Sawmus 57 - Uhokri Gahegbetawni Nukune akak Sawmus

Nah abet mbeyne heneme nah kuwis ahegbete nuhiyekemni adahan nah paksene piw

¹ Uya amnihun, Kiyavwiye Uhokri, uya amnihun, mmanawa pisnewa nayemwekri! Aynte anavi pihanpi ayge nah uti ayemweket adahan nah mpiyasene mbeyne.

² Nah amnihswa git Kiyavwiye Uhokri kane gidatnisima. Nah amnihswa git Kiyavwiye Uhokri awaku ignewa.

³ Inuriktak ig kaytwanek nuwnuh. Ig amnihunek. Ig keh neras ku pariye keryevwi nukakuh igkis hahwanek. Kiyavwiye Uhokri akkanek nutuh gamnihra akak gabay.

⁴ Nuvetunyavu ayipa kiyaraniwhpen. Igkis kewa kawokwinebe aharit naxwitni, gaybukis kewa kurumwibe akak yakot, ginenkisme kewa iwanbe kiyawhaku.

⁵ Kiyavwiye Uhokri, hiyapkisanaba pidatni aynte inurik hawata pikiytani muwapuw amadga hawkri.

⁶ Nuvetunyavu ehe tey nudahan adahan nukamaxwitni. Nahme wakaymni ka aynsima. Igkis kehe pahayku miyokwiye avigku nuhina, heneme igkisnewa tuguhbetwikisnek atere arikut.

⁷ Kiyavwiye Uhokri, nah kuwis ahegbete nuhiyekemni adahan nah paksene piw. Nah ka miniw niw.

⁸ Nah hawata tesne nagigni hebek akak egu lira adahan kabeyhene piw. Nah kannikasakere kamuw hawkanawa akak nuvanuh!

⁹ Kiyavwiye, nah kabayhapnek aynte gibetkis hiyegviyenevwi. Nah kabayhapnek aynte gibetkis nawenyevwi hiyeg.

¹⁰ Pamnihra danuh tahan inurikut, inme pikiytani hawata danuh tahan abetit ukuhne.

¹¹ Kiyavwiye Uhokri, hiyapkisanaba pidatni aynte inurik hawata pikiytani muwapuw amadga hawkri.