Tiyagu 2 - Uhokri Gahegbetawni Nukune akak Sawmus

Amawka wixwiy kiyatha madikte hiyeg hehpekuye

¹ Nukebyuvwi, ignewa Ukivarawiy Jesus Cristo ka gikiytanisima. Ku wixwiy inyewa kamaxwa givitit, amawka ku wixwiy ka kiyathatema pahavwi ukebyi amadgaya inin mpiy pahavwi.

² Nah kehte abektey. Ku pahavwi danuh atere yit adahan ig lammesya yikak akak gisimsa bereswatet, akak ka aynsima gakawak karukri wahano, gikak pahavwi akiw madiptivye akak mugumguviye gikawihni,

³ ku yis avuriw kabayntiwa ner ku pariye kasimsavunene akak bereswatet, ku yis awna git: “Batnaba atan amadga nor epti barewyo”, heneme ku yis awna git ner madiptivye: “Su tabira tahan. Ku pis ka tabirakere, pis bat amadga parak.”

⁴ Ku yis kiyatha igisye, igme madiptivye yis ka kiyatha, Ka ba yis hiyap ku yis pitenmebet yihiyekemni? Yis iki pahavwi ku ig kabayte giw pahavwi heneme yis yuma yihiyekemni adahan yis kaniy ku pariye hiyeg kabaytenene. Yis kaniy akak yihiyekemni mbeyevye.

⁵ Ataybiswanabay nutuh, nukebyuvwi kibeynevwi. Kiyavwiye Uhokri kaniy hiyeg madiptavye amadga inin adahan ig keh igkis humaw igisavye abet gihiyekemnikis awaku gikamaxwankis givitit Kiyavwiye Uhokri. Aysawnemenek ig keh igkis kumadukanek payak gikak mmanawa ig kuwis ikaksin hene gitkis madikte hiyeg ku pariye batekyevwi gikak.

⁶ Yisme mayhke ner madiptivye. Yis kiyatha he igisyenen. Ka ba yis hiyap ku ignesnewa igisavye ku pariye gibetkikis kinisyi, igkisnewa ku pariye tarakiswey givetunat hiyaptigi adahan igkis yikamyehpitni git?

⁷ Igkisnewa gibetkikis makuksa Kiyavwiye Jesus Cristo giw, inakni giw ku pariye wixwiy ikaw nikak.

⁸ Uhokri gannasan awna adahan wixwiy amnih hiyeg hawata ku samah wixwiy amnih uvitwiy. Inakni gikumadukan kabayte ariw madikte kumadukaki. Ku wixwiy inyewa iha inakni gikumadukan, amun ini nikwe wixwiy kehne ku pariye Kiyavwiye Uhokri gimawkan.

⁹ Heneme ku wixwiy kiyathate pahavwi mpiy pahavwi, amun ini wixwiy ka kehnema ku pariye Kiyavwiye Uhokri gimawkan. Wixwiy taraksavye mmanawa wixwiy kuwis tarakse inakni gikumadukan Kiyavwiye Uhokri.

¹⁰ Mmanawa ku pahavwi iha Kiyavwiye Uhokri giwn madikte, heneme ku ig taraksa pahatwowa iwit, nikwe kuwis ig tarakse Kiyavwiye Uhokri giwn madikte.

¹¹ Mpuse inakni iwit hehpekuye ahawna. Ig Kiyavwiye Uhokri ku pariye awna: “Ka yi muwaka powkemnihwa”, ig hawata ig awna: “Ka yi muwaka umah.” Hiyawa pis ka powkemnihwa heneme ku pis umah pahavwi, ayge nikwe pis kuwis tarakse Uhokri gikumadukan madikte.

¹² Battukawnay adahan yis awna ku samah Kiyavwiye Uhokri gimawkan. Battukawnay hawata adahan yis wew ku samah Kiyavwiye Uhokri gimawkan. Mmanawa kaba danuh ahawkanavrik adahan ig Kiyavwiye Uhokri hiyak ukakwiy. Ig uhivetniwiynek baki wixwiy wewnewatma akak inakni gikumadukan ku pariye keh wixwiy isahptaw.

¹³ Ku wixwiy ka amnih hiyeg, nikwe ig Kiyavwiye Uhokri kawnata amnihwiy. Heneme ku wixwiy amnih hiyeg, ayge nikwe ig Kiyavwiye Uhokri amnihwiy hawata, ig ka hiya wixwiy kema kane kibeynevwima giwtrik. Ig bayahminawiy ariw madikte utaraksanwiynek.

Ku pariye inyewa kamaxwa givitit Jesus igi wew akak Jesus gihiyekemni

¹⁴ Nukebyuvwi, ku pahavwi awna: “Nah kamaxwa givitit Kiyavwiye Jesus”, heneme ku ig ka wew akak Kiyavwiye Jesus gihiyekemni, ayge nikwe ini gikamaxwan givitit in waditnevyenenwa. Akebi ini kamaxwaki ka hiya inma keh ig isahptaw ariw gitaraksan adahan ig danuhne git Kiyavwiye Uhokri.

