Sawmus 68 - Uhokri Gahegbetawni Nukune akak Sawmus

Uhokri keh wis mataka madikte

¹ Kiyavwiye Uhokri, kannikawnaba, higihnaba neras pivetunyavu wavitkigtak! Kehnaba neras ku pariye pamiyhetnevwi igkis bisikbetwikis pavitkigtak.

² Uya mehbetigkis kewa sariyanbe mehwevye ta abetit mayg. Keh igkis mbayavye madik ta pivetunat kewa iytibe ta avetunat tiket.

³ Igkisme hiyeg ku pariye wadityevwi igkis batek giminkis ay pivetun, igkis peknes avat.

⁴ Henewatbaki. Paknay avat adahan kabeyhene Kiyavwiye Uhokri! Kabayhanay giw akak agigman. Ahegbetanay gihina ner ku pariye nehmnik betempi avitmin ukuhne, igi kewye Kiyavwiye Uhokri Dehetniye. Bateknay givetun.

⁵ Kibeyne, ig Kiyavwiye Uhokri inurikyene, arikutak givin kiyatye, ig avuriw ignes migenavye hawata ig mpithamni egnes madankunovwi.

⁶ Ig iki gitkis hiyeg tukuhkarempu paha payt adahan igkis misekwenes. Ig isahkis kamaxkarempu adahan igkis isahptaw adahan igkis batekyes giminkis. Heneme ku pariye kannikaw adahan kavetunsig igkis misakwanek aynte amun waxri ku kiney mihetnikinenwa.

⁷ Henewatbaki pis keh minikwak, Kiyavwiye, ku aysaw pis waxwe pihiyegavu avititak Ejitumnaw, ku aysaw pis wewkiswigkis amadgew amatap.

⁸ Avim ini hawkri waxri segke, en waykise ka aynsima muwok. He inwa waxri Sinay segke awaku Kiyavwiye Uhokri, izhaewyenevwi giwohkigakis, gaytni atere.

^9-10 Ayteke ariwnteke ini igkis pihiyegavu danuhe avitit ini piwaxig ku pariye pikan gitkis ku aysaw igkisme muweke gitkis. Ayge pis waykise ka aynsima muwok adahan nukunehne ini piwaxig ariw amabi. Kibeyne!

¹¹ Kiyavwiye, pis awna gitkis pihiyegavu adahan igkis mataka neras Kanaahyenevwi ayge. Henewa igkis matekevgikis. Muwapuw pihiyegavu gitinorakis ewke inin kibeyne inetit. Egkis awna:

¹² “Kibeyne, neras ikivaratviyenevwi payak gikakkis gisuwtatavukis igkis madikte bisikbetkis!” Ayteke nikwe egkis tinogben ibekhekbet amin ini igiska ku pariye guvetunyavukis ikise butte gihavukis. Egkis ka abetma ini kerka. Gannivwikis ininewa adahan avuriwnos guvigkis muwtoh ay guvinwakis.

¹³ Hiyaksa kuri gubereswankis kewa tukwabe, guhanpikis huwiyave. Egkis awasvit akak karukri wahano, hawata akak karukri seyno.

¹⁴ Ignewa Kiyavwiye Uhokri gannip. Akak gidatni ig kehe ignes ikivaratviyenevwi igkis bisikbetwikis wavitkigtak, ig keh igkis mehwe gavitkigtak kewa un kiseviyebe pusuk awahnibet kamuw ayge avit ini waxri imuwadnene.

¹⁵ In waxri Bazahmnaw in ka nimunisima. In waxri ka aynsima amunibdih barewyevwi.

¹⁶ Mmeneki yis aytontak avititak ini waxribdi imuwadminene kennesa arivramin Izhayewyamnaw, yis ivegbet akak yitihpa arimkanit inin waxri ku pariye ig Kiyavwiye Uhokri kaniyvin adahan ig misekwene nivit? Yis ka hiya gimaptahka. Ig Kiyavwiye Uhokri kavinwanek ay adahan avanenekwa.

¹⁷ Ig detye ig. Ig ka aynsima gikahosa ahj, ke kasisbe. Yisme yuma yidatni gitivut. Hene ig Kiyavwiye Uhokri aytwe avititak ini waxri Sinay arimkanit giwaxig barewvitye.

