Sawmus 8 - Uhokri Gahegbetawni Nukune akak Sawmus

Uhokri kumadukasa inin hawkri gitkis hiyeg

¹ Kiyavwiye, pisnewa uwohkigah. Pisnewa ka pikiytanisima. Piw kabayhaka muwapuw amadga hawkri. In kabayhaka hawata aynte inurik.

² Pis keh bakimnayh nopsanyovwinene ignes kabayhap kabayntiwa payak gikakkis bakimnayh nukuvesniyevwi. Pivetunyavu ka hiya gisamanakkis. Madikte hiyeg ku pariye kavetunsap, ignes misakwa tinwovu gitivutkis.

³ Ku aysaw nah sarayh nuvegi inurikut arimkat en ku pariye pikehni, nah hiyap kayg akak warukmebdi, ku kiney pis sarayhpigkis amun mpuse giwetrikis. Nah bawkiswa, nah awna:

⁴ Kiyavwiye Uhokri, pariyeki hiyeg ta pit, ku pariye amadgaya inin, adahan pis kiyegi hene? Ig amadgaya inin, ig ka ariknawnama adahan pis iki pihiyekemni ta git.

⁵ Heneme, kibeyne, pis ike git ka aynsima gannu, ka aynsima gikiytani. Pis kehe gikiytani warikapte aynesa ariw ahj gikiytanikis.

⁶ Pis ike git gidatni adahan ig kumadukene madikte ku pariye pikehavan; pis kumadukase git madikte ariknebdi:

⁷ muwtohviyene payak akak pakviyene hawata akak puwiknebdi ahavwikune akiw;

⁸ kuhivrebdi payak akak im, akak madikte ku pariye misekwenevwi parahwokwa akiw, pis ike madikte giwakurit.

⁹ Kiyavwiye, uwohkiga, pisnewa ka pikiytanisima. Piw kabayhaka muwapuw amadga hawkri.