Titu 3 - Uhokri Gahegbetawni Nukune akak Sawmus

Amawka Jesus gihiyegavu ikaw tuwatavye

¹ Kiyekis gitkis pihiyegavu adahan igkis ihpa giwn ikivarat adahan igkis ihpa giwnkis madikte ukivarawiy amedgenevwi inin. Amawka ku igkis ihpa gikumadukankis. Amawka ku igkis ahegbetnenekwa adahan kehne madikte ku pariye kabayka.

² Awnanaba gitkis adahan igkis ka pataha giw pahavwinema hiyeg. Amawka igkis ka humaw kakigbivyema hiyeg heneme igkis humaw huwipagavye. Amawka igkis ikaw tuwatavye gitivutkis madikte hiyeg avanenekwa.

Uhiyakemniwiy minikweknene kawnata maguyema

³ Mmanawa minikwak wixwiy kewa nerasbe kireteyenevwibe. Wixwiy kawnata hiyak hawkri. Avim ini wixwiy kawnata ihpa ukivarawiy giwnkis. Wixwiy hawata taraksavye. Avim ini wixwiy kumadukasa uhiyekemniwiy arit uhiyekemniwiy minikweknene abetki, arit batekka amadgaya inin. Ayge wixwiy wew kanaktinbet gikakkis hiyeg, wixwiy atihpene hiyeg. Wixwiy amiyhewbet pawtak.

Uhokri kagamnihrasima ukakwiy

⁴ Heneme kibeyne, ig wamnihtenwiy Kiyavwiye Uhokri kuwis hiyapkise gabay wotwiy ig kuwis hiyapkise gamnihra wotwiy.

⁵ Ayge nikwe ig keh wixwiy isahptaw ariw utaraksanwiy adahan wixwiy danuhne git Kiyavwiye Uhokri. Kawki ukehbetanwiyma kabayka keh wixwiy isahptaw, heneme ini gamnihra innewa ku pariye keh wixwiy isahptaw. Ig keh wixwiy isahptaw akak ku samah ig Kiyavwiye Uhokri Gitip ke wotbe ig sukuhbenete uhiyekemniwiy ariw nivathawni, ig keh utivwiy wayvuka akiw, ig iki wotwiy nukune uhiyekemniwiy.

⁶ Kibeyne, ig Kiyavwiye Uhokri kawihkise Gitip uvititwiy ka aynsima givitimpi wamnihtenwiy Jesus Cristo.

⁷ Wixwiy ka kiseweknema adahan ig amnihwiy, heneme he wamnihkawiynen ig amnihpewiy ig keh wixwiy kewa kibeynevwibe giwtrik Kiyavwiye Uhokri. Ayge nikwe ig keh wixwiy ik adahan wixwiy darih ini kabayka dehetniki ku pariye wohpanwiy.

⁸ Titu, inakni inetit ka waditnevyenenma. Numawkan pis akki inakni inetit akak madikte pawaygi kahadbe ku pariye hiyeg kamaxwenevwi givitit Kiyavwiye Uhokri igkis battukaw keh kabayka avanenekwa. Inakni kinetihwaki in kibeynewa in wagahkis hiyeg gihiyekemnikis.

Tukuhwepnaba ariw kinetihwaki ku pariye waditnevyenen

⁹ Kinetihwanaba amin inakni Kiyavwiye Uhokri ginetni heneme tukuhwepnaba ariw kinetihwaki ku pariye he mahayakemnikinen. Ka ba iniyak amin amekenegben giwnkis, ine amin amekene Moís gikumadukan. Akebi inakni iwit he waditnevyenen. In ka wagahkis hiyeg gihiyekemnikis.

¹⁰ Ku pahavwi danuh atere ig matekbetene hiyeg gihiyekemnikis, ikinaba gihiyekemni pimavut. Ayteke ku ig ka ihpa inakni piwn, amawka pis miniw giw.

¹¹ Mmanawa ayge pis hiyakni ku ig kuwis tukuhwevwe ariw hiyakemniki ku pariye inyewatnene, ig taraksevye. Ini gikehni akki ku ig ka wadityema.

Uya danuhpa nutuh

¹² Titu, nah awahkiste pahavwi pimin adahan piwenyan ayge. Nah kote hiyakte ku pariye nah awahkis atere ba kiyavwiye Artemas ba kawk ba kiyavwiye Tikiku. Heneme ku aysaw pahavwi danuh atere, pisme iwawhaw danuh nutuh atere avitit paytwempu Nikópolis. Mmanawa nuvewkan nah mpiyasa kamukri ayge.

Amawka wixwiy ayava hiyeg kamawkanyevwi

¹³ Kehnaba madikte ku pariye pis hiya asamanak adahan gayavetnikis neras inetitkekne kiyavwiye Zenas gikak kiyavwiye Apolu kahadbe igkis tivik akak madikte kabayka. Kabayhanigkisba akak madikte ku pariye gimawkankis.

¹⁴ Amawka uhiyegavu kannuh keh kibeyne kabayka avanenekwa adahan gayavetnikis hiyeg ku pariye kamawkanyevwi. Amawka ku igkis ka misakwa waditnevyenenma.

Usuh awahkis kabayka pimin

¹⁵ Madikte hiyeg ku pariye ay nukakuh igkis awahkis kabayka pimin. Usuh awahkis kabayka giminkis madikte kamaxwenevwi ayge ku pariye batekye ukakuh. Wani igkis kabay nudahan. Kiyavwiye Uhokri gabay yikaknek madikte.