Sawmus 78 - Uhokri Gahegbetawni Nukune akak Sawmus

Uhokri akak gihiyegavu

¹ Nuhiyegavu, timapnabay nukannuhakni hawata avuriwnabay ku pariye nuwnuh yit.

² Mmanawa kuri nah awnene yikak, heneme nah ekkene yit hiyakemniki ku pariye ayemewnene minikwak.

³ In hiyakemniki ku pariye usuh kannuhwa nimin, ku pariye usuh timap wahawkrivwi awna wotuh amin.

⁴ Ka hiya usuhma ayamni giwkis ukamkayuvwi. Heneme amawka usuh kinetihwa gitkis adahan igkisme mpiyasin gitkis uhiwhivwi amin Kiyavwiye Uhokri gidatni, amin ku pariye ig keh akak gidatni hawata amin arikna barewyevwi gikehavan akiw.

⁵ Ig Kiyavwiye ike gikumadukan gitkis izhaewyenevwi hawata kumadukaki gitkis Jakó gihiwhivwi. Ig ikiswanew gidahankis wahawkrivwi adahan igkisme kannuh gikamkayuvwikis amin ini gikumadukan.

⁶ Adahan gihiwhivwikis kannuhwa nimin adahan igkisme hawata kannuh gikamkayuvwikis nimin.

⁷ Hene igkis hawata ikinek gamaxwankis givitit Kiyavwiye Uhokri. Igkis ka miyehtinek ini gannu ku pariye ig kehe. Hawata adahan igkisme ihpanek avanenekwa ini gikumadukan.

⁸ Adahan igkis ka kema gahawkrivwikismanek, pahabu hiyegviyenevwi datwonavye, meksatruvye, ku pariye ka pahaynama iki gikamaxwankis givitit Kiyavwiye Uhokri. Igkis kawnata humaw ihpatrunema giwn.

⁹ Ignes awaykemni giwntakkis efrayhyenevwi, igkis kiyakwokmine akak gimedgakis hawata akak giyakakis, hiyaksa igkisnewa bisikbet abetnewa hawkri adahan kerka.

¹⁰ Ignes izhaewyenevwi ka keh ku samah gikaksankis ku pariye Kiyavwiye Uhokri kehe gikakkis hawata igkis kawnata ihpekere gikumadukan.

¹¹ Igkis miyehave madikte annutviyene ku pariye ig kehave ay givetunkis.

¹² Pitatye ay givetunkis gahawkrivwikis, Kiyavwiye Uhokri hiyapkise gannu ay amadga amat Zoah, aynte avit waxri Ejitumnaw.

¹³ Ayteke Kiyavwiye Uhokri ibekhe parahwokwa. Ig kehe ignes izhaewyenevwi manuke niyegbiw. Ig kehe un kannikaw in misakwa kewa iyaranwatbe.

¹⁴ Abetnewa puwivak ig huwithigkis akak pahat ukuhne. Abetme tiyegem ig wewkisgikis abetiw ini kene pahat tiketbe abutni.

¹⁵ Aynte amadga amatap ig beke tip ig ike ka aynsima un gitkis gihiyegavu, un wayhpitekne.

¹⁶ Ig kehe un ariwtyak pes guvititak tip. Un suke kewa avigku pahatra warikbe.

¹⁷ Igkisme wahawkrivwi tiviknene kehnene patahwaki gitivut Kiyavwiye Uhokri. Igkis dagawnebdi git Kiyavwiye Uhokri inurikyene ayge amadga amatap.

¹⁸ Igkiswa gimawkankis hikekere Kiyavwiye Uhokri. Igkis ayep git gimanakis ku pariye gimawkankis.

¹⁹ Igkis awna gimin. Giwnkis: “Mmah Kiyavwiye Uhokri ik adahan iki wotwiy umanawiy ay amadga amatap?

²⁰ Inyewa ig beke tip, un kavusa suka ayteke kewa warikbe. Heneme mmah ik adahan ig iki wotwiy bugut? Mmah ik adahan ig iki ihti gitkis gihiyegavu?”

²¹ Ku aysaw ig Kiyavwiye Uhokri timep inakni giwnkis, ig dagawne ka aynsima gitkis. Ig awahkise tiket giminkis gihiyegavu. Hawata gidagoni kihawnehwe gikakkis akiw.

²² Mmanawa igkis ka kamaxwa givitit. Igkis kawnata ihpa ku ignewa ik adahan amnihgikis.

