Sawmus 80 - Uhokri Gahegbetawni Nukune akak Sawmus

Piriyepkawka adahan ayepne kabayka gidahankis izhaewyenevwi

¹ Kiyavwiye Uhokri, timapnaba wownuh, pis ku pariye avuriwkerevutne gidahankis izhaewyenevwi, pis ku pariye huwithene pimuwtohravu, pis ku pariye betnene ayge givitminkis ignes ahj kegubih.

² Uya amnih pihiyegavu efrayhyenevwi, benjamihyenevwi hawata manasesyenevwi! Hiyapkis pidatni wotuh. Ba ayta amnih usuh.

³ Kiyavwiye Uhokri, kehnaba usuh diyuh udukwenit akiw. Uya amnih usuh, kahadbe usuh ka matak gitkis uvetunyavu.

⁴ Kiyavwiye Uhokri Detye, aysawhki ayivwi pis misakwanek dagawnaw arit pihiyegavu giviryepkawnikis?

⁵ Pis ike wotuh ukantak awenyan bugut adahan waxni, hawata uhiyvan mbeyne awenyan win adahan uhigvan.

⁶ Pis isaksa hiyeg nawwotunyevwi kerye aharitne uwaxig. Igkis uvetunyavu mahivwihak uminuh.

⁷ Kiyavwiye Uhokri Detye, kehnaba usuh kannikaw akiw. Uya amnih usuh, kahadbe usuh ka matak gitkis uvetunyavu.

⁸ Pis aytwe akak pahakti amutri Ejitumnawtak, neras pihiyegavu izhaewyenevwi. Eg amutri gubetki wagahpewa ah. Hawata pis tukuhave nawenyevwi hiyegviyenevwi avititak giwaxigkis, adahan pis mutuhpiye nor amutri atere gidukwenavrikkis.

⁹ Pis ahegbete waxri gudahan, ku kiney gusiwabet mutuhwe ta waykikut. Inme gutawnibdi ibekhew pahatte waxri.

¹⁰ He eg awaste waxribdi imuwadminene akak ganmap. Gutawnibdi tarekwe avitminew ahpiyanovwi magawgavyano nopsadminano.

¹¹ Guhinanyu aymuhwe danuhte arit parahwokwa Meditehanyu, hawata danuhte arit warik Ewfrates.

¹² Mmahki pis higohkise guyaranwa? Kuri hiyeg ku pariye mpiya guhumwew ik adahan matis hawata amevwi uva guvewitak.

¹³ Pakir ahavwikunevwi ka aynsima sibuhbetevgu. Igkis madikte mehbetevgu. Igkisme puwikne kamabyanavye ka aynsima axbetevgu.

¹⁴ Kiyavwiye Uhokri Detye, diyuhnaba uminuh! Iveg womkanit inuriktak. Ba ayta amnih usuh pamutravwi.

¹⁵ Ba ayta amnih noras pamutravwi ku pariye piswa mutuhe. Noras gutawnibdi ku pariye pis kehe egkis aymuhwa nopsadmin kuwis.

¹⁶ Igkis uvetunyavu ihukevgu. Igkis bukehpig. Abet pidagoni, ivegnaba gimkanitkis, pisenwa gikakkis neras hiyeg.

¹⁷ Avuriwnaba hawata bayahnaba neras hiyeg pikanyanvu, neras hiyegviyenvwi ku pariye pis kehe igkis aymuhwe ka aynsima.

¹⁸ Usuh ka ayguhwanek piw akiw. Avuriwnaba waymuhwan, kahadbe usuhme kabayhapnek.

¹⁹ Kiyavwiye Uhokri Detye, kehnaba usuh kannikaw akiw! Uya amnih usuh, kahadbe usuh ka matak gitkis uvetunyavu.