Sawmus 92 - Uhokri Gahegbetawni Nukune akak Sawmus

Avat adahan kabeyhene Uhokri

¹ Kiyavwiye Uhokri, kibeyne adahan ku samah usuh kabayhap! Kibeyne adahan ku samah usuh pekne avat adahan pikiytenitni, pis inurikyene.

² Kibeyne adahan ku samah usuh kinetihwa amin pamnihra hawkanawa; inme tiyegem amin pabay.

³ Akak agig kimsaku aman hawata akak hebek aman.

⁴ Kiyavwiye Uhokri, pikehavan akak pidatni in keh nah bateke numinuh. Hawata nah pak akak madikte nubetki amin madikte ku pariye pis kehe nudahan.

⁵ Kiyavwiye, pis kehave ka aynsima ariknebdi. Pihiyekemni in ka aynsima nimihawni.

⁶ Ay pahat arikna ku pariye hiyeg mahiyekemnivye ka hiyak: Hiyeg mbayavye aymuhwa kewa pamatkabe.

⁷ Neras arewhavye ik adahan igkis humaw igisye, heneme igkis pisenwepkanek gikakkis pahatye amin.

⁸ Pisme Kiyavwiye, pis Uhokri inurikyene adahan avanenekwa.

⁹ Usuh hiyak ku ignes pivetunyavu miyarapnek. Hawata madikte ignes mbayavye matekepkanek.

¹⁰ Nahme pis kehun nah humaw detye kewa pak awaygbe. Hawata pis sarayh kabayka nuvitit akak ini pamnihra.

¹¹ Nah kuwis hiyap ku samah igkis nuvetunyavu hahwa hawata nah timap mbayavye gibimankis.

¹² Igkisme hiyeg wadityevwi igkis humaw ka gabihetnikissima kewa egnesbe ah katiwbiyobdibe ku pariye kew ka aynsima. Igkis aymuhwanek kewa egnesbe ah magawga ayntenano Libanomnaw.

¹³ Igkis kewa noras ahpiyanovwibe mutuhkabdi aynte aranwa Kiyavwiye Uhokri givin, ku pariye kavurihwa ayge aharavrik givin.

¹⁴ Akak gikivaykis neras hiyeg adukwenewa sarayhnene giwkis. Igkis detyevwi avanenekwa hawata igkis ayvekuye gawaygikis.

¹⁵ Igkis ahegbet adahan ekkene ku Kiyavwiye Uhokri ig waditye. Ignewa umaptenten, ay givit yuma taraksaki.