Tiyagu 1 - Uhokri Gahegbetawni Nukune akak Sawmus

Nah Tiyagu awahkis kabayka yimin

¹ Nah Tiyagu ku pariye gibuk Kiyavwiye Uhokri, ku pariye gibuk Ukivarawiy Jesus Cristo nah awahkis kabayka yimin yis hiyeg judeyenevwi muwapuw amadga wayk ku pariye kamaxwenevwi givitit Kiyavwiye Jesus. Nah aytnihyi madikte akak Uhokri gabay.

Amawka wixwiy batek abetnewa mbeyne

² Nukebyuvwi, ku aysaw yis hiyap arakembet mbeyne, ka yi muwaka kiyimwihwa nikak. Bateknabay kiyesrad.

³ Mmanawa ku aysaw wixwiy mpiyasa mbeyne akak ukamaxwanwiy givitit Kiyavwiye Uhokri, in ikite wawaygiy akiw, in keh wixwiy kamaxwate givitit Kiyavwiye Uhokri akiw.

⁴ Nikwe kamaxwanabay givitit Kiyavwiye Uhokri kabayntiwa akak madikte yikamaxwan. Ayge nikwe yis huwitnek avigkutavriknawa ku samah Kiyavwiye Uhokri gimawkan. Nikwe yuma ariknawnema muwekne yit.

Amawka wixwiy piriyepkaw akak madikte ukamaxwanwiy

⁵ Ku pahavwi yuma gihiyekemni, amawka ig aya gihiyekemni git Kiyavwiye Uhokri. Igme iki git. Ig Kiyavwiye Uhokri iki wotwiy wayapniwiy git mpiy akiw ku samah umawkanwiy. Ig ka ehwa ukakwiy.

⁶ Heneme amawka wixwiy aya git akak madikte ukamaxwanwiy. Amawka ku wixwiy ka ivegmina uhiyekemniwiy ba ig kaytwawatma wownwiy. Ku pahavwi ka hiyak ba inyewatma gayapni humaw git, igi ke parawbe kabobohwe awaku mayg. Ig ka pahatwowatma gihiyekemni.

⁷ Akebi ner hiyeg ka uti ariknawnema giwntak Kiyavwiye. Ig ka hiya igma awna: “Nawenetke nah utinek.” Ig ka uti.

⁸ Ku pahavwi pitenmebet gihiyekemni, igi misakwa avanenekwa matekbet gihiyekemni.

Ku wixwiy madiptavye, ka sam. Kawnata sam ku wixwiy igisavye

⁹ Ku pahavwi ukebyi, ku ig yuma gikiytani ay amadga inin, ka sam. Hiyawa ig batek ginaktin ku samah Kiyavwiye Uhokri keh ig humaw kiyatye hiyeg aynte inuriknek.

¹⁰ Ku pahavwime igisye, kawnata sam. Hawata hiyawa ig batek ginaktin ku samah Kiyavwiye Uhokri akki git ku ig ka kakiytanitema mpiya pahavwi. Mmanawa ig ka dahwa ay amadga inin, ig ke kuwik avuriybe.

¹¹ Ku aysaw kamuw inut awehevgu, madikte huruhrup, madikte avuriy kigise. Gubewi mpiye kibehtenwa. Hawata pahavwi igisye ig ikise gibereswan pahaye adahan ke madiktebe hiyegbe.

Uhokri ka tayuhkis hiyeg arit mbayka

¹² Ku pahavwi ka isaksaw arit mbayka avim ini ku aysaw ig abetnewa mbeyne, igi uti kabaykanek. Mmanawa ku aysaw ig hiyapka ku ig ka taraksa, nikwe ikaka git ini gitiwni dehetniki ku pariye Kiyavwiye Uhokri ikakse gitkis gihiyegavu ku pariye igkisyewa batekyevwi gikak.

¹³ Heneme ku pahavwi isaksaw arit mbayka avim ini ku aysaw ig abetnewa mbeyne, igi ka hiya igma awna: “Kiyavwiye Uhokri isakse inin mbeyne adahan in danuh nutuh. Inneki keh nah tarakse. Nikwe gihawkanavrik keh nah keh mbayka.” Ka hiya igma awna inakni hene. Mmanawa ig Kiyavwiye Uhokri ka kehkere mbayka. Ka ik adahan ig keh mbayka. Ig kawnata tayuhkis hiyeg arit mbayka.

