Siob 4 - Paama Bible

Elivas sel kat Siob ven selkututien onen

¹ Evus, Elivas ten out Teman mea ka viteni min Siob vit,

² “?Munak niselus minuk, kivuroh? Veni nasakras emun mato raeng.

³ Keik kovisein meatin keil houlu ka kosan keihoen min koakeil he memerau.

⁴ Navong meatin tai mot vuo aven memerau vuo aven litu, selusien onom katauni, ka kei mulomal eris.

⁵ Ka kosa, vi avong onom komul en mahien, ka keik korvinvintei kovahisu vatali.

⁶ Munak hehi anatin keke keik kuva netan min Ahi ka moulien onom mutolas en meten, hesakin desien onom hel ka demkoen hetovuol enuk.

⁷ Kosa, kindem usili. ?Meatin koa sakien onen mutolas kilea vakur matien koa tisa? !Vuo!

⁸ Inau nales koanik: meatin koa kil atan ten tisaen ka luh utiai keil tasakkalkalien ien, kosa keil akur hei sakkalkalien ka hei tisaen.

⁹ Suval angu tai, Ahi mu lin keil en vurohien onen.