Sawmus 55 - Uhokri Gahegbetawni Nukune akak Sawmus

Nah haraksaki gavitkis nuvetunyavu

¹ Kiyavwiye Uhokri, timapnaba nuviryepkawni! Ka ba miniwnama nuwhu ku samah nah amnihswene pit!

² Timapnanuba, kaytwanaba nuwnuh, mmanawa nah abet ka aynsima wakaymniki.

³ Nah sagka ku aysaw nah tima arak ku samah nuvetunyavu puwimahun, mmanawa neras hiyeg mbayavye igkis pekiswen avititak paytwempu, kuri igkis nuhavuh butte. Igkis kihawna matekbetka nudahan. Igkis dagawnaw nutuh. Igkis ka batek ginaktikis nukakuh.

⁴ Nah avis mpinevevye. Hawata aviska abohri miyaka ka aynsima parekwen.

⁵ Nah kayah mbeyevye aviska he nuvituh segke; in ke wotbe ka nopsima aviskadbe kumadukevun.

⁶ Nikwe nah awna: “Aa, wake nah kahanpinabe ke tukwabe, nah amerepkama wadit arimkanit pahayku iwetrit ku kiney ik adahan nah mayak!

⁷ Nah tivikkam ayemwe piyawakad. Nah misakwakam ayntehan amadga amatap.

⁸ Kibehtenwatkama nah ivegva pahayku iwetrit kibeynewatnene adahan nah ayemwene atere ariw ini marino ku pariye haraksan.”

⁹ Kiyavwiye, mehpinaba gahegbetawnikis neras hiyeg. Hawata matekbetanaba ginetnikis, mmanawa nah hiyap ay avit paytwempu ka aynsima arewhaki akak matekbetka.

¹⁰ Hewke tiyegem mataytak igkis amewnama avitminew ayaranwa paytwempu. Inme kivun akak umahaka hawata akak mbeyne.

¹¹ Kadahan mbeyne ayge muwapuw, hawata mpiksaptihka akak kiniswiki.

¹² Nah wakaymni ku samah ner ku pariye miyathevun, igi kawki nuvetunyama; wake ig nuvetunyabe, ka samkam. Nikwekam ik adahankam nah ayemwe gavitkam.

¹³ Heneme pisnewa nudahewekten nukagmada kibeyne, pisnewa miyathevun.

¹⁴ Bawa wis inparinekwa atak payak gikakkis hiyeg kabubukuh kiyathene Kiyavwiye Uhokri ariku givin. Wis kinetihwene yuma pukuhpawka. Hiyaksa pisme kuri humaw nuvetunya.

¹⁵ Kiyavwiye Uhokri, igkis nuvetunyavu utenek gibikemnikis pahaye adahan. Avuheket kuwis ahegbet adahan igkisme muhukenek ivegi arikut imewti, mmanawa mbaykanenwa ay ariku givinkis hawata ay abet gihiyekemnikis.

¹⁶ Nahme amnihswanek git Kiyavwiye Uhokri adahan igme parak abet nuhawkan. Nah hiyak ku ig amnihunnek.

¹⁷ Hawkanawa, puwipka abet, tiyegem nah baruwkiswene. Nah tihene. Igme timavun.

¹⁸ Ig kehnek nah diyuh ariwntak ini kerka makniw barewvit awaku ka aynsima hiyeg kuwis pareke abet nuhawkan adahan igkis ayavan.

¹⁹ Henewatbaki ig Kiyavwiye Uhokri, ku pariye kumadukene ku samah akavuska hawkri, ig timavunnek. Ig pisenwanek gikakkis nuvetunyavu nudahan. Igkisme ka iknek adahan keh ariknawnama ta gitivut, mmanawa igkis ka wageskere gihiyekemnikis, igkis kawnata kiyathig.

²⁰ Igme ner nukagmada kinisekevutne igva kavetunse gidahawektenvu ku pariye kabayntiwatnene gikak. Ig (Ahitofew) dunihe gahegbetawni ukakuh.

²¹ Ku aysaw ig awna nutuh, giwn mitibdite ariw dibe, heneme avit giyakni dagawnakanenwa. Hawata akiw ku aysaw ig awna, giwn hagehgeye iwit, hagehgete ariw iyti, heneme ayawi kewa iwanbe kane guyawisima.

²² Akka pihawkan git Kiyavwiye Uhokri, igme ayavapnek. Ig ka pahaynama isaksati pahavwi awayg kibeyne tayuh adahan ig tuguh abet mbeyne avavyekwatma.

²³ Heneme neras umehekevutnevwi gikakkis kinisekevutnevwi, igkisme hiya mbeynenek. Pis, Kiyavwiye Uhokri, pis padakavegikisnek ta abetit amisnavye ahawkri. Igkis kawki danuhnek pabuskaknema gidehetnikis ay amadga inin. Nahme kamaxwanek pivitit adahan avanenekwa.