Sawmus 98 - Uhokri Gahegbetawni Nukune akak Sawmus

Matakaki akak waditka gidahan Uhokri

¹ Paknay pahat nukune avat git Kiyavwiye Uhokri, mmanawa ig kehe ka aynsima barewyevwi annut. Ig mateke madikte akak gidatni hawata akak inin gikiytani barewbetye.

² Ig Kiyavwiye Uhokri ekke ku samah gidatni. Ig kehe nawwotunyevwi hiyeknekuye inin gidatni amnihkevutne.

³ Ku samah gikaksan gitkis gihiyegavu izhaewyenevwi henewa ig kehni. Ig ekke gabay danuhte arit iwetritviyene piyawakadnene avit waxri. Madikte igkis hiyepnekuye uwohkigawiy gidatni.

⁴ Paknay akak yibetki git Kiyavwiye Uhokri, yis hiyegviyenevwi amadgayavu inin. Kabayhanay Kiyavwiye akak avatman hawata akak kabimanka awaku yibetki.

⁵ Paksanay Kiyavwiye Uhokri, bukihka akak hebek. Agighanay agigman akak hebek.

⁶ Agighanay tohompet akak egu kohneta. Akkanay yibetki git Kiyavwiye Ikivarat.

⁷ Kimanhawnay parahwokwa akak madikte ku pariye misekwenevwi nihakwa. Paknay waxri akak madikte ku pariye misekwenevwi nivit.

⁸ Warikviyene, biwhnay yikak! Waxribdi imuwadminene, paknay akak yibetki givetunat Kiyavwiye Uhokri.

⁹ Awaku ig nehmnik adahan kumadukene waxri. Ig kumadukanek madikte hiyegviyenevwi akak waditka hawata avigkutavriknawa kabayka.