Sawmus 66 - Uhokri Gahegbetawni Nukune akak Sawmus

Avatman adahan kabeyhene Uhokri

¹ Amawka madikte hiyegviyenevwi paksenekuye Kiyavwiye Uhokri akak kabimanka hawata akak batekka.

² Paknay avat adahan kabeyhene giw. Kabayhanay gikiytani akak avatman.

³ Kabayhanig han: “Kiyavwiye, madikte pannivwi in keh wis wakaymni! Pis ka aynsima pidatni. Pidatni keh pivetunyavu avis pibohri, igkis mabukwa pivetunat.

⁴ Madikte hiyegviyenevwi amadgaya inin kiyathap. Igkis paksap. Henewatbaki, igkis madikte pak avat adahan kabeyhene piw.

⁵ Nukebyuvwi, ba yi ayta iwasa ku pariye Kiyavwiye Uhokri gikehavan. Hiyapnay akak madikte yiwakemni ini barewyevwi annut ku pariye gikehni gidahankis amedgenevwi inin.

⁶ Ig wagese parahwokwa humaw waxri makaravye, igkisme wahawkrivwi manuke warik akak gikugkukisnenwa. Avim ini hawkri batekkanenwa gidahankis uhiyegavu ku samah Uhokri manuksevgikis.

⁷ Akak gidatni ig kumaduka adahan avanenekwa. Givegime avuriwnenekwa madikte hiyegviyenevwi. Nikwe amawka yuma pahavwinema kavetunsene Kiyavwiye Uhokri!

⁸ Amawka madikte hiyegviyenevwi kabayha uwohkigawiy! Amawka igkis gabayhig akak madikte giwegewnikis.

⁹ Ignewa mpithamnihwiy ariw miyaka. Ig kawnata isaksati wixwiy tuguh.

¹⁰ Kiyavwiye Uhokri, pis kuwis hikeke usuh. Ku samah karukri wahano asis bukahka ariwtrik tiket, hene pis hikeke usuh.

¹¹ Pis isakse usuh tuguhe arikut tey. Pis sarayhe uduhyamadgat uhiyhan kane awinisima.

¹² Pis isakse uvetunyavu sibuhe usuh. Usuh mpiye abetiw tiket hawata ahakwew un, heneme kuri pis waxwe usuh atan arit inin pahayku iwetrit nopsadnene.

¹³ Nikwe nah ewknek kakanhawka pivinekut ku pariye amawka bukahkanek pahavwite. Nah ikinek ku pariye nukaksan pit.

¹⁴ Ku pariye nukaksan pit, abetnewa nuwakemni, innewa nah ikepninek pit.

¹⁵ Nah kakanhawnek pit muwtoh adahan igkisme bukahkanek avitmin kakanhewket. Nah kakanhawnek pit pak ayhmadapnene garudikis payak akak kabrit. Inme asaryan wagahnek ta inurikut.

¹⁶ Madikte yis ku pariye kiyathenevwi giw Kiyavwiye Uhokri, ba yi ayta timapun, nahme kinetihwa yit amin ku pariye gikehni nudahan.

¹⁷ Nah amnihswe git adahan ig parak abet nuhawkan. Ayteke nah kabeyhevgi akak avatman.

¹⁸ Heneme, wake nah bayehpiyebe mbeyevye hiyakemniki avit nuyakni, ig Kiyavwiye Uhokri ka timavunkama.

¹⁹ Heneme, kibeyne, ig Kiyavwiye Uhokri timevun inuriktak, ig kaytwe nuviryepkawni.

²⁰ Nah kabayha Kiyavwiye Uhokri awaku avanenekwa ig timap nuviryepkawni, ka pahaynatima ig ka akkama gamnihra nutuh.