Titu 1 - Uhokri Gahegbetawni Nukune akak Sawmus

Nah Pol awahkis kabayka pimin

¹ Nah Pol, ku pariye Kiyavwiye Uhokri gibuk, nah awahkis kabayka pimin. Kibeyne, nah Jesus Cristo giwatni. Nah awahkiska adahan wagahkisne Uhokri gikanyanvu gikamaxwankis. Nah awahkiska adahan hiyakkisne gitkis ini hiyakemniki ku pariye inyewatnene ku pariye keh hiyeg wew gikak Kiyavwiye Uhokri.

² Kahadbe igkis aymuhwa gimun Kiyavwiye Uhokri adahan avanenekwa. Ig Kiyavwiye Uhokri ku pariye ka wasaympiyema ig ikakse wotwiy minikwak avit hawkri humaw adahan waymuhwanwiy ay gimun.

³ Kibeyne, kuwis ahawkanavrik danuh adahan ig kahayaksa wotwiy ini waymuhwanwiy gimun. Ig kahayaksin wotwiy abet ini ginetni gimin Jesus Cristo. Nahme, ig wamnihtenwiy Kiyavwiye Uhokri awahkisun adahan nah ekkene inakni ginetni gitkis madikte hiyeg.

⁴ Nah awahkis kabayka pimin Titu. Pis kewa nukamkayhbe nutuh mmanawa pis inyewa kamaxwa givitit Kiyavwiye Jesus ke nahbe. Wigwiy Kiyavwiye Uhokri gikak wamnihtenwiy Cristo Jesus gabaykis pikaknek. Igkis kariswehse piyakninek.

Kaniynaba kibeyne hiyeg adahan igkis humaw giwewkistenkis Jesus gihiyegavu

⁵ Titu, nah ikiswep ayge avit ini kewgihri Kiretamnaw adahan pis wadithebdihne ku pariye muweke gitkis Jesus gihiyegavu ayge. Nah ikispi ayge adahan pis kaniyne gaytakis hiyeg ayge adahan igkis humewne giwewkistenkis Jesus gihiyegavu. Numawkan pis kaniygikis avititak mpuse paytwempu ku samah kuwis nah awna pit.

⁶ Kaniynaba hiyeg ku pariye ikaw Uhokriyanbetnewa kane taraksevyema. Amawka ku igkis pahavuwa gihayokis. Amawka ku gikamkayhkis hawata kamaxwa givitit Kiyavwiye Uhokri. Ka muwaka kaniy pahavwi ku pariye kakamkayne mahayakempiye. Heneme kaniynaba pahavwi ku pariye gikamkayh ihpatrune giwn.

⁷ Pahavwi ku pariye huwithene Jesus gihiyegavu amawka ku ig waditye ke gikivara Kiyavwiye Uhokribe mmanawa ig kannivwiye gidahan Kiyavwiye Uhokri. Amawka ku ig ahegbet timap gitaraksan ku aysaw in ekkaka git. Amawka ku ig ka dagawnatruvyema. Amawka ku ig ka uwkihwatruvyema. Amawka ku ig ka kamabyanpiyema. Amawka ku ig ka miyarhaw aharit ariknawnema.

⁸ Amawka ku ig ka giyaknisima amava hiyeg givinekut. Amawka ku ig batekye keh kabayka. Amawka ku ig wew akak kibeyne hiyakemniki. Amawka ku ig ikaw waditye. Amawka ku ig wew akak Uhokri gihiyekemni. Amawka ku ig kannuh avuriw gihiyekemni kabayntiwa.

⁹ Amawka ku ig ivegminenekwa gihiyekemni amin inakni Kiyavwiye Uhokri ginetni ku kamin ig kuwis kannuhka mmanawa inakni ka waditnevyenenma. Ayge nikwe ik adahan ig iki pahavwi gawaygi akak inakni hiyakemniki. Hawata akiw ik adahan ig akkamnih gitaraksankis gitkis neras ku pariye suguhnevwi inakni Uhokri gihiyekemni.

Kiretayenevwi gihiyekemnikis ka maguyema

¹⁰ Mmanawa ayge Kiretamnaw ka aynsima hiyeg ku pariye ka ihpenevwima inakni gihiyekemni. Igkis he awnbetevi amin iwit ku pariye kane ayava hiyeg. Igkis wages hiyeg gihiyekemnikis ariw Uhokri gihiyekemni ku pariye inyewatnene. Neras ku pariye awnenevwi ku amawka madikte Jesus gihiyegavu iha judeyenevwi gihiyekemnikis igkis mbayte giwkis madikte.

¹¹ Amawka ku igkis mpithaka adahan igkis ka awna inakni hene akiw mmanawa igkis matekbetene ka aynsima hiyeg gihiyekemnikis payak gikakkis gikebyuvwikis. Igkis gikannuhtenkis amin ku pariye ka kiskama igkis kannuhgikis. Igkis humaw gikannuhtenkis he aharitnen gikakurakis. Kiskama igkis mara akak inere.

¹² Pahavwi gaytakis neras kiretayenevwi ku pariye giwohkigakis gawneve gitkis, ignewa hiyeg kiretayene heneme ig awna: “Kiretayenevwi igkis wasaymavyenen hiyeg. Igkis ba gimabyankis ke axtigibe. Igkis mabivwavye hiyeg. Igkis kayhavye hiyeg.”

¹³ Giwnapnawa ku samah ig awna. Nikwe amawka pis himahgikis adahan igkis kamaxwa kabayntiwa givitit Kiyavwiye Uhokri.

¹⁴ Awnanaba gitkis adahan igkis ka iki gitewkis arit judeyenevwi gihyakemnikis ku pariye he inetitapnen. Amawka ku igkis ka iha kumadukaki ku pariye he giwntakisnenwa hiyeg ku pariye kuwisnene tukuhwe ariw Kiyavwiye Uhokri giwn inyewatnene.

¹⁵ Wixwiy Jesus gihiyegavu ka muwaka iha ariwn inakni gikumadukankis adahan in umaptentenwiy ariw patahwaki mmanawa ku pahavwi kuwis barewbetye gihiyekemni, nikwe madikte arikna kibeynekuye gidahan. Heneme ku pahavwi patehwevye gihiyekemni, ku ig ka kamaxwenema givitit Kiyavwiye Uhokri, nikwe yuma ariknawnema kibeyne gidahan. Yuma ariknawnema kibeyne gidahan mmanawa gihiyekemni patehwevye payak akak gitip.

¹⁶ Neras kinisekevutnevwi igkis ikawnamahkis ke wotbe igkis hiyak Uhokri gihiyekemnibe. Heneme gihiyekemnikis ka akki hene. Nikwe igkis aseneweke git Kiyavwiye Uhokri. Igkis ka ihpenevwima Kiyavwiye Uhokri giwn. Igkis ka kawih adahan keh ariknawnema kabayka.