Sawmus 71 - Uhokri Gahegbetawni Nukune akak Sawmus

Giviryepkawni pahavwi kiyavarivye

¹ Kiyavwiye Uhokri, pisnewa ku kavit nah kamaxwa. Ka ba isaksa nah kayah maraki awaku ku samah nah hahwa.

² Uya parak abet nuhawkan kuri! Uya amnihun! Uya wiwhun abetitak ini mbeyne, mmanawa pisnewa waditye! Uya timapun!

³ Kiyavwiye Uhokri, uya humaw nayemwekri ku kit hiyeg ka hiya nusamanak. Uya humaw kewa paytbe nopsadnene adahan numaptenten. Pisnewa mpithan! Pisnewa avuriwhun!

⁴ Kiyavwiye nuwohkiga, uya wiwhun ariw ini mbeyne hawata ariw gidatnikis neras awaykemni arewhavye mahivwihkevutnevwi.

⁵ Kiyavwiye Uhokri, nuwohkiga, ta pivitit nah iki nukamaxwan. Ku samah nah takweyete nah kamaxwa ta pivitit.

⁶ Madikte ku samah nayivwi ay amadga hawkri nah amnihswene ta pit avanenekwa; pisme avuriwven ku samah ariwnteke nah amadga wayk. Nah kabayhap avanenekwa.

⁷ Nuhiyvan mbeyne amadga inin in humewvi kewa abekteybe gitkis hiyeg, mmanawa igkis ik adahan hiyap ku pisnewa detye numaptenten.

⁸ Hewkevye nah kabayhap, nah kinetihwa kiberevut amin pikiytani.

⁹ Nikwe ka ba tukuhpenuma kuri ku samah nah kuwis kiyaparivye. Ka ba ikiswenuma kuri ku samah nah ayipa mabimnevye.

¹⁰ Mmanawa nuvetunyavu muwaka nuwmepten. Igkis awna mbeye iwit numinuh. Hawata igkis ahegbeta ginetnikis adahan nuwmepten.

¹¹ Igkis awna: “Uhokri kuwis ikiswig. Uyay haraksevgi kuri adahan wixwiy kamaxwig, mmanawa yuma pahavwinema adahan gimaptenten akiw.”

¹² Kiyavwiye Uhokri, ka ba ayguhwa nuwhu! Nuwohkiga, paraknaba abet nuhawkan kuri!

¹³ Pisenwanaba gikakkis neras nuvetunyavu, kehnaba igkis biyukap igkis marepkepka ignes ku pariye muwaka nuwmepten.

¹⁴ Nahme numawkan avanenekwa nah ikinek nukamaxwan ta pivitit. Nah kabayhapnek avanenekwa akiwka akiwnek.

¹⁵ Nah akkanek ku pisnewa waditye. Mataytak nah awnanek amin pamnihakni hiyawa nah ka ik adahan pukuhpin.

¹⁶ Nah kabayhanek pidatni, Kiyavwiye nuwohkiga. Nah kinetihwanek amin ku samah pisnewa waditye, henewatbaki aminenwa pabay nah awnanek.

¹⁷ Pis kannuhpen ku samah nah bakimnite. Hawata kuviknene nah awnihnene amin ariknebdi barewyevwi ku pariye pikehavan.

¹⁸ Kurime nah kuwis kiyaparivye, nusemni hawata seye, ka ba tukuhpenuma, Kiyavwiye Uhokri! Misakwanaba nukakuh kuri akak inin ku aysaw nah ekkenete pidatni akak pikiytani gitkis neras hiyeg hawata gitkis gihiwhivwikis akiw.

¹⁹ Kiyavwiye Uhokri, ini waditka ku pariye pis kadahan in danuh tahan inurikut. Pis kehe ka aynsima ariknebdi. Yuma pahavwinema hiyeg kema pisma.

²⁰ Pis kehe nah mpiyasa ka aynsima wakaymniki, pis hiyapkise mbeyne nutuh. Heneme nah hiyak ku pis ikinek nudatni akiw, pis wiwhunnek ariw miyaka.

²¹ Pis keh nah kiyathakanek ka aynsima akiw. Hawata pis ikinek nudatni akiw.

²² Inyewa nah kabayhapnek akak hebek. Nuwohkiga, nah kabayhapnek awaku pisnewa ka kinisakti. Nah agighanek akak nagigni adahan kabeyhene piw, Kiyavwiye Barewvitye, izhaewyenevwi giwohkigakis.

²³ Nah paknek akak madikte nubetki ku aysaw nah agighene avat pidahan. Nah paknek akak madikte nudatni, mmanawa pisnewa amnihpen.

²⁴ Henewatbaki mataytak nah awnanek amin ku samah pisnewa waditka akivara, mmanawa ignes ku pariye aharitnevwi numetkepten igkis madikte hehwebdi, mmanawa pis pisenwe gikakkis.