Siob 23 - Paama Bible

Siob vit leini keke romumontei tounah koa tisa vasakini vales mahien onen

¹ Siob vit kesi min keitel vit,

² “Avaseini mitviten sa minau, niles niselus kutut kat Ahi hekeih, nasakras mahuli kat mahisien onak.

³ Hit eli varei mailea out mahotin Ahi ien keke mailea maha en out kei ro ien.

⁴ Vamukonek, mahit lein tounah keil en usite onak mini, ka mahit kilea anatinien ten selusien keil onak mini.

⁵ ?Ek vati mailea asa hehiteni, ka kei hehit kesi minau hemukave?

⁶ ?Mukave, Ahi hesa vasi keihoen onen heha kat nau? Vuo, helong nau navong niselus.

⁷ En meten Ahi, meatin koa mutolas kilea vaselus retavoai vatal mini. Kei hehitehiteni keke inau narmumon etai tounah vatisa keke meatin keil avalong kilea.”