¹⁸ Kibeyne, Kiyavwiye, pis wagehe inurikut. Ayipa pis wanekbete gihawkankis pivetunyavu. Pis atere iwene kakanhawka gidahankis pihiyegavu ku pariye misekwenevwi amadga inin givuwikis hiyeg mbayavyempu. Kibeyne ku samah pis kavinwa ay umunuh.

¹⁹ Kibeyne gidahan Kiyavwiye! Mmanawa ignewa mpuse hawkri hiyekne akak uhawkan. Ignewa wamnihtenwiy.

²⁰ Ig Kiyavwiye Uhokri uwohkigawiy ignewa Uhokri Dehetniye ku pariye amnihwiy; ignewa Kiyavwiye Uhokri, Ukivarawiy, ku pariye wiwhwiy ariw miyaka.

²¹ Ig inyewa bekbetenek gitewkis givetunyavu, neras ku pariye adukwenewa misekwenene akak givathawnikis.

²² Ig Kiyavwiye Uhokri awna: “Nah kehnek yivetunyavu diyuh ariwntak waxri Bazah. Nah kehnek igkis diyuh ariwntak parahwokwa amihawni

²³ adahan yisme awkenek abet gimigkis. Igkisme yivig pewru ewhanek gimigkis ku samah gimawkankis.”

²⁴ Nukivara, Kiyavwiye Uhokri, madikte hiyeg hiyepnekuye ini piwewni atan akak madikte pidatni. Igkis hiyap piverekemni arikut pivin barewvitye.

²⁵ Avatkeknevwi wew pitatkimpi. Igkisme agighenevwi, butte. Ayge giyegbikis egkisme himanoviyo tesempikis gusabbugakis.

²⁶ Egkis awna: “Kabayhanabay Kiyavwiye Uhokri abet givahdukawnikis gihiyegavu. Kabayhanay Kiyavwiye madikte yis izhaewyenevwi gihiwhivwi.”

²⁷ Pitatye igkite Benjamih gidahan gihiyegavu ayta, igkis ku pariye isitenene gibetkis gikebyuvwi. Ayteke igkisme Judá gihiyegavu ayta payak gikakkis giwewkistenvukis. Ayteke nikwe igkisme giwewkistenvukis Zebuloh gihiyegavu hawata akak giwewkistenvukis Naftali gihiyegavu.

²⁸ Akkanaba pidatni, Kiyavwiye Uhokri. Inin pidatni ku pariye pis kawihe adahan wawnamnihpitni.

²⁹ Arikutak pivin, ay Jerusalém, ku kiney ikivaratviyenevwi ewk pit kakanhawka,

³⁰ himahnaba Ejituyenevwi, ku pariye kene axtigibe adahan sikuvwi. Kiyavwiye Uhokri, himahnaba neras hiyegviyenevwi, neras kene pahabunene pakadminbe akak akamkayuvwi, he madikte igkis mabukwanek adahan igkis kakanhewnes pit karukri seyno! Ibekhebdihe hiyegviyenevwi ku pariye ba gibetkikis keh kerka.

³¹ Aytanek pit ikivaratviyenvwi kiyatyevwi avititak Ejitumnaw. Igkisme hiyeg etiyopiyenevwi, akak giwakkis tarak han inut, igkis piriyepkawnek pit, Kiyavwiye Uhokri.

³² Paknay avat git Kiyavwiye Uhokri, madikte yis hiyegviyenevwi avitya waxri, paknay adahan kabeyhene Kiyavwiye Uhokri.

³³ Ig awayg inurikyene minikweknene. Timapnay Kiyavwiye Uhokri gikuvimna detye.

³⁴ Akkanay Kiyavwiye Uhokri gidatni; in gikiytani ay givitkis izhaewyenevwi. Inme gidatni ay inurik.

³⁵ Ig Kiyavwiye Uhokri ka gibewisima ay ariku givin barewvitye. Ig izhaewyenevwi giwohkigakis iki gidatni gitkis gihiyegavu. Kabayhanay Kiyavwiye Uhokri.