¹⁴ Wis kehkere mbayka wownteknewa. Udahanwa umirihwan kinistaw adahan wis isaksaw arit mbayka.

¹⁵ Ku wis iha umirihwan ariwn, ayge nikwe wis patehwe. Ku wis patehwevye kuwis, ayge nikwe wis miya adahan wis biyuk giw Kiyavwiye Uhokri adahan avanenekwa.

¹⁶ Nukebyuvwi kibeynevwi, ka ba yi kinikiswa arit yimirihwan amadgaya inin.

¹⁷ Madikte ku pariye danuh wotwiy inuriktak in adahan kabaykanenwa. Yuma aynesnima mbayka abet Wigwiy gikan wotwiy. Ignewa kabutniki akivara isaksa in danuh wotwiy. Gihiyekemni adahan kabaykanenwa avanenekwa. Ku samah kabutniki yuma aynesnima amisnavye nibet, hawata ku pariye ig isaksa adahan in danuh wotwiy in yumahwata mbayka nibet.

¹⁸ Giwnteknewa ig keh wixwiy humaw gikamkayuvwi akak giwn inyewatnene. Inneki keh wixwiy humaw gikamkayuvwi eggutyevwi ariw madikte gikamkayuvwi buttityevwi.

Amawka wixwiy ahegbet timap ku pahavwi ikene uhiyekemniwiy

¹⁹ Nukebyuvwi kibeynevwi, amawka ku yis ahegbetnekuye timap giwn pahavwi ku pariye ikene yihiyekemni. Amawka yis ka pahayenema kaytwanig. Amawka yis ka pahayenema dagawnaw git.

²⁰ Ku wis dagawnaw, wis ka hiya awadebdihka uhiyekemni nikwe.

²¹ Uyay wiwhminaw ariw madikte patahwaki ariw madikte hiyakemniki mbeyevye ku pariye aytente abet uhiyakemnwiy. Isaksanay Kiyavwiye Uhokri giwn adahan in misakwa ay abet yihiyekemni. Amavanibay akak tuwatka. Inakni giwn innewa ik adahan in keh wixwiy isahptaw ariw uvathawniwiy adahan wixwiy danuhne git Kiyavwiye Uhokri.

Amawka wixwiy iha Uhokri giwn

²² Heneme amawka ku wixwiy ka ininewatma wixwiy timap giwn. Amawka hawata ku wixwiy iha inakni giwn. Ku wis ikiy ku wis he timepi giwn ikevyi kuwis wis isahptaw, ayge nikwe wis kinis uvitwa.

²³ Ku wis timap giwn heneme ku wis ka ihpin, ayge nikwe wis humaw ke pahavwi hiyeg waruwehwenebe.

²⁴ Ig hiyap gihivak, aynewa ig tivik ariw ig ka kiye ku samah gihivak akiw.

²⁵ In Uhokri gikumadukanin inyewa waditye. In keh hiyeg isahptaw. Ku pahavwi iveg nimkat kabayntiwa, ku ig tiviknene nikak igi uti kabaykanek. Ku ig ka miyeh ku pariye ig timap, hawata ku ig ihapni, ayge nikwe ku samah ig ihapni ayge ig uti ka aynsima kabayka nikwe.

²⁶ Ku pahavwi ikaw ku ig kamaxwa givitit Kiyavwiye Uhokri kabayntiwa heneme ku ig ka avuriw giwn, igi kinisne givitwa. Ig ikaw Kiyavwiye Uhokri gihiyega waditnevyenen.

²⁷ Nah akkite yit ku pariye igyewa Kiyavwiye Uhokri gihiyega yumanene gitaraksan giwtrik Kiyavwiye Uhokri. Ig pahavwi ku pariye avuriw migenavye gukakkis madankunovwi ku aysaw egkis abet mbeyne. Hawata akiw ig avuriw gihiyekemni ariw patahwaki amadgaya inin.