Tiyagu 3 - Uhokri Gahegbetawni Nukune akak Sawmus

Kannuhekevutne gitaraksan mbayte ariw gitaraksankis nawenyevwi hiyeg

¹ Nukebyuvwi, ka aynsima yaytak muwaka kannuh hiyeg amin Uhokri gihiyekemni. Hiyapnabay. Nawenetke yis ka ik. Mmanawa usuh ku pariye kannuhekevutnevwi amin Uhokri gihiyekemni, ku usuh taraksa ini gihiyekemni, nikwe usuh mbayte utaraksan ariw gitaraksankis hiyeg ku pariye kane kannuhekevutnevwima.

Amawka wixwiy avuriw wownwiy ba in kibeynewatma

² Hiyapnabay nikwe mmanawa wixwiy madikte taraksenekuye gihiyekemni ka aynsima. Ku pahavwi ka awnati pahatnema iwit ku pariye taraksa Uhokri gihiyekemni, igi yuma gitaraksan aynesnima. Igi kannuh kumaduka givit pahavwite payak akak giwn.

³ Nah kehte abektey. Wis kumaduka pahavwi kaway akak ku samah wis idis pahat sivarisa nopsesa gibiyrikut adahan wis huwitig ku kit umawkan. Wis wages givit pahavwite akak ini sivarisa.

⁴ Hawata akiw wis kumaduka pahamku nawiy akak nopsesa sivari. Pahamku nawiy ka nopsimahad. Nawenetke eg darakaw abet mayg ku pariye kane ahawnisima heneme ka sam. Guhwitenten wagesgu ku kit gimawkan akak nopsesa atimuna.

⁵ Unenwiy hawata nopsesa heneme in keh ka aynsima annut. In kawih adahan kehne ka aynsima mbayka humaw. Ku samah pahawowa tiket amey in hamahwa in ik adahan bukah ah ka aynsima, hawata wownwiy.

⁶ In ke tiketbe. In ik adahan keh ka aynsima mbayka humaw. Unen nopsesa arikna heneme in ik adahan patahwasa hiyeg pahavwite. Ku samah pahayku tiket ik adahan bukah ka aynsima ah, hawata wown ik adahan matekbeta uhawkan takunipti. Tiket hamahwa ariwntak amey inme wown mbeyevye pes ariwntak wavitye.

⁷ Henewatbaki in. Ik adahan hiyeg kumaduka puwiknebdi madikte, gukakkis kuhiprebdi, gikakkis kawapnene, gikakkis madikte ku pariye ahakwaya un. Kuwis hiyeg kumadukigkis.

⁸ Heneme ka hiya wisma kumaduka wown wownteknewa adahan wis awna kabaykanen. In kewa pahavwi puwiknebe ku pariye kane gimabyanisima. Ubiy humaw kewa kaybunebe gibiy pahaywotneye.

⁹ Akak ubiywiy wixwiy kabayha Wigwiy Kiyavwiye Uhokri. Akakwata ubiywiy wixwiy mbayha uyakivwiy hiyeg ku pariye Kiyavwiye Uhokri gahehpak.

¹⁰ Ubiyaptakwiywata pes mbayka payegbitak akak kabayka. Nukebyuvwi, in ka kis adahan wixwiy awna hene.

¹¹ Avigkutak pahatra parewni ku pariye kibeyne, un pes kibeynewa. In ka hiya inma pes payegbitaknema akak un tiviyne.

¹² Hawata akiw madikte ah kewyekuye. Madikte ip kewyekuye. Egkis ka kew ku pariye kane guwkisma. Hawata akiw pahatra parewni ka sarayh un kisevye payegbitaknema akak kiteye.

Hiyakemniki amadgaya inin in nawenyewa ariw hiyakemniki inurikyene

¹³ Ku pahavwi inyewa hiyakemniye hiyeg, ig kahayaksa ini gihiyekemni akak ku samah giwewni. He kabaykanen pes giwntak akak tuwatka. Ayge ig inyewa hiyakemniye nikwe.

¹⁴ Heneme ku yis dagawnaw, ku yis atihpa pahavwi, ku yis kiye he yivitnen, ka ba yi muwaka ikaw ku yis hiyakemniye hiyeg. Inakni yiwn he wasaymkanen. In ka huwit avigkut Kiyavwiye Uhokri giwn ku pariye inyewatnene.

¹⁵ Akebi ini hiyakemniki ka ayta inuriktakma. In he hiyegnen gihiyekemnikis amadgaya inin. In wavitye ahiyekemni.

¹⁶ Ku kiney hiyeg atihpak ku kiney ignes kiye he givitkisnen, ayge dakuhwaki akak mbayka madikte.

¹⁷ Inme hiyakemniki inuriktekne in ka henema. Ku pahavwi kadahan ini hiyakemniki inuriktekne gihiyekemni barewbetye, ig huwipegevye, ig kiyakniye akak madikte hiyeg, ig tuwatevye, ig ka gamnihrasima, ig ka gabayisima. Ig ka pivutnamnema gihiyekemni ine ig ka kinisekevutnema.

¹⁸ Ku akebi ini hiyakemniki ku pariye kibeynewatnen ku in ay abet uhiyekemni, ayge nikwe wis pasamrak gikakkis hiyeg, hawata wis keh hiyeg pasamrak pawtak.