Sawmus 86 - Uhokri Gahegbetawni Nukune akak Sawmus

Amnihnan mmanawa nah ka kabimne

¹ Kiyavwiye Uhokri, timapnanuba hawata kaytwanaba nuwnuh, mmanawa nah ka kabimne. Nah ka aynsima muwaka pis parak abet nuhawkan.

² Amnihnan ariw miyaka, mmanawa nah kamaxwene pivitit! Henewatbaki, uya amnihun, mmanawa nah pibuk! Nah kamaxwa pivit.

³ Pis nuwohkiga. Uya amnihun, Kiyavwiye, mmanawa nah priyepkaw ta pit mataytak!

⁴ Kiyavwiye, keh pibuk giyakni batek, mmanawa ta pitnenwa nah iki nuhiyekemni.

⁵ Kiyavwiye, pisnewa kibeyne. Pis hawata bayahminakevutne. Pis kadahan ka aynsima pamnihra gikakkis ku pariye piriyepkewnevwi ta pit.

⁶ Kiyavwiye, timapnaba nuviryepkawni. Timapnaba namnihswan pit.

⁷ Abetnewa nuwakemni nah kabimen pit, mmanawa pisnewa kaytwa nubiman.

⁸ Yuma pahavwinema uhokri kema pisma, Kiyavwiye. Yuma pahavwinema hiya akehka ku pariye pis keh.

⁹ Madikte hiyegviyenevwi ku pariye pikehavan aytanek pivetunatnek, igkis paberetusawnek pitivut. Igkis kabayhanek ini pikiytani.

¹⁰ Mmanawa pis ka pidatnisima, pis keh barewyevwinenwa annut. Pisnewa Uhokri pahavwiwa.

¹¹ Kiyavwiye Uhokri, uya kannuhun amin ku pariye pimawkan nah keh. Nahme ihpanek madikte piwn akak nukamaxwan. Uya kannuhun wew pikak akak madikte nubetki.

¹² Kiyavwiye nuwohkiga, nah kabayhapnek avititak nuyakni. Hawata nah kinetihwanek avanenekwa amin pikiytani.

¹³ Pis ka aynsima pamnihra nukakuh! Pis ka isaksa nah muhuk ta miyakamnawit.

¹⁴ Kiyavwiye, nah me kamaxwikamet gavitkis neras hiyegviyenevwi kawantiyavye. Pahabu awaykemni mbayavye igkis aharit nuwmepten, hiyegviyenevwi ku pariye kane timepkere pak.

¹⁵ Heneme pis, Kiyavwiye, pis amnihka ahawkri. Pis ka aynsima pamnihra hawata ka piyaknisima. Pis hawata kibeyne, pis ka kinisakatruvyema.

¹⁶ Ivegnaba numkanit akiw hawata uya amnihun! Iki pidatni nuvitit, uya amnihun, mmanawa nah wew kabayntiwa pikak hawata ku samah nnaguh wew pikak!

¹⁷ Kiyavwiye Uhokri, uya akka nutuh pahat arakak pabay! Nikwe ku pariye namiyhetnivwi igkis marekevwebdinek ku aysaw igkis hiyapnek ku pis ay nukakuh nayavetni hawata pis naydhaptiten.