Tiyagu 4 - Uhokri Gahegbetawni Nukune akak Sawmus

Umirihwan keh wis ka pasamrak pawtak

¹ Kuri nah akkite yit ku pariye keh hiyeg ka pasamrak pawtak ku pariye keh hiyeg inyekbet pawtak. Ini awaku wis kehkerete ku pariye uhiyekemni tuguh mpinekata wis kehkere Kiyavwiye Uhokri gibetki.

² Wis miyarhaw aharit arikna heneme wis ka utipni. Inneki keh wis umehkere pahavwi. Wis atihpak aharit arikna heneme wis ka hiya awitwak. Inneki keh wis iniyekbet wis ka pasamrak gikak pahavwi. Heneme wis ka uti ku pariye umawkan awaku wis ka ayapni git Kiyavwiye Uhokri. Wis mpiksewne niharit akak ukehbetannenwa.

Umirihwan keh wis ka darihwak gikak Uhokri

³ Nawenetke wis ayapni git Kiyavwiye Uhokri heneme wis ka uti ku pariye wayapni git. Wis ka uti awaku wis ka aya git akakma gidahanma gihiyekemni. Wis aya arikna git henenwa adahan wis kehne ubetkinen nikak.

⁴ Yis ku pariye yihiyekemni hene amun ini yis ikewne kewa pahavu tinobe ku pariye mayte gugihgi adahan eg hamah gikak pahavwiwa akiw ku pariye gugihgi givetunya. Ku pahavwi darihwekne akak inin hawkri abetki, nikwe ka hiya igma darihwak gikak Kiyavwiye Uhokri. Ku ig kaniy adahan ig darihwak akak inin hawkri abetki, nikwe ig humaw Kiyavwiye Uhokri givetunya.

⁵ Uhokri gannasan awna ku ig Kiyavwiye Uhokri Gitip ku pariye ay uvitwiy ig ke wotbe ig atihpak uvatrawiy mmanawa ig muwaka wixwiy misakwa avanenekwa giwaku Kiyavwiye Uhokri. Inakni iwit ka waditnevyenenma.

⁶ Ig Kiyavwiye Uhokri Gitip detye adahan ikene wawaygiy ka aynsima adahan wixwiy ka iha ku pariye uvitwiy gayapni wotwiy. Inneki keh Uhokri gannasan awna: “Kiyavwiye Uhokri suguh neras ku pariye kane kumadukasewkere git. Heneme ig iki gawaygikis neras ku pariye tuwatasewviye gitivut.

Amawka wixwiy tuwatasaw gitivut Uhokri

⁷ Nikwe kumadukasawnabay git Kiyavwiye Uhokrinen. Ka yi muwaka iki iwetrit git wavitye gikivarakis ay abet yihiyekemni. Ku yis ka iki iwetrit git, ayge nikwe ig tivik yiw.

⁸ Waxwanabay yihiyekemni git Kiyavwiye Uhokri. Ayge nikwe ig danukwa yihumwat kennesawa. Yis ku pariye kuwis patahwavye, miniwvinabay ariw yivathawni. Ka ba yi daykis yiwak arit patahwaki akiw. Yis pivutnemnene yihiyekemni, iwinabay pahatwowa yihiyekemni.

⁹ Kayahnabay yivathawni. Kadninabay adahan yivathawni. Tihnabay adahan yivathawni. Miniwvinabay ariw yisamanawni kahadbe yis ivegminene yihiyekemni amin ku samah yis ka kibeynevwima. Wagesnabay yihihiy adahan kadniki.

¹⁰ Tuwatasawnabay gitivut Kiyavwiye Uhokri. Ayge nikwe ig iki yawayginek akak yikiytani.

Amawka wixwiy ka awna paminak

¹¹ Nukebyuvwi, ka yi muwaka awna paminak. Ku pahavwi awna gimin gikebyi, ku pahavwi ikiy gikebyi ku ig ka kibeynema, amun ini nikwe ig awnene amin Uhokri gikumadukan ku in kawnata kibeynema. Mmanawa Uhokri gikumadukan awna: “Ka ba yi awna gimin pahavwi.” Ku wis awna gimin pahavwi, nikwe wis ikewne ku uhiyekemni kabayte ariw inakni gikumadukan. Ku wis ikiy Uhokri gikumadukan ku in ka kibeynema hene, ku wis ka ihpa inakni gikumadukan, nikwe amun ini wis ikewne ke wotbe wis hiyakemniyebe adahan ivegminene gikumadukan ba in kibeynewatma.

¹² Pahavwiwa hiyeg ay ku pariye kawih adahan ig ukumaduketniwiy. Ignewa kawih adahan gihivetnikis hiyeg baki ignes kibeynewatma. Mmanawa ignewa detye adahan gamnihtenkis. Igwata detye adahan givukeptenkis hanpa arimkanit biyukwiki akiw. Ya pis. Pariyenekap pis? Ka ba pis hiyap ku pis ka kis adahan ikiy pahavwi ku ig ka kibeynema?

Amawka wixwiy awna: “Gikak Uhokrinek”

¹³ Ataybiswanabay numkat, yis ku pariye awna: “Ku avim inin usuh tahan avitit ini paytwempu. Ku usuh ka atak ku avim inin, usuh atak takuwanek. Usuh misakwa ayge adahan pahak kamukri. Ayge usuh woka piyuket. Usuh uti ka aynsima karukrinek.”

¹⁴ Ka hiya wixwiyma awna inakni hene, mmanawa wixwiy ka hiyak ku pariye danuhne wotwiy takuwanek. Udehetniwiy ay amadga inin in matkusa, in aynesa ke huwegbe. Kuwewanek in sagehwe madikte.

¹⁵ Kabayte wixwiy ka awna inakni hene. Kabayte wixwiy awna: “Gikak Uhokrinek usuh aynek. Gikak Uhokrinek usuh keh han.”

¹⁶ Ku wixwiy ka awna hene, amun ini nikwe wixwiy kehne uwantiwiy akak ini ukehbetanwiy. In ka kabay wixwiy ikaw hiyakemniye hene.

¹⁷ Hiyapnabay nikwe. Nah kuwis akki yit ku pariye kabay adahan wixwiy keh. Ku wixwiy hiyak ku pariye kabay adahan wixwiy keh, heneme ku wixwiy ka keh hene, nikwe in patahwaki udahanwiy.