²³ Hiyawa madikte ini gihiyekemnikis hene, Kiyavwiye Uhokri wokase inurik gidahankis.

²⁴ Ig ike gitkis gihiyegavu bugut inurikyene. Ig kehe ini maná tuguhe inuriktak adahan gaxnikis.

²⁵ Hene igkis axe ini anj gibugutakis. Kiyavwiye Uhokri ike gitkis axka, ka muwakti.

²⁶ Ayteke nikwe ig kehe kamaygviye uvuvukwa wahamavriktak. Akak gidatni ig sagehe mayg tiwrikavrikut.

²⁷ Ig kehe kuhivra tuguhbetwikis gibetitkis hiyegviyene, ke ukuhnebe dehwene akak ahewra. Akeban ke kayhbe parawkigbi.

²⁸ Egkis tuguhbetwikis abetiw givinbetkis, aranwew ku kiney igkis misakwa.

²⁹ Nikwe ignes izhaewyenevwi axbetkis kabihribdave, mmanawa Kiyavwiye Uhokri ike madikte gitkis ku pariye gimawkankis.

³⁰ Heneme, abetnewa igkis axempiye, avit igkis kabihribdi,

³¹ Ig Kiyavwiye Uhokri dagawnew gitkis. Ig umahave awaykemni ku pariye detyevwiwatnene, takwevyegben kabaytenene gibetkis izhaewyenevwi.

³² Ayteke ariwnteke ini annutviyene, hiyegviyenevwi adukwenewa kehnene taraksaki hawata igkis ka ihpa Kiyavwiye Uhokri giwn.

³³ Ig Kiyavwiye Uhokri hiyapni hene, ig pisenwe gikakkis, ig keh gidehetnikis kewa puhkabe, kewa pahaye adahan mbeyne danuhpiyebe gitkis.

³⁴ Heneme, ku aysaw Kiyavwiye Uhokri umehbete gaytakkis, igkisme nawenyevwi gaytakkis diyuhe gimkanit. Igkis kayehe gitaraksankis, igkis piriyepkew inyewa git Kiyavwiye Uhokri.

³⁵ Nikwe igkis kiyemina ku Kiyavwiye Uhokri ignewa gimaptentenkis. Hawata Kiyavwiye Uhokri inurikyene ignewa gamnihtenkis.

³⁶ Heneme madikte giwnkis in he wasaymkanenwa. Hawata madikte ku pariye igkis awna in adahanenwa kinisaka.

³⁷ Giyaknikis ka inyewatma gikak Kiyavwiye Uhokri. Hawata igkis ka kamaxwenewatma avitit ku pariye Kiyavwiye Uhokri gahegbetawni gikakkis.

³⁸ Igme Kiyavwiye Uhokri ka gamnihrasima gikakkis gihiyegavu. Ig ka pisenwa gikakkis, heneme ig bayahminevgikis ariw givathawnikis. Inpawa ig miniw ariw gidagoni, ig mihawnehe gimabyan.

³⁹ Ig kiye ku igkis ka dep miya, igkis kewa paha maygbe ku pariye mpiyevye in ka diyuh akiw.

⁴⁰ Ka pahaywowatma igkis suguh Kiyavwiye Uhokri ayge amadga amatap, igkis keh ig bawkiswa gidahankis.

⁴¹ Kiberevut igkis keh gidagoni, igkis wakaymnisa izhaewyenevwi giwohkigakis barewvitye.

⁴² Igkis miyehe ku ig ka gidatnisima. Hawata igkis miyehe hawkri ku kabet ig amnihpikis giwkis givetunyavukis.

⁴³ Igkis miyehe barewyevwi arikna hawata annut ku pariye ig kehe ayge amadga amatap Zoah, avit Ejitumnaw.

⁴⁴ Ig kehe warik wageswa migat. Hiyeg ejituyenevwi yuma giwnrakis adahan gihigvankis.

⁴⁵ Ig awahkise ka aynsima tagep giminkis adahan giyakteptenkis, hawata ka aynsima tivuw, ku pariye pasenwe akak madikte giwasrakis payak akak givinkis.

⁴⁶ Hawata ig awahkise tananviyene adahan axwiye gahakavwikis adahan mehpiye gamutravwikis.

⁴⁷ Akak muwok tiphawnene ig pisenwe akak gamutravwikis uvavu, hawata akakme huweg, gamutravwikis figuvu.

⁴⁸ Givigvukis pak akak muwtoh hawata miyarap awaku muwok tiphawnene akak ugugune.

