Sawmus 81 - Uhokri Gahegbetawni Nukune akak Sawmus

Avatman adahan fet

¹ Paknay akak batekka git Kiyavwiye Uhokri, umaptentenwiy! Paknay adahan kabeyhene Jakó giwohkiga!

² Kavusanay agigman! Tesnay sabug! Tesnay agigman akak batekka akak egu hebek!

³ Agighanay tohompet adahan fet abetnewa kayg asirihgit hawata abetnewa kayg ameremnit!

⁴ Henewatbaki ig Kiyavwiye Uhokri, Jakó giwohkiga, gikiswanawni gidahankis izhaewyenevwi.

⁵ Ig kehe inin kewa pahat hiyekemnikibe gidahankis izhaewyenevwi abetnewa ig giwiwhpitnikis avititak Ejitumnaw. Ayge nikwe nah timap pahat ikuvimnat awna, ku pariye nah kane timapti, in awna:

⁶ “Nah wiwhe yiduhyamadgatak awiyka kane awiynisima. Nah kehe yis isahptaw ariw hiyuhwaki awiyka.

⁷ Abetnewa yis wakaymniye, yis amnihswe nutuh. Nahme amnihpey. Ayteke nah kaytwe yiwn aytontak ku kiney nah ayemewnene abet kamaygviye, kewa digidgiyebe, aynte avit waxri Sinay. Hawata aynte amun unihmna kewye Meribá, nah hawata ekke yit ku nahnewa ay yikak ku aysaw yis aharitne un.”

⁸ Nuhiyegavu, timapnabay nuhiyekemni! Yis Izhaewyenevwi, nah ka aynsima muwaka yis timap nuwnuh!

⁹ Nah ka muwaka pahaynema yis wew gihavu pahavwi uhokri nawwotunye. Kawnata nah muwaka yis kawohkigahaw git pahavwinema uhokri ku pariye kane nahma Uhokri.

¹⁰ Nahnewa yiwohiga, ku pariye yiwiwhpitni avititak waxri Ejitumnaw. Wokanay yibiy, nahme ikavyi!”

¹¹ Heneme nuhuyegavu ka timepkere nuwnuh; neras izhaewyenevwi ka ihpa nuwnuh.

¹² Nikwe nah isaksevgikis wew avigku gihiyekemnikis mbeyevyenenwa. Nah isaksevgikis keh ku pariye gimawkankis.

¹³ Nahme nuvewkan nah aharit nuhiyegavu timap nuwnuh! Nuvewkan nah aharit izhaewyenevwi ihpa nuwnuh!

¹⁴ Wake igkis ihpene nuwnuhbe nikwe nah pisenwekam kibehtenwa gikakkis givetunyavukis. Nah hiyapkiskam gitkis madikte givetunyavukis.

¹⁵ Ignesme ku pariye namiyhetnivwi igkis mabukwakam nuvetunat. Inere mbeyne ku pariye nah hiyapkiskam gitkis in dahwakam adahan avanenekwa.

¹⁶ Yitmekam nah ikikam fahin pi kabaytenene. Nah ikavyikam akak ahayak anunu amatmadgene, yisme axkam kabihribdave.”