¹⁵ Nah akkite yit abektey. Ku pikebyi awayg ku kawk nawenetke pikebyi tino ku egkis yuma gukawihnikis, hawata yuma gumanakis,

¹⁶ ku pis awna gutkis: “Kiyavwiye Uhokri gabay yikaknek. Awahpusawnabay. Axnabay kabiha”, heneme ku pis ka iki gutkis ariknawnema ku pariye gumawkankis, ku pis he awnevi gutkis, ayge pis awna he waditnevyenen.

¹⁷ Hawata ini ukamaxwanwiy givitit Kiyavwiye Jesus. Ku wixwiy ka wew akak Kiyavwiye Jesus gihiyekemni, ini ukamaxwanwiy givitit in waditnevyenen.

¹⁸ Ik adahan pahavwi awna nutuh: “Pis kuwis kamaxwene givitit Kiyavwiye Jesus. Ikevyi kuwis. Ka sam ku pis ka wew akak gihiyekemni madiktema.” Nahme kaytwa giwn: “Kawa. Nuvewkan nah hawata nah mpiksaw wew akak Kiyavwiye Jesus gihiyekemni. Ku pahavwi ka wew akak gihiyekemni, mmah ahiyaka wot ku ig inyewa kamaxwene givitit Kiyavwiye Jesus? Ku samah nah mpiksewne wew akak gihiyekemni, ini arakak ku nah inyewa kamaxwene givitit Kiyavwiye Jesus.”

¹⁹ Pisme awna: “Ka sam. Nah iha ku pahavwiwa Uhokri ay.” Kibeyne pis iha inakni. Heneme ka innema keh wis isahptaw. Igkiswa wavityempu ihapnata ku Kiyavwiye Uhokri ay. Igkis ihapni kabayntiwa he igkis sagka awaku gavisnikis gibohri. Heneme igkis ka isahptaw.

²⁰ Wixwiyme ku wixwiy he ihevyenen ku ig Kiyavwiye Uhokri ay, heneme ku wixwiy ka wew gikak, nikwe wixwiy iha inakni he waditnevyenen. Akebi ini ukamaxwanwiy givitit in waditnevyenen. Ku pis ka pukuha ku samah ini, nukebyi, ba pis muwaka nah akki pit amadgatak Uhokri gannasan?

²¹ Nah akkite pit nikwe. Ig Kiyavwiye Uhokri hiyap uhawkriwiy amekene Abraawh kewa kibeynebe giwtrik awaku ku samah gikamaxwan keh ig wew akak Uhokri gihiyekemni. Ig wew akak gihiyekemni ku samah ig ihe giwn avim ini ku aysaw ig Kiyavwiye Uhokri awna git adahan ig kakanhaw gikamkayh Izaki git amadga pahak kakanhawket.

²² Ivegminanaba pihiyekemni, nukebyi. Ini ku samah ig ihe inakni giwn in pakwa amin ini gikamaxwan givitit Kiyavwiye Uhokri. Gikamaxwan makisupte awaku ku samah ig ihe giwn.

²³ Ayge nikwe metakwa in kahayak ku samah Uhokri gannasan awna. In awna: “Amekene Abraawh kamaxwa givitit Kiyavwiye Uhokri. Inneki keh ig Kiyavwiye Uhokri hiyavgi kewa kibeynebe giwtrik.” Kabayte akiw, ig amekene Abraawh kanumka “Kiyavwiye Uhokri gikagmada”.

²⁴ In kahayak huwewe nikwe ku ig Kiyavwiye Uhokri hiyap hiyeg kewa kibeynevwibe giwtrik awaku ku samah igkis wew akak gihiyekemni. Ku igkis kamaxwa givitit heneme ku igkis ka wewnema akak gihiyekemni, nikwe ig Kiyavwiye Uhokri ka hiyavgikis kema wadityema giwtrik.

²⁵ Nah akkite pit pahat abektey akiw gukak eg amakano Rabi nor tino powkemnivyo. Kiyavwiye Uhokri hiyap eg kewa kabaynobe giwtrik awaku ku samah eg ihe giwn. Mmanawa eg avuriw amekene Joswe giwatnivwi yawayavu eg bisiksevgikis avigku nawenyewa ahin.

²⁶ Nah kehte pahat abektey akiw akak uvitwiy. Ku yuma ner awnparinene ay uvitwiy, nikwe wixwiy miyarevye. Hawata ukamaxwanwiy, ku wixwiy kamaxwa givitit Kiyavwiye Jesus, heneme ku wixwiy ka wew akak gihiyekemni, nikwe ini ukamaxwanwiy in humaw ke miyaviyebe.