Sawmus 5 - Uhokri Gahegbetawni Nukune akak Sawmus

Uya huwithan akak pihiyekemni waditye

¹ Kiyavwiye Uhokri, uya ataybiswa numkanit. Timapnaba namnihswan.

² Nukivara, nuwohkiga, timapnaba namnihswan pit. Mmanawa pitnenwa nah amnihswene.

³ Kiyavwiye, mpuse hawka nah piriyepkaw pit. Pisme timapnite nukuvimna. Ayteke nah wahap adahan pis iki nutuh nayapni. Nah hiyakni ku pis ikinek ku pariye nayapni pit.

⁴ Kiyavwiye Uhokri, pis ku pariye kane batek akak hiyeg gikehnikis mbayka; hiyeg mabayavye gihiyekemnikis pis ka muwaka ignes misakwa pivetun.

⁵ Pis ka batek gikakkis hiyeg kawantiyavye. Hawata pis amiyha hiyeg mbayavye gihiyekemnikis.

⁶ Pis pisenwanek gikakkis hiyeg wasaymavye. Hawata pis asene hiyeg umehekevutnevwi gikakkis hiyeg kinisekevutnevwi.

⁷ Nahme, awaku pis ka pamnihrasima nukakuh, nah ik adahan nah parak ta pivinekut. Nah ik adahan nah paberetusaw adahan nah kabayhap akak madikte kiyatka.

⁸ Kiyavwiye, uya huwithan akak pihiyekemni waditye. Nah kadahan ka aynsima nuvetunyavu ku pariye muwaka nayguhpitni piw. Nah ka hiyak ku samah nuwewni. Uya akka nutuh ku samah pimawkan adahan nah wew.

⁹ Igkis nuvetunyavu yuma pahatnama giwnkis inyewatma. Avanenekwa abet gihiyekemnikis mbaykanenwa. Igkis kinista hiyeg akak barewye iwit bawa ini adahan gikinseptenkis ba adahan giwmeptenkis.

¹⁰ Kiyavwiye, katiwnisa gitkis avatra ini gihiyekemnikis. Ini gahegbetawnikis ku pariye igkis ahegbete, keh in wageswa gidahankisnewa akiw. Ivukepnigkis pivetunatak, mmanawa igkis kehnenekwa ka aynsima patahwaki, igkis hawata avanenekwa suguhnap.

¹¹ Heneme, Kiyavwiye, iki batekka gitkis madikte neras ku pariye kamaxwenevwi pivitit. Avanenekwa igkis pak avat akak madikte batekka awaku pisnewa gimaptentenkis. Iki pibetki gitkis neras ku pariye batekyevwi pikak avitakwa giyaknikis.

¹² Mmanawa pisnewa, Kiyavwiye, sarayh kabayka givititkis neras ku pariye ihpenevwi piwn; pabay mpithigkis kewa pahak arabbe gidahankis.