Sawmus 72 - Uhokri Gahegbetawni Nukune akak Sawmus

Piriyepkawka gidahan ikivarat aytwenihpiye

¹ Kiyavwiye Uhokri, kannuhnaba ner ikivarat adahan ig hiyak akak hiyeg gitaraksankis avigkutavriknawa pihiyekemni waditye. Henewatbaki, kannuhnigba

² kahadbe ig hiyap pihiyegavu kabayntiwa hawata ig avuriw neras madiptavye akak waditka.

³ Kahadbe kadahan kabaykanenwa ay avit paytwempu hawata adahan hiyegviyenevwi hiyavak akak waditka.

⁴ Kahadbe ig ikivarat hiyak gikakkis madiptavye akak waditka. Hawata adahan ig ayava neras ku pariye kane aynsima muwaka gitkis. Hawata adahan ig misakkis neras ku pariye hiyapkisne mbeyne gitkis.

⁵ Kiyavwiye, amawka pihiyegavu kiyathap avanenekwa ku aysaw kamuw aytente ariku en, hawata kayg ayvarihte.

⁶ Kahadbe ner ikivarat wadisasa gihiyegavu gihiyekemnikis hawata ku samah muwok wadisasa wamutra ku aysaw in wayk.

⁷ Kahadbe wadityevwi gihawkankis kabayntiwa ku samah gayivwikis ay amadga inin, hawata gihiyekemnikis karisaw ku samah kayg gayivwi amadga en.

⁸ Gikumadukan danuhnek ariwntak pahambatak parahwokwa danuhte pahambatak akiw hawata in kavusa ariwntak warik Ewfrates danuhte amaksemni waxri.

⁹ Hiyeg ku pariye misakwa ayntehan amadga amatap mabukwanek givetunat, givetunyavume tuwatasawnek gitivut igkis mabukwanek gikihpurit abet wayk atabdabni.

¹⁰ Ikivaratviyenevwi ariwntak Espanhamnaw akak nopsanyuvwi kewgihribdi igkis kakanhawnek git. Hawata neras ariwntak Arabyamnaw akak Etiópyamnaw.

¹¹ Madikte ignes ikivaratviyenevwi mabukwanek givetunat. Hawata madikte hiyegviyenevwi amadga wayk kumadukasawnek git.

¹² Ig ikivarat amnihnek madiptavye ku pariye amnihswenevwi git. Hawata neras ku pariye muweknevwi gitkis ig ayavigkisnek.

¹³ Ig kayah gidahankis neras mabimnavye hawata neras ku pariye yumanene arikna gimunkis. Ig amnihgikis adahan igkis ka miyap.

¹⁴ Ig wiwhgikis ariw kinisaka hawata ariw arewhaki; gidehetnikis in ka avigasima git.

¹⁵ Kibeyne, ner ikivarat kis adahan ig dahwa ayivwad amadga inin! Ig kis adahan ig ikepka karukri wahano ariwntak Arabyamnaw! Ig kis adahan gihiyegavu piriyepkaw gidahan hewkevye adahan ig Kiyavwiye Uhokri sarayhnenekwa gabay givitit.

¹⁶ Kahadbe ka muwakti axka ay avit uwaxigwiy. Kahadbe uwaxigwiy misakwa awasvit akak amutribdi adahan egkis sarayhnos ka aynsima guwkis kewa aynte avitbe waxri Libanomnaw. Kahadbe paytwempuviyene misakwa kivunmadave akak hiyeg kewa pamatkabe hiyan amadga amatap.

¹⁷ Amawka ukivarawiy giw ka miyehkanti. Hawata adahan gikumadukan dahwa ku aysaw kamuw aytente. Hawata amawka madikte hiyegviyenevwi ayepnekuye kabayka git Kiyavwiye Uhokri adahan igme iki kabayka gitkis. Hawata ku samah ig ikinene kabayka git ikivarat.

¹⁸ Kabayhanay Kiyavwiye Uhokri, izhaewyenevwi giwohkigakis, mmanawa ignewa hiya akehka madikte ini annut barewye hene.

¹⁹ Kabayhanay avanenekwa ini giw kane nikiytanisima. Hawata adahan gikiytani kivunsa pahatte niyesri waxri. Henewatbaki! Henewatbaki!

²⁰ Ay pisenwa ini giviryepkawni Davi, ku pariye Jesse gikamkayh.