⁴⁹ Ig ka samanaw gikakkis, ig pisenwe gikakkis akak madikte gimabyan hawata akak gidagoni kane ahawnasima, ku pariye aytwebdi gitkis kewa miyaka avitkiyabe.

⁵⁰ Gidagoni ka misakwa. Ig kawnata ikisgikis ivegnema, heneme ig umahavevgikis akak arakambet huwivwihka.

⁵¹ Ariku mpuse payt, ay avit Ejitumnaw, Kiyavwiye Uhokri umahave madikte ikamkaytivyene egutyevwi.

⁵² Ayteke nikwe, kewa pahavwi muwtohvutnebe, ig wewkise gihiyegavu izhaewyenevwi piyawakad ariw Ejitumnaw. Hawata ig huwithevgikis amadgew amatap.

⁵³ Ig huwithevgikis akak avuriwka. Igkisme ka avis. Inme parahwokwa awaste givetunyavukis.

⁵⁴ Ig Kiyavwiye Uhokri waxwe gihiyegavu tahan avitit giwaxig barewvitye, arimkanit waxri imuwadnene ku pariye igwa ahegbete akak gidatni.

⁵⁵ Ig Kiyavwiye Uhokri ivukave neras ku pariye misekwenevwi avit inin waxri. Igkisme gihiyegavu pareke atan. Ayteke ig ibekhe waxri gitkis mpuse hiyegviyenevwi Izhaew gihiwhivwi. Hawata ig kehe ignes izhaewyenevwi misekwebdi akak givinkis neras ku pariye pitatyevwi misekwenevwi ayge.

⁵⁶ Heneme ignes izhaewyenevwi adukwenewa kavetunsenene Kiyavwiye Uhokri inurikyene. Igkis suguhpig. Igkis ka ihpa gikumadukan.

⁵⁷ Igkis ka kibeynevwima hiyeg. Igkis karatunaw hawata kewa gigkisbe. Ka gikinsavyekisima akak mownyahaki kewa yakotbe haviska akak pahat imedgit ku pariye kidubetnene.

⁵⁸ Igkis kehe gidagoni akak gidahankis kakankewket kane Uhokrima gidahan. Hawata akak ahehpaktivyene bataka igkis kehe ig atihpak.

⁵⁹ Ku aysaw ig Kiyavwiye Uhokri hiyegvikis hene ig dagawne gitkis. Ig ka muwaka gihiyegavu akiw.

⁶⁰ Ig ikise givinbet barewvitye ayge avit Siló. Ini payt ku kiney ig misekwe gibetkis awaykemni.

⁶¹ Ig isakse givetunyavukis iwe egu kiyes adahan gahegbetawnikis. Egu areketni gidatnikis akak gikiytanikis.

⁶² Henewa ig dagawne gitkis gihiyegavu. Ig isakse igkis umahavepka gavitkis givetunyavukis.

⁶³ Takwevyegben miyarap abet kerka. Egkisme himanoviyogben yuma kakak egkis maripkaw.

⁶⁴ Muwvegviyenevwi umahavepka akak iwan, egkisme gidahankis madankunovwi ka hiyap egkisma tih giharitkis.

⁶⁵ Ayteke nikwe ig Kiyavwiye Uhokri wadise ke wotbe ariwntakbe isevwa. Ig kewa pahavwi awaygbe detye ku pariye kabiman padaptihwavwi awaku win.

⁶⁶ Ig kehe givetunyavu bisikbetwikis. Igkis hahwa. Igkis marekepka adahan avanenekwa.

⁶⁷ Ig tukuhe José gihiwhivwi ariw giwewkisnikis gihiyegavu. Ig ka kaniy akiw giwntakkis Efrayh gihiyegavu.

⁶⁸ Gidukwenavrikkis ig kaniye Judá gihiyegavu, ini waxri Siyawh ku pariye ka gibetkisima nikak.

⁶⁹ Ayge ig kehe giwskeki nivitmin. Ig kehni hawata nidahwan kewa inurikbe, kewa waxribe, in dahwa adahan avanenekwa.

⁷⁰ Nikwe ig Kiyavwiye Uhokri kaniye gibuk Davi. Ig wiwhpig arikutak muwtoh ayahri.

⁷¹ Abetnewa ig avuriwne givigvu muwtoh. Ig keh ig humaw izhaewyenevwi gikivarakis, gikavriwtenkis Kiyavwiye Uhokri gihiyegavu gikanyanvu.

⁷² Davi avuriwvigkis akak kabayka. Hawata ig huwithevrikis akak madikte hiyakemniki.