Sawmus 95 - Uhokri Gahegbetawni Nukune akak Sawmus

Avat adahan kabeyhene Uhokri

¹ Aytninay madikte! Uyay kabayha Kiyavwiye Uhokri! Uyay pak akak batekka git ner kene tipbe ku pariye mpithawiy hawata amnihwiy.

² Uyay kahayak ta givetunat akak kabayhaki, pekempi avat akak batekka adahan kabayhaki.

³ Mmanawa ig Kiyavwiye Uhokri ka gidatnisima. Ig detye Ikivarat. Ig givitminkis madikte uhokriviyene henenwatnenwa.

⁴ Ig kumaduka pahakte hawkri, ku samah ariwntak miyokwiyebdi kane amihnisima danuhte arit waxribdi kane amunisima.

⁵ Ig kumaduka parahwokwa ku pariye igwa keh. Hawata ig kumaduka waxri ku pariye gikehniwata.

⁶ Aytninay, uyay paberetusaw adahan wixwiy kiyathene Kiyavwiye Uhokri! Uyay paberetusaw givetunat uhumtenwiy!

⁷ Mmanawa ig uwohkigawiy, wixwiyme gihiyegavu ku pariye ig avuriw. Wixwiy gimuwtohravu ku pariye ig huwitha. Timapnay kuri ku pariye giwn wotwiy:

⁸ “Ka yi muwaka ikaw karatonavye, ke ignesbe yahawkrivwi minikweknevwibe aynte amun ini iwetrit Meribá hawata ayge amatmadga kewye Massá.

⁹ Ayge igkis hikekwen ba nah aywatma gikakkis hawata igkisevye ayta nutivut, hiyawa igkis hiyepnekuye ku pariye nah kuwis kehe gidahankis.

¹⁰ Abetnewa paxnika madikwa (40) kamukri ignes hiyeg kehne nudagoni. Nikwe nah awna: “Yisneki hiyeg mbeyviye yihiyekemni! Yis ka ihpekere nukumadukan!”

¹¹ Nah dagawne gitkis, nah kehe inin nukaksan giminkis, nah awna: “Yis ka tukunima paraknek atere avitit Waxri Ikaksaki, ku kiney aygekama nah iki yit mayaka.”