3 Sion 1 - Paama Bible

Hitkileaen onen Sion usil leta koanik

¹ Inau, koa avise nau en Elda, namutis leta koanik. Namutis va min Geas, more tuak eli koa ek vati anatin.

² Onak eli, nakur longlongien keke demkatien onom moul tahosis, ka navis Ahi keke avem ka tounah sav emun en moulien onom hetahos.

³ Inau nasi nau mok navong Kristin oteta keil umai ka avit usil ualien onom minau, mukave keik komusil kat hihiseien ten anatinien en moulien onom.

⁴ Tounah tovuol voumon inau masi nau mok valin navong nalonge keke titak keil en demkatien amul amusil kat anatinien en moulien one.

Sion masmas Geas ven kataunien koa sani min mesav keil

⁵ Onak eli, namasmasuk ven umen tahos koa komumoni min tuer keil koa amul amusil sise one keke amul avitehiten more longlongien usil Iesu. Avaseini koreingeingen keil, keik komaen keil avato vatal minuk avong havivi.

⁶ Envatien koa korie lati min keil, tei en keil avit usili min Kristin keil ten out ekok. Tahos imok kiles kihikiti kikataun keil ka kiling ris keil en sise one en sakien tai koa hesakin Ahi helonge hetahos eni.

⁷ Tahos kikataun keil veni amul amual en umen onen Iesu Kristo ka arkurtei kataunien vaka ven koakeil arkultei anatinien en Ahi.

⁸ Sakini, tahos imok keke ir Kristin keil rehekataun vati meatin keil koa amukonek. Hesakini, rehoum vituai en umen one ten anatinien.

Selkatien usil Diotrefes ka Demetrius

⁹ Mulamu, namutis leta tai va ven meatin keil ten sios onami. Ka Diotrefes koa en vati vahi hetetamen, kei long sesein rek.

¹⁰ Sakini, navong nimai, nihitehiten vasi tounah koa kei mul mumoni: kei mul luvos meatin keil vit komai memul memumon tounah keil tatisaso, ka rovitei anatin. Ka tamun en koanik, kei rokur revitei Kristin keil koa amul amum. !Evus, kei mul ring koe koakeil emun e vati avakur revi keil ka mul sila lat keil ran sios!

¹¹ Onak eli, konousiltei asa koa tisa. Vuo, kusil asas koa tahos. Koakeil sakien one tahos, keil avi onen Ahi; ka koakeil sakien one tisa, arie lati keke areingeingen Ahi.

¹² Ka en usite onen Demetrius, tahos mihekur revi. Meatin vasi keil avati lat isen ka moulien onen musil anatinien ka mul rie lati keke vi meatin hos tai. Ka komai mun meviteni keke vi more meatin tai ka kokilea keke asa meviteni vi anatin.

Selusien ekor

¹³ Nakur kat tounah houlu mahiteni minuk, ka ek rovattei matisi en leta tai.

¹⁴ Ek vati mok masao enuk keke leheleles ialu ka leheselus vituai.

¹⁵ Navisis keke tomat onen Ahi hel hetal minuk. Tumali keil ekok en demkatien amul asan more one minuk. Kihiten more eli mok min tetai en tuer keil koa amul keisom.