Sawmus 84 - Uhokri Gahegbetawni Nukune akak Sawmus

Nah kadni aharit Uhokri givin

¹ Kiyavwiye Uhokri Detye, nah ka nubetkisima akak piwskekri!

² Nah ka aynsima aharitkere nah aynte ariku pivin! Nah ka aynsima kadni aharit Uhokri givin ahigwibdi. Akak madikte nuvituh abet madikte nuhiyekemni nah darihwekere pikak, pis Kiyavwiye Uhokri Dehetniye.

³ Iveg ku samah egkis uhokrivgayan ku pariye kane hiyak hawkri, egkis misakwa ayge ariku pivin. Egkis uti guwetrikis ayge adahan kehnos gubkis adahan aymuhnokis gukamkayhkis. Nahkata hiyeg akiw? Kibeyne, Kiyavwiye Detye nukivara, nuwohkiga, nah ik adahan misakwa ayge pikak hawata.

⁴ Neras ku pariye misekwenevwi ayge pivinwa ka aynsima batekanek ay gimunkis. Igkis avanenekwa peknenekwa avat adahan kabeyhene piw.

⁵ Ka aynsima batekanek hawata ay gimunkis neras ku pariye iwenevwi giwaygikis piwntak, ku pariye mpiksewnevwi wew avigku pihina waditye avititakwa giyaknikis.

⁶ Ku aysaw igkis mpiya abetiw mbeyne, tihaki, ka sam. In wageswanek adahan kabayka hawata batekka gidahankis. Ini gikantakkis wageswanek kewa muwok waykempiyebe adahan ewkne kabayka, in kehne ivuriti bakwa.

⁷ Avim ini ku aysaw igkis tiviknene iwene gawaygikis, gidatnikis wagehnene akiw, he ku aysaw igkis danuhnek ta givetunat Kiyavwiye Uhokri.

⁸ Kiyavwiye Uhokri Detye, timapnaba nuviryepkawni! Pis ku pariye amekene Jakó giwohkiga, ataybiswanaba numkanit!

⁹ Kiyavwiye Uhokri, pisnewa umaptenten, numawkan wis hiyavak pahepkatak aynte pivinwa mmanawa nah pikanyan ku pariye pimihan adahan nah darihwekne pikak.

¹⁰ Nutuh in kabayte nah mpiyasa pahaywowa hawkri ayge pimun, mpinekata nah aynte mpiyasene kibite hawkri amun nawenyewa iwetrit. Wake nah ka ikbe adahan nah parak givinekut nuwohkiga, ka samkam nutuh nah he tabir ayge anumeku pareket givin, mpinekata nah aynte givinekukis hiyeg mbayavye adahan nah misakwa ayge gikakkis abet igiska.

¹¹ Kibeyne, ig Kiyavwiye Uhokri ig kewa kamuwbe udahanwiy. Ig hawata umaptentenwiy. Ig iki gabay akak gikiytani uvititwiy. Ig keh yuma pahatnama kabayka muwekne gitkis ku pariye wewnevwi avigku gihiyekemni.

¹² Usuh kabayhap, Kiyavwiye Uhokri Detye, mmanawa ka ba aynsima kabayka ay gidahankis hiyeg ku pariye kamaxwenevwi pivitit!