Titu 2 - Uhokri Gahegbetawni Nukune akak Sawmus

¹ Pisme, Titu, amawka pis kannuh pihiyegavu adahan igkis wew akak hiyakemniki kibeynewatnene.

Amawka kiyavwiyegben ikaw akak kiyatka akak huwivgaki

² Ikinaba gihiyekemnikis kiyavwiyegben adahan igkis avuriw gihiyekemnikis kabayntiwa. Awnanaba gitkis adahan igkis ikaw akak kiyatka akak huwivgaki, adahan igkis wew akak kibeyne gihiyekemnikis. Amawka ku igkis kamaxwa givitit Kiyavwiye Jesus kabayntiwa. Amawka ku igkis batek gikakkis hiyeg ka aynsima. Amawka ku igkis tiviknene kamaxwenene givitit Kiyavwiye Uhokri abetnewa mbeyne.

Amawka tinogben ikaw akak kiyatka akak huwivgaki

³ Ikinaba guhiyekemnikis kiyavunogben hawata adahan egkis hawata ikaw akak kiyatka akak huwivgaki. Amawka ku egkis ka awnatruvyoma giminkis hiyeg. Amawka ku egkis ka uwkihwatruvyoma. Amawka ku egkis kannuh hiyeg buttyevwi adahan ignes wew akak kibeyne hiyakemniki.

⁴ Amawka ku egkis kannuh tinogben buttyovwi adahan egkisme batek gikakkis gugihgikis gikakkis gukamkayhkis.

⁵ Adahan egkis wew akak kibeyne hiyakemniki, adahan egkis avuriw guhiyekemnikis barewbetye, adahan egkis avuriw guvinkis kabayntiwa, adahan egkis wew kabayntiwa gikakkis gugihgikis, egkis ihpatruno giwnkis. Ayge nikwe egkis ka mbayhasa Kiyavwiye Uhokri giwn gitkis hiyeg.

Amawka takwaviye wew akak kibeyne hiyakemniki

⁶ Ikinaba takwaviye gihiyekemnikis adahan igkis hawata wew akak kibeyne hiyakemniki.

⁷ Kehnaba kabayka ayge gibetkis avanenekwa adahan igkis kannuhwa pit. Ka ba taraksa pahatnema iwit ku pariye pis kannuhgikis nimin. Akkanaba Kiyavwiye Uhokri giwn akak madikte kiyatka.

⁸ Awnanaba kibeynenen iwit avanenekwa kahadbe hiyeg ka ik adahan igkis awna pimin ku pis ka kibeynema. Ayge nikwe, uvetunyavuwiy hiyapni hene, igkis marekevwenek, igkis ka hiya igkisma pitimnak ukakwiy akiw.

Amawka hiyeg kiyatha gikivarakis

⁹ Ikinaba gihiyekemnikis hiyeg ku pariye kannivwiye gidahan pahavwi adahan igkis iha giwnkis gikivarakis. Amawka ku igkis keh gibetkikis. Amawka ku igkis ka wagesgikis.

¹⁰ Amawka ku igkis ka kidis gewkanbetkis heneme igkis keh ku pariye waditnene adahan gikivarakis iveg givititkis. Ku igkis keh hene, nikwe igkis avanenekwa kiyathasa gitkis hiyeg inakni unetni gimin wamnihtenwiy Kiyavwiye Uhokri.

Uhokri gabay hiyakemnihwiy

¹¹ Mmanawa Kiyavwiye Uhokri kuwis hiyapkis gabay gitkis madikte hiyeg. Ini gabay innewa keh wixwiy isahptaw.

¹² In gabay hiyakemnihwiy kahadbe wixwiy tukuhwevwa ariw gihiyekemnikis hiyeg ku pariye kane wewnevwima gikak Kiyavwiye Uhokri. In gabay hiyakemnihwiy kahadbe wixwiy ka iveganaw arimkat batekka amadgaya inin akiw. In gabay in hiyakemnihwiy kahadbe wixwiy wew akak kibeyne hiyakemniki, kahadbe kuri akak inin wixwiy wew wadit wixwiy ikaw Uhokriyanbetnewa.

¹³ In keh wixwiy wahap akak madikte ukamaxwanwiy ini kibeyne hawkri danuh ku aysaw Uwohkigawiy wamnihtenwiy Jesus Cristo hiyapkiswa wotwiy ka gikiytanisima.

¹⁴ Kibeyne, ig umahkiswe udukwenavrikwiy giwnteknewa adahan ig sagahptevye wixwiy ariw madikte uvathawniwiy. Mmanawa gimawkan ig keh wixwiy humaw barewvityevwi hiyeg, hiyeg gidahannenwa Kiyavwiye Uhokri, hiyeg ku pariye batekyevwi keh kabaykanen.

¹⁵ Titu, akkanaba inakni hiyakemniki. Iki hiyeg gihiyekemnikis adahan igkis ihpa inakni iwit. Himahnaba taraksavye akak madikte pikiytani giwntak Kiyavwiye Uhokri. Wewnaba hiyakemun adahan hiyeg ka mayhkepma.