginu at ing palasyu.

I Hiram, ing Pande

¹³ Pepayaus ne at peparakit Aring Solomon i Hiram a tau Tiro.

¹⁴ Ya ing anak nang lalaki ning babaing mebalu king tribu nang Neftali. Tau ya Tiro ing meyangu-bie tata na at pande yang tangsu. Biasa ya at magaling i Hiram king pamangawang kagamitan a tangsu. Dinatang ya inyang pepayaus neng Aring Solomon, at ya ing ating pakibatan king sablang megawa king tangsu.

Ding Aduang Maragul a Tangsung Asias

¹⁵ Minoldi na lang tangsu ding aduang maragul a asias. Sukad yang aduang pulu't pitung talampakan king katas ing balang metung kareti at labing walung talampakan ya king makapabilug.

¹⁶ Ginawa ya namang aduang pasapnung tangsu. Sukad yang pitu at kapitnang talampakan king kaba ing balang metung kareti ban ikabit la babo ra ding maragul a asias.

¹⁷ Ginawa ya namang aduang palamuti a balamu tanikala ban pandekorasyun karing asias.

¹⁸ Minoldi na la naman ding aduang hilerang tangsung kaubug bungang pomegranate, at kebit na la reti king babo at lalam da ring pasapnu.

^19-20 Kaubug lang sampagang liryu deting pasapnu at makapatung la karing maragul a asias babo na ning palamuting balamu tanikala; anam yang talampakan king katas ing balang metung. Ating aduang dalan a pomegranate a tangsu king makapaligid lalam da ring balang metung kareting pasapnu.

²¹ Telakad na lang Hiram deting maragul a tangsung asias arapan na ning pidadalanan palub king Templo. Inaus neng Jakin, itang king dane mauli, at Boaz itang king dane norti.

²² Makapatung la ring tangsung makaubug liryung pasapnu babo ra ding asias a maragul. Makanyan meyari ing obra tungkul karing asias a maragul.

Ing Tangsung Kawa

²³ Ginawa yang maragul a tangsung kawa i Hiram. Mabilug ya at maki sukad yang pitu at kapitnang talampakan king lalam, labing lima yang talampakan kalualas, at apat yang pulu't limang talampakan king makapadurut.

²⁴ King labi na niti ating aduang hilerang tela-kalabasang makapadurut; tia pulu at kapitnang talampakan ing makakabit king balang metung keting kawa.

²⁵ Makapatung ya iting kawa king gulut da ring labing aduang tangsung toro: makayarap la ring atlu king dane norti, ding atlu king dane albugan, ding atlu king dane mauli, at ding atlu king dane aslagan.

²⁶ Atlu yang pulgada king kapal ing kawa. Kalupa ne ning labi na ning silyo ing labi na, kaubug yang sampagang liryu. Mikakalaman yang apulung libung galun a danum.

Ding Tangsung Pitutumpakan Pipanuasan

²⁷ Ginawa ya namang apulung tangsung pitutumpakan pipanuasan i Hiram. Anam yang talampakan king kaba at lualas, at apat ya ampon kapitna king katas ning balang metung.

²⁸ Anti la kaniti pangagawa ding pitutumpakan: kuadradu la uling makasukung lang paitas ding karelang suluk.

²⁹ Atin lang medukit a larawan da ring leon, toro, at kerubin. King babo at lalam da ring leon at toro ating tela-tanikalang palamuti a makadukit.

³⁰ Ing balang pitutumpakan atin yang apat a parugang a tangsu at tangsung ehe. Atin lang apat a tangsung tukud karing apat nang suluk ning pitutumpakan panuasan. Atin lang palamuting tela-tanikala deting tukud.

³¹ Atin yang peka mabilug a makapatung babo ning kawa a maka-angat yang labing walung pulgada manibat babo ning pitutumpakan at pitung pulgada lalam na niti. Atin yang disenyung makadukit.

³² Adua lang pulu't limang pulgada king katas ding parugang at atyu la lalam da ring kulung a kuadru. Metung yang dake ing ehe at ing pitutumpakan.

³³ Kalupa ra la pangagawa ding parugang da ring karwahe. Megawa la ngan king tangsu ding ehe, yanta, rayus, at boha.

³⁴ Ating apat a tukud a peka sapnu lalam da ring balang apat a suluk ning pitutumpakan; at metung lang piesa king pitutumpakan.

³⁵ Ating metung a batibat a mabilug babo na ning balang metung karing pitutumpakan. Siam yang pulgada, at ding peka sapnu ra at kuadru metung lang piesa king pitutumpakan.

³⁶ Mipalamutian la ngan ding sapnu at kuadru karing dinukit a larawan da ring kerubin, leon, at tanaman a palma. Deti mipadurutnan lang palamuting tela-tanikala nung atin lang paglugalan.

³⁷ Makanyan la pangagawa ding pitutumpakan king kawa; paraparehu la ngan king sukad at itsura.

³⁸ Ginawa ya namang apulung tangsung pipanuasan i Hiram para karing apulung pitutumpakan. Anam yang talampakan king makapabilug at mikakalaman yang aduang dalan a galun ing balang metung.

³⁹ Binili na la ring lima kareting pitutumpakan king dane mauli na ning Templo, at ding lima naman king dane norti. Binili ne ing kawa king suluk dane mauli at aslagan.

Ding Aliwa pang Kasangkapan a Megawa para king Templo

⁴⁰ Gewa na la namang Hiram ding kalderang pididinan abu, ding pala, at silyo. Ayari na ngan ing sablang pagawa nang Aring Solomon para king Templo ning Ginu,

⁴¹ antimo ding aduang maragul a tangsung asias, ding pasapnu a kaubug sampagang liryu, at ding palamuting tanikala para kareti,

⁴² ding apat a ralan a tangsung kaubug bungang pomegranate para karing aduang pasapnu, adua lang hilera deti a tia dinalan balang hilera,

⁴³ ding apulung pitutumpakan, ding apulung pipanuasan,

⁴⁴ ing kawa, at ding apulung torong sasapu king kawa, ding pidatukanan abu, ding pala, at ding silyo.

⁴⁵ Gewa na la ngan Hiram king makintab a tangsu deting kasangkapan para kang Aring Solomon ban gamitan king Templo na ning Ginu.

⁴⁶ Pepaulma na lang Solomon deti king Kapatagan ning Jordan pilatan ning Sucot at ning Zaretan.

⁴⁷ E na la apatimbang Solomon deting kasangkapan uli na ning tutu lang dakal, inya alang makibalu king bayat da.

⁴⁸ Pepagawa na la ngang Solomon deting kasangkapan a gintu king Templo na ning Ginu: ing altar, ing lamesang pibibilianan king tinape a iyain,

⁴⁹ ding tumpakan-sulu king arap ning Kabanal-banalan a Lugal; makabili la ding lima kareti king dane albugan at ding lima king dane norti, ding sampaga, ding sulu, sipit,

⁵⁰ ding kopa, ding pamatda karing sulu, ding silyo, ding palanggana, ding datukanan para king insenso, ding kawaling pididinan baya, ding bisagra da ring pasbul para king Kabanal-banalan a Lugal, at ding pasbul palual king Templo. Pawa la ngang megawa king gintung puru deting sablang kasangkapan.

⁵¹ Inyang meyari na ing sabla nang pepaobrang Solomon para king Templo ning Ginu pepadala na la ngan karing lugal ning pisisinupan ning Templo ding kasangkapan a telaga nang David a tata na para king Ginu: ing pilak, ing gintu, at ding aliwang pang kasangkapan.