Sawmus 9 - Uhokri Gahegbetawni Nukune akak Sawmus

Kibeyne, Uhokri pareke abet nuhawkan

¹ Kiyavwiye Uhokri, nah kabayhap akak madikte nubetki. Nah kinetihwanek amin madikte pikehni kabayka.

² Ku aysaw nah kiyepi nuyakni bateke. Nah avanenekwa batek pikak. Nah paknek adahan kabeyhene piw avanenekwa. Pisnewa nuwohkiga. Pis avitminte madikte nudahan.

³ Ku aysaw pis parak abet nuhawkan, nuvetunyavu bisik, igkis tuguh, igkis miyarap.

⁴ Pisnewa ivegbeta hiyeg gihiyekemnikis. Pis waditye. Pis ka taraksati. Pis kumaduka hiyeg akak madikte waditka. Kibeyne ku samah pis pareke abet nuhawkan.

⁵ Pis himehe hiyegviyenevwi ku pariye kane ihpa piwn. Pis pisenwe akak hiyeg mbayavye gihawkankis; pis miyehkise giwkis gitkis hiyeg.

⁶ Pis keh uvetunyavu yuma giwskekikis akiw; pis pisenwe gikakkis adahan avanenekwa, hawata igkis ka kiyekan akiw.

⁷ Heneme pis, Kiyavwiye, pis kumadukene adahan avanenekwa. Pis bat amadga pevwi kiyatyo adahan hiyekne gikakkis madikte hiyeg.

⁸ Pis kumaduka hiyeg akak waditka. Pis hiyapkis gitkis pakeku akak ku samah gikehnikis.

⁹ Kiyavwiye, pis hawata humaw ayemweket gidahankis hiyeg ku pariye haraksakavu. Pis mpithigkis avim ini ku aysaw igkis abet mbeyne.

¹⁰ Ku pariye hiyeg pihiyekten ignes kamaxwa pivitit. Mmanawa pis ka miniwnema giwkis hiyeg ku pariye amnihswenevwi pit.

¹¹ Nukebyuvwi, paknay avat adahan kabeyhene Kiyavwiye Uhokri Dehetniye ku pariye kumadukene aynte Jerusalém! Akkanay gannu gitkis hiyegviyenevwi muwapuw amadga hawkri!

¹² Mmanawa ig Kiyavwiye Uhokri avuriw ku pariye hiyepnevwi mbeyne. Ig ka miyeh gamnihswankis. Ig hiyapkis mbeyne gitkis neras ku pariye giharakseptenkis.

¹³ Kiyavwiye, amnihnanuba! Iveg ku samah igkis namiyhetnivwi hiyapkis mbeyne nutuh! Nah abet miyaka, Kiyavwiye. Uya wiwhun ayteke

¹⁴ kahadbe nah ik adahan tabira givetunkis jerusalémyenevwi adahan nah ekkene gitkis mmahki nah kabayhap hawata adahan nah awna gitkis ku nah bateke numinuh awaku ku samah pis wiwhpen ariw miyaka.

¹⁵ Hiyeg ku pariye kane wewkere akak Kiyavwiye Uhokri gihiyekemni, igkis pisenwepkanek gikakkis. In ke wotbe igkis tuguhbetwikisbenek arikut inwata miyokwiye ku pariye gitiknikis. Igkis ahegbete pahat tey, heneme igkisnewa tuguhbetwikis arikut.

¹⁶ Avim ini ig Kiyavwiye Uhokri Dehetniye metakwa ig hiyakan ku ig waditye. Igkisme mbayavye igkis tuguhbetwikisnek arikut gidahankiswa giteynikis.

¹⁷ Hiyeg mbayavye payak gikakkis madikte hiyeg ku pariye kane aminema giw Kiyavwiye Uhokri, aysawnemenek igkis madikte tiviknek arimkat miyaka.

¹⁸ Ignesme hiyeg madiptavye avim ini igkis avuriwkanek kabayntiwa. Yuma pahavwinema gaytakkis miyehka akiw. Neras ku pariye hiyepnevwi mbeyne kuri avim inin, aysawnemenek madikte ku pariye igkis aharitne in ka mpithakanek giwkis akiw.

¹⁹ Kiyavwiye, kannikawnaba. Ka ba isaksa hiyeg amadgaya inin ikaw awaygtema mpiyap. Iwapnigkis pivetunat adahan pis hiyak gikakkis.

²⁰ Kiyavwiye, keh igkis avis pibohri kahadbe igkis hiyak ku igkis he hiyeginenwa ka dep miya, igkis ka ariknawnama.