Sawmus 85 - Uhokri Gahegbetawni Nukune akak Sawmus

Bayahminawnaba ariw utaraksan pahaynewata akiw

¹ Kiyavwiye Uhokri, pis ka pabaysima akak pihiyegavu avitnenevwi piwaxig Izhaewyamnaw. Kiberevut pis wiwhpigkis giwakutakis givetunyavukis, pis diyuhkise gawaygikis akiw.

² Avim ini pis bayahminevgikis ariw gitaraksankis. Pis ka iveganaw arit gihiyekemnikis amebyemni akiw.

³ Kibeyne pis madikte madagonihwe gikakkis. Pis ka aritnema ariw ini pidagoni ku pariye kane ahawnasima kene tiketbe ku pariye keh pis isakse uvetunyavu matakaw.

⁴ Hiyaksa kurime usuh tarakse pikak akiw. Inneki keh usuh kayah ke wotbe pis yumabe ay ukakuh. Usuh kadni piharit. Kiyavwiye Uhokri, wamnihten, diyuhkisnaba wawaygi akiw. Ka ba tiviknenema kanaktin ukakuh usuh pihiyegavu.

⁵ Mmah kurima pis dagawne wotuh avavyekwa? Mmah ini pidagoni ka mpiya akiw?

⁶ Diyuhkisnaba wawaygi akiw. Ku pis keh hene, usuhme pihiyegavu, usuh bateknek uminuh ka aynsima pidahan.

⁷ Kiyavwiye Uhokri, akkanaba wotuh in pibetki ukakuh. Uya amnih usuh pahaynewata akiw.

⁸ Kuri nah timap Kiyavwiye Uhokri giwn ku pariye ig awna. Kibeyne, ig awna ka sam. Ig ikaksa kabayka akak pasamraki ta wotwiy, wixwiy gihiyegavu, pahaynewata akiw. Heneme amawka ku wixwiy ka diyuh amin uhiyekemniwiy adahan mahayakemniki akiw.

⁹ Henewatbaki ig Kiyavwiye Uhokri ahegbetnenekwa adahan gamnihtenkis neras ku pariye kiyathenevwi giw kahadbe inme gabay misakwa aynewa avit uwaxigwiy.

¹⁰ Ayge nikwe batekka akak kamaxwaki in patiptaknek pawtak. Waditka akak pasamraka in atakaknek pawtak.

¹¹ Hiyeg gikamaxwankis aymuhwanek avit pahatte waxri. Igme Kiyavwiye Uhokri, waditka akivara, ig ivegnek inuriktak akak gibetki.

¹² Kibeyne, Kiyavwiye Uhokri ikinek wotwiy ku pariye kibeyne. Inme uwaxigwiy aymwahnek madikte amutrivyene.

¹³ Waditka wewnek gavitkigempi Kiyavwiye Uhokri. In ahegbetanek ahin adahan wixwiyme wew gihavu butte.