Sawmus 99 - Uhokri Gahegbetawni Nukune akak Sawmus

Uhokri ig ikivarat detye

¹ Kiyavwiye Uhokri ig Ikivarat. Hiyegviyenevwi sagkanabay givetunat. Ig bat ay amadga gevwi kiyatyo, ku pariye misakwa aynte guvitmin egu kiyes adahan pasamraki, ku kiney ignes kegubihyenevwi. Waxri sagkanaba givetunat.

² Kiyavwiye ig ka gidatnisima ay Jerusalém. Ig kumaduka madikte nawwotunyevwi.

³ Amawka madikte hiyeg kabayha giw kane nikiytanisima. Awaku ignewa kis adahan kiyathaka. Kiyavwiye Uhokri ig barewvitye.

⁴ Ikivarat detye, pis batek akak waditka; inneki keh pis ewkwin atan gibetitkis izhaewyenevwi, kahadbe kadahan hiyapka taraksaki avigkutavriknawa hiyakemniki waditnene hawata inyewatnene.

⁵ Kabayhanay Kiyavwiye uwohkigawiy! Paberetusawnay avetunat gevwi kiyatyo. Kiyavwiye Uhokri ig barewvitye.

⁶ Moís gikak Arawh igkis Kiyavwiye Uhokri gimuwvegavu. Igme Samuwew hawata kiyathig. Igkis amnihswenekuyes git Kiyavwiye, igme kaytwanenekwa giwnkis.

⁷ Ig Kiyavwiye Uhokri awna gikakkis izhaewyenevwi abetitak sariyan. Igkisme ihpenenekwa gikumadukan ku pariye ig ike gitkis.

⁸ Kiyavwiye uwohkiga, pis kaytwe giwnkis pihiyegavu. Pis ekke gitkis ku pis Kiyavwiye Uhokri bayahminekevutne, heneme pis hawata hiyapkis gitkis hiyeg avatra givathawnikis.

⁹ Kabayhanay Kiyavwiye uwohkigawiy. Kiyathanigbay ay avit giwaxig barewvitye. Mmanawa Kiyavwiye uwohkigawiy ig barewvitye.