Sawmus 88 - Uhokri Gahegbetawni Nukune akak Sawmus

Giviryepkawni pahavwi hiyepkerevutne mbeyne

¹ Kiyavwiye nuwohkiga, namnihten, nah kabiman mataytak adahan amnihswene pit. Tiyegem nah battukaw misakwa pivetun.

² Timapnaba nuviryepkawni; ataybiswanaba arimkanit namnihswan ta pit.

³ Mmanawa wakaymniki ku pariye parekwen in ba niyesriptenwa, keh nah kennesa kuwis arimkat miyaka.

⁴ Nah kewa madikte nerasbe ku pariye me miyarapmet. Kuwis nah biyukse madikte nudatni.

⁵ Nah tukuhpika hanpa gibetitkis miyaravye; nah kewa miyaravyebe haritapnevye ariku gimewkis, ku pariye pis miyehpigkis pis ka hiyak gikakkis hawata ku pariye pis ka mpithigkis akiw.

⁶ Pis padekwen atere arikut imewti, ta arikut miyokwiye mihadnene, misanapnene.

⁷ Nah ka aynsima kayah pidagoni awiyni ta nuvitit, hawata nah tavakan anavi pidatni.

⁸ Pis kehe nukagmadavu tukuhwebdi nuwhu. Igkis iveg numkanit akak asanka. Nah kewa pahavwi kamaxkabe ku pariye yuma isahptawka gidahan.

⁹ Nah hiyap mbeyne ka aynsima kuwis, keh kabahte nah ka hiyap akiw. Kiyavwiye Uhokri, mpuse hewkevye nah amnihswene pit. Nah kannikasa nuwakuh pimkanit akak piriyepkawka.

¹⁰ Mmah pis kehkinek annut gidahankis miyaravye? Mmah igkis kannikawkinek adahan kabayhap?

¹¹ Mmah ku aysaw igkis ayge ariku imewti igkis awnakinek amin pamnihra? Mmah igkis awnakinek ku pis ka kinisakti?

¹² Mmah ayge abet amisnavye hiyapkankinek annut ku pariye pis keh? Mmah ayge avit inere waxri miyehkare ik adahan pis hiyapka ku pisnewa waditka akivara?

¹³ Kiyavwiye Uhokri, inneki keh nah kannuhpi kuri adahan amnihswene pit; mpuse hawkanawa nah piriyepkaw ta pit ku samah nah ivegnete.

¹⁴ Mmahki pis tukuhpen? Mmahki pis ayemwe nuwhu?

¹⁵ Ku samah nutakwayewka nah avanenekwa abet wakaymniki hawata kaba nah miya. Nah mabipiye wew akak awiyka ku pariye pis hiyapkise nutuh.

¹⁶ Pidagoni akak pimabyan mpiye nuvitiw. Pikeryi nukakuh in pisenwe nukakuh.

¹⁷ Mataytak in kiyaraniwhun kewa akemnibe. In kiyaraniwhun muwapuw nanwew.

¹⁸ Pis kehe nukagmadavu ku pariye gibetkikis darihwak nukakuh gikakkis nuhumwayavu ayguhwebdi nuwhu. Kuri nukagmada amisnavye.