Sawmus 51 - Uhokri Gahegbetawni Nukune akak Sawmus

Uya bayahminan ariw nutaraksan

¹ Kiyavwiye Uhokri, ku samah pis ka pabaysima, uya bayahminan ariw nutaraksan! Mmanawa pis ka pamnihrasima nukakuh.

² Barewvithanuba ariw nuvathawni. Wiwhniba nuvititak.

³ Nah hiyak ku nah tarakse. Ka aynsima nah kayah in nutaraksan. Takunipti nah kayahni.

⁴ Niguh, pikaknewa nah ka aynsima tarakse. Nah kehe mbayka piwtrik. Ku aysaw pis awna ku nah tarakse, in henewa. Wake pis padekwiyebe nah arimkanit biyukwiki, in waditnakam pis keh.

⁵ Nah taraksevye hiyeg ku samah nah amadga wayk. Avit nah amadga wayk ayipa nuhiyekemni ka wadit.

⁶ Pisme muwaka hiya nuyakni barewvit. Kiyavwiye, uya akka nutuh pihiyekemni inyewatnene hiyakemniki kibeyne.

⁷ Sagahptanuba ariw nuvathawni, marihwa nah barewvitye piwtrik. Barewbetha nudahan nuhiyekemni.

⁸ Uya amnihun keh nah batek timap avat akiw. Keh nah batek payak gikakkis hiyeg batekyevwi akiw. Pis kuwis kayahkise nutuh ka aynsima kuwis. Kuri, uya keh nah batek pahaynewata akiw.

⁹ Ka ba iveg arimkanit nutaraksan akiw. Uya bayahminan ariw madikte nuvathawni.

¹⁰ Barewvitanuba ariw nuvathawni. Nukunehnaba nuhiyekemni akiw. Ka ba isaksa nah taraksa akiw.

¹¹ Ka ba tukuhpenuma piwntak. Ka ba wiwhpima pitip nuvititak.

¹² Uya keh nah batek akak ini pamnihra nukakuh akiw. Kehnaba nuhiyekemni batek adahan ihpa piwn akiw.

¹³ Nikwe ik adahan nahme ikinek gawaygikis hiyeg taraksevye adahan igkisme wew avigku pihiyekemni akiw, marihwa gihiyekemnikis diyuh akiw pimkanit.

¹⁴ Kiyavwiye, nutaraksan mbeyevye. Nah ka kis dahwa amadga hawkri nivatra. Uya amnihun, wiwhni nuvititak. Pisnewa namnihten. Ku pis amnihun, takunipti nah kinetihwanek amin pabay akak madikte nubetki.

¹⁵ Uya keh nah ka mara akiw, woka nubiyuh adahan nah kabayhap.

¹⁶ Ku nah kakanhaw pit, heneme ku nah ka wageskere nuhiyekemni, nikwe ini ka ariknawnama pit. In ka avigkutavriknama pibetki. Kawki innema kakanhawka keh pis bayahminan ariw nutaraksan. Wake in keh pis bayahminanbe ariw nutaraksan, nikwe nah kehkama kibehtenwa adahan nah iki pit.

¹⁷ Heneme kawki innema keh pis batek. Pis muwaka hiyavun nah ahegbet adahan ihpene piwn. Inineki amawka nukanuh pit. Pis ka hiya pisma tukuh pahavwinema ku pariye kayehne gitaraksan, ig aharitne ihpene piwn.

¹⁸ Kiyavwiye, uya amnih madikte pihiyegavu siyawhyenevwi. Kehnaba kabayka gikakkis. Kehkisnaba Jerusalém ayaranwa akiw adahan givetunyavukis ka hiya gisamanakkis akiw.

¹⁹ Nikwe, ku aysaw uhawkan kuwis wadithebdihka, avim ini nikwe pis muwaka usuh kakanhaw pit akiw. Henewa usuh kakanhewnek pit. Usuh ikinek pit madikte ku pariye pibetki.