Sawmus 83 - Uhokri Gahegbetawni Nukune akak Sawmus

Kiyavwiye, matakanaba uvetunyavu!

¹ Kiyavwiye Uhokri, ka ba misakwa tinwonama! Ka ba sabubiynama, ine kawnata misakwa pahayriknema!

² Iveg! Pivetunyavu ka aynsima dakuhwebdi. Igkisme neras ku pariye pamiyhetnivwi igkis ka aynsima dagawnebdi.

³ Igkis ahegbetewnekis mownye gitivutkis pihiyegavu. Igkis ahegbetenekis ginetnikis pawtak adahan igkis pisenwevye ukakuh usuh pikanyanvu.

⁴ Igkis awna: “Ba yi ayta! Uyay pisenwe gikakkis neras izhaewyenevwi kahadbe giwkis miyehpika adahan avanenekwa.”

⁵ Igkis pivetunyavu kuwis tuguhkis gihiyekemnikis hehpekuye amin gahegbetawnikis; ignes ku pariye ahegbetewnevwi pitivut igkis neras hiyegviyenevwi ku pariye misakwa ay ayaranwa uwaxig, igkis neras

⁶ hiyegviyenevwi ariwntak Edohmnaw gikakkis neras Izmayew gihiwhivwi; hiyegviyenevwi ariwntak Moabimnaw gikakkis neras hiyeg agariyenevwi;

⁷ hiyegviyenvwi ariwntak Jebaw, Amoh hawata Amaleki, ariwntak Filisteya akak Tiro.

⁸ Hawata neras asiriyenevwi pahadguhwe ta gibetitkis, igkis ku pariye kene gidatnikisbe neras amohyenevwi gikakkis neras moabyenevwi, ku pariye Ló gihiwhivwi.

⁹ Kiyavwiye, kehnaba gikakkis ku samah pis kuwis kehe gikakkis midiyahyenevwi, ku samah pis kehe gikak Sízera hawata gikak Jabih aynte amun warik Kizoh;

¹⁰ ku samah pis matekevgikis aynte avit Endor, givitkisme madikte busipdip amadga wayk.

¹¹ Kehnaba gikakkis gisuwtatavukis gikivarakis ku samah minikwak pis kehe gikak Orebi hawata gikak Zeebi; pisenwanaba gikakkis madikte giwewkistenvukis, ku samah pis pisenwe gikak Zeba hawata gikak Sawmuna.

¹² Mmanawa igkis ba gibetkikis awna: “Uyay misekwe akak izhaewyenevwi giwaxigkis, ku pariye Uhokri giwaxig.”

¹³ Kiyavwiye nuwohkiga, pekebdihe neras hiyeg kewa atabdabnibe, kewa ahamnabe bohka avit kamaygviye piyawakad!

¹⁴ Ku samah tiket bukah ahavwi, in wew akiw danuhte avitit waxribdi imuwadnene,

¹⁵ haraksepnigkis akak pimayga kane ahawnasima, keh igkis avis ka aynsima abohri pimarino.

¹⁶ Kiyavwiye Uhokri, keh igkis kayah ka aynsima maraki adahan hene igkis hiyak ku pisnewa detye.

¹⁷ Keh igkis hahwa! Keh igkis maraka givitkis adahan avanenekwa he igkis miyavap!

¹⁸ Keh igkis hiyak ku pisnenwa Kiyavwiye Uhokri inurikyene, pis kumaduka pahatte waxri!