Sawmus 52 - Uhokri Gahegbetawni Nukune akak Sawmus

Uhokri hiyaknek gikakkis taraksavye

¹ Awayg detye, mmeneki pis keh piwanti akak pikehni mbayka? Kiyavwiye Uhokri avanenekwa ahegbet adahan hiyak gikakkis taraksavye.

² Pis ahegbeta pihiyekemni adahan pisenwa gikakkis nawenyevwi. Pis awna wasaymka giminkis. In ke wotbe pinen kewa ivihgibe ayawi adahan kehne hiyeg kayah.

³ Pis batekte akak mbayka mpiy kabayka, pimawkan pis awnate wasaymka ariw ku pariye inyewatnene.

⁴ Pis wasaympiye, pis batek huwivwih piyakivwi hiyeg akak mbaytunka!

⁵ Inneki keh Kiyavwiye Uhokri pisenwanek pikak adahan avanenekwa. Ig kamaykiswepnek ig padakiswepnek piyawakad ariw pivin. Ig Kiyavwiye Uhokri wiwhpepnek gibetitakkis hiyeg kotenene miyate.

⁶ Igkisme hiyeg wadityevwi hiyapni hene, igkis wakaymnibdinek. Igkis hiyaraptihpepnek, igkis awnanek:

⁷ “Ivegnay git pahavwi awayg ku pariye kane ihpati Kiyavwiye Uhokri giwn. Git igwa mpithamnihwa ariw mbeyne mpinekata ig kamaxwa givitit Kiyavwiye Uhokri. Gikamaxwan ta avitit gidahan igiska. Ig battukaw ivegva adahan yuma ariknawnama muwekne git avitimpi gikehni mbayka! Kurime ig ute ku pariye kis gidahan.”

⁸ Kibeynekata nah ka henema. Pis keh nah kewa pahakti amutribe oliveg imiyo, ku pariye hiyan kennesa ahumwa Kiyavwiye Uhokri givin. Nah avanenekwa nukamaxwan ta avitit pamnihra.

⁹ Kiyavwiye Uhokri, nah avanenekwa kabayhapnek adahan ku pariye pikehni udahan; aynte givetunkis pihiyegavu nah akkanek gitkis madikte ku pisnewa kibeyne.