Sawmus 6 - Uhokri Gahegbetawni Nukune akak Sawmus

Ku aysaw nah tihene, Uhokri timap

¹ Kiyavwiye Uhokri, uya amnihun. Ka ba himahun kihawnama akak mbeyne! Ka ba hiyapkis mbeyne nutuh avatra nutaraksan abetnewa pidagoni!

² Amnihnan, Kiyavwiye, mmanawa nah yuma nudatni akiw. Piyihnan, mmanawa katiwka muwaptihpen pahavwite.

³ Kiyavwiye, nah kayah mpiynevevye. Aysawhki inin mpiyanek nuwhu?

⁴ Ba ayta wiwhun abetitak inin mbeyne. Amnihnan, mmanawa pis ka pamnihrasima.

⁵ Ku nah miyap, pariyeki kiyekisne piw gitkis hiyeg? Ku nah miyarevye, nah ka ik adahan kabayhap akiw arikutak imewti.

⁶ Nah kuwis mabipiye tih. Hewke tiyegem nah tihene. Nuwetri sabapitnenekwa awaku nukantak, hawata nukantak anugha nutiwevwi.

⁷ Nukanu keh nuwtyak ka aynsima wagewge. In keh nah kabahte ka hiyap akiw. Awaku nuvetunyavu mpiynevevye kiyimwihpen.

⁸ Ka sam. Higihwanay nuwntak, yis ku pariye he kehnenenwa mbeyne! Mmanawa ku aysaw nah tihene, ig Kiyavwiye Uhokri Dehetniye timapnan.

⁹ Kibeyne ig kuwis timap namnihswan. Ig ameve nuviryepkawni.

¹⁰ Madikte nuvetunyavu marekepkanek. Igkis avisasewnek. Igkis bisikbetnek pahaye adahan akak madikte gimarankis.