Sawmus 73 - Uhokri Gahegbetawni Nukune akak Sawmus

In waditnevyene wis kaminwaptih hiyeg

¹ Kiyavwiye Uhokri ig inyewa kibeyne gikakkis gihiyegavu izhaewyenevwi. Ig kibeynewa gikakkis gihiyegavu ku pariye barewbetyevwi gihiyekemnikis.

² Nahme kaba patehe nuhiyekemni waditnevyenen. Nah ikawvari ke pahavwibe hiyeg ku pariye kaba tuguhkam abetit ibug. Hawata nah kabahte hene.

³ Mmanawa nah hiyap hiyeg ku pariye kane kumadukasewkere git Kiyavwiye Uhokri, igkis mbeyevye gihiyekemnikis, heneme igkis uti ka aynsima kabayka ay amadga hawkri. Nah hiyapni hene nah kaminwaptihpigkis.

⁴ Igkis yuma wakaymniki ay gimunkis. Igkis ayhmadave garudikis. Igkis makniwbetave.

⁵ Igkis ka muwaka battukaw adahan givitkis. Igkis ka hiyap mbeyne kema giyakikisma hiyeg gihiyvankis mbeyne.

⁶ Gitkis igkis kabayte giwkis nawenyevwi hiyeg. Igkis keh giwantikis akak garewhankis.

⁷ Giyaknikis kivunmadave akak mbayka. Gihiyekemnikisme ivegminenekwa hiyakemniki mbeyviyenenwa. Yuma hiyeg mpithigkis.

⁸ Igkis gibetkikis miyatha hiyeg. Igkis awna he mbaykanenwa. Giwnkis: “Nah pi datte piw. Nah hiyapkisnek pit.”

⁹ Igkis ikawvari hiyekemnite giw Kiyavwiye Uhokri inurikyene. Igkis kabukhaw gitkis hiyeg amadgayavu inin.

¹⁰ Igkisme Kiyavwiye Uhokri gihiyegavu hiyapni hene, igkis wakaymnibdi. Igkis kewa pahavwi hiyegbe ku pariye ay ahakwa un mihadnene, yuma ku kit ig kamaxwa, ig misakwa he awokhavwi.

¹¹ Igkis awna: Mmah Kiyavwiye Uhokri ka hiyaknima? Ig kane gidatnisima adahan ig hiyak gikakkis neras hiyeg. Mmah ig ka hiyak ku pariye gikehnikis?”

¹² Igkisme mbayavye ka kumadukasewkere git Kiyavwiye Uhokri. Igkis yuma arikna muwekne gitkis. Igkis kibihenene gewkanbetkis akiw.

¹³ Nah hiyapni hene, nah kabahte awna: “Mmeneki nutuh nah mpiksaw ikaw wadit? In waditnevyenen nah avuriw nuhiyekemni adahan nah ka patahwa.

¹⁴ Nah kuwis ikaw Uhokriyan, hiyaksa nah hiyepne mbeyne mataytak. Mpuse hewkevye nah hiyapkiska mbeyne nutuh akiw. Igkisme neras ku pariye mbeyevyenenwa gihiyakemikis igkis ikaka kabaykanenwa gitkis. Mmahki inere?”

¹⁵ Kiyavwiye, wake nah awnevyebe inakni hene, nah taraksasepkam pihiyegavu. Inneki keh nah sabuke nubiyu.

¹⁶ Nikwe nah mpiksew pukuhpin nuwnteknewa. Heneme in ka aynsima mahiko nudahan.

¹⁷ Ayteke nah pareke Kiyavwiye Uhokri givinekut. Ayge nikwe metakwa nah pukuhpin. Nah pukuhpe ku pariye danuhnek gitkis neras mbayavyenpu amaksemni hawkrinek. Igkis ka misakwa igisyevwi adahan avanenekwatma.

¹⁸ Igkis kewa pahavwi hiyegbe ku pariye waywe amin pah. Gitkis igkis waywe ayge kabayntiwa igkis ka kirih ayteke. Bawa ini givahnikis ka akikinisima. Henewatbaki pis kehnek igkis tuguhbetwikisnek arimkanit biyukwiki.

¹⁹ Pahaye adahan igkis pisenwepkanek gihawkankis akak mbeyevye mbeyne.

²⁰ Ini kabayka gidahankis ay amadga inin in mpiyenek kibehtenwa ke arisuntibe. Igkis miyehavepkanek hawata ku samah wis miyeh warisun ku aysaw hewke. Kiyavwiye, aysawnemenek ku aysaw pis kannikawnek pis miyehpigkisnek pahaye adahan.

²¹ Waditnevyenen nah ikiygikis ku igkis ka aynsima gibunugakis. Ka kiskama nah bawkiswa giminkis hene. Kuwewanek igkis biyukapnek akak madikte gibunugakis.

²² Kiyavwiye, nah ka ikwa adahan nah pukuhpap. Nah kewa puwiknebe yuma nuhiyekemni ta pivetunat.

²³ Heneme kibeyne, Kiyavwiye, nah kabunuga pikak. Mmanawa nah avanenekwa ay pimun. Pisme sumuhnan nuwakuh adahan nah ka kirih.

²⁴ Kibeyne, ku samah nah ay amadga inin pis huwitha nuhiyekemni akak pihiyekemni. Aysawnemenek aynte inurik pis amavannek akak madikte kabayka pivinekut ku kiney yuma aynesnima mbeyne, ku kiney barewkanenwa.

²⁵ Pisnewanek nudahewekten aynte inurik. Nikwe ku samah nah aytente ay amadga inin nah ka muwaka ariknawnama akiw. Ininewa numawkan adahan pisnewa nudahewekten ay.

²⁶ Hiyawa nah ka makniwbet ay amadga inin, hiyawa nihu akak nuhiyekemni mabimnebdip, heneme ka sam. Ignewa Kiyavwiye Uhokri nawayghetni. Kibeyne, ig nudahewekten adahan avanenekwa.

²⁷ Ignesme neras ku pariye piyawakadnene piw igkis biyukapnek. Pisme pisenwanek gihawkankis ignes ku pariye kane wewkere pikak.

²⁸ Nahme numawkan nah ka henema, numawkan nah kahwa kennesa git Kiyavwiye Uhokri adahan nah batekye ay gihumwa. Nah iki nukamaxwan givititnewa Kiyavwiye Uhokri. Inneki keh nah kinetihwa muwapuw amin madikte ini kabayka ku pariye gikehni.