Sawmus 91 - Uhokri Gahegbetawni Nukune akak Sawmus

Nah ayemwene ganmavrik Uhokri

¹ Kiyavwiye Uhokri inurikyene ig ka gidatnisima. Ku pariye hiyeg ayemwene ganmavrik nikwe ig ka avisnema akiw.

² Hiyawa ig awna git: “Kiyavwiye Uhokri, pisnewa numaptenten. Pisnewa nukavriwten. Pisnewa nuwohkiga. Nah kamaxwa pivitit.”

³ Ig Kiyavwiye Uhokri mpithapnek ariw ini mbeyne ayemewnene. Hawata ig mpithapnek ariw karayt mbeyevye.

⁴ Ig awastapnek anavi gihanpi ke tarakakbe akak gukamkayh. Ayge anavi gihanpi yuma ariknawnama hiya pisamanak. Kiyavwiye Uhokri gabay avuriwpinek kabayntiwa.

⁵ Ku pis kamaxwa givitit Kiyavwiye Uhokri, pis ka avisnek wew abet kibohriki puwivak. Ine abet tiyegem pis kawnata avisnek.

⁶ Ku pis timap arikna abetya amisnavye pis kawnata avisnek. Ku pis abet mbeyne puwipka abet pis kawnata avisnek.

⁷ Hiyawa miw hiyeg tuguhbetwikis miyapte ay pihumwa, hawata madikawku miw miyarap ay panwa, pisme ka hiyapnek mbeyne ariknawnama.

⁸ Aytontak ganmavriktak pis sarayhnek pivegi, pis hiyapnek ku samah igkis mbayavye hiyap mbeyne, awaku igkis ka wewkere gikak Kiyavwiye Uhokri.

⁹ Ku pis ayamwa hene ta ganmavrikut Kiyavwiye Uhokri inurikyene, nikwe ig mpithapnek.

¹⁰ Ayge nikwe yuma ariknawnama mbeyne huwivwihpinek, ine mbayka kawnata danuhnek pivinbukut.

¹¹ Ig Kiyavwiye Uhokri avuriwkispinek ta gitkis giwatnivwi ahj adahan igkisme pimaptenten ku kityekapnek.

¹² Igkis amavapnek amadgat giwakkis kahadbe ine pikugku ka tes avitit tip.

¹³ Pis ka avisnek gibohrikis kaybune akak kawokwine. Henewatbaki, kawokwine kamabyanpiye pis umahginek, igme kaybune pahaywotneye pis sibuhginek gitewha batewbet.

¹⁴ Ku aysaw Kiyavwiye Uhokri hiyapinek abet mbeyne, ig awnanek pimin, giwn: “Nah amnihgite awaku ig batekye nukakuh. Nah avuriwgite awaku ig kumadukasewne nutuh.

¹⁵ Ku aysaw ig amnihswanek nutuh, nahme amnihginek. Ku aysaw ig abetnek mbeyne nahme wiwhginek ayteke. Nah kabayhignek adahan gikamaxwan nuvitit.

¹⁶ Nah keh ig isahptawnek ariw mbeyne adahan ig aymuhwanek numunuh adahan avanenekwa.”