Sawmus 58 - Uhokri Gahegbetawni Nukune akak Sawmus

Uhokri hiyaknek gikakkis hiyeg mbayavye

¹ Yis ku pariye kumadukenevwi, mmah yis waditnakay amun yikumadukan? Mmah yis huwitnakay avigkut hiyakemniki ku aysaw yis hiyekne gikakkis hiyeg?

² Kawa! Yis ivegmina yihiyekemni he adahannenwa kehne mbayka! Yis pataha yiwak akak migat avit pahatte paytwempu.

³ Hiyeg mbayavye misakwa he kehnenenwa mbayka; ku samah ariwntak igkis wayvuka, ginetnikis he wasaymkanenwa.

⁴ Gibiykis ka avuyisima ke pahavwi kaybunebe pahaywotneye gibiybe. Igkis mataybiswa arit kibeyne hiyakemniki kewa pahavwi kaybunebe ku pariye ikawvari ke wotbe ig ka timapbe

⁵ Mmanawa ig ka timepkere gagignimna ner kinistekevutne gidahankis kaybune.

⁶ Kiyavwiye Uhokri, asa dunihave gaybukis neras mbayavye! Warakave gaybukis neras kene kawokwinebe axtigi!

⁷ Kahadbe igkis biyukap kewa unbe dimuka amadgat wayk, marihwa igkis batekwe kewa pamatkabe ku pariye hiyan avigku ahin.

⁸ Keh igkis mutuhwe kewa tuwbe abet ibug! Keh igkis humaw kewa pahavwi bakimnibe ku pariye wayvuka miyarevye, ku pariye kane hiyapti kamuw abutni!

⁹ Avit igkis mbayavye hiyak ku pariye danuhne gitkis, ayipa igkis tigahavepkanek kewa ahavwibe. Ku aysaw adukwenewa igkis ivegnete, igme Kiyavwiye Uhokri, akak mbeyevye gidagoni, ig ivukevgikisnek akak gimaygbiynenwa.

¹⁰ Igkisme kibeynevwi bateknek ginaktinkis ku aysaw igkis hiyapnek patahwavye katiwnisaka gitaraksankis gitkis; igkis wewnek abetiw mbayavye gimigkis ka avisnama akiw.

¹¹ Madikte hiyeg awnanek: “Henewa, igkis kibeynevwi dax gitiwnihkisnek. Inyewa Kiyavwiye Uhokri ig ay avuwiw hawkri.