Sawmus 49 - Uhokri Gahegbetawni Nukune akak SawmusIn kibohrikinen ku wis kamaxwa avitit igiska 1 Yis madikte, ataybiswanay arimkat nuwnuh! Timapnay, yis hiyegviyenevwi misekwenevwi ay amadga hawkri. 2 Hiyeg detyevwi payak gikakkis tuwatasewnevwi, igisavye payak gikakkis madiptavye, timapnay nuwnuh. 3 Nuhiyekemni ku pariye nah ivegminene in huwewehe. Nah awnane yit akak madikte hiyakemniki. 4 Kuri nah ikite nuhiyekemni kabayntiwa arit pahat iwit patuwesbuhka, ayteke nah tes nagigni nah akkamnihni yit abetimpi navanwekwey. 5 Ku aysaw nuvetunyavu mbayavye kiyaraniwhpen nah ka avis aynesnima gibohrikis. Mmanawa gihiyekemnikis in waditnevyenen. 6 Igkis kamaxwa avitit ini igiska ku pariye igkis kadahan. Igkis ikawvari navitmin awaku ku samah igkis ka aynsima gikakurakis. 7 Heneme yuma pahavwinema ik adahan keh givit isahptaw, ine kawnata ik adahan ig katiwnih Kiyavwiye Uhokri adahan givit. 8 Mmanawa ka karukrima katiwnih pahavwi hiyeg gidehetni. Hiyawa ka aynsima karukri pahavwi kadahan, 9 ka innema keh ig ka miyati, ka innema keh ig aymuhwa adahan avanenekwa. 10 Wixwiy madikte ay amadga hawkri miyakamnaw. Madikte hiyeg hiyekemniyevwi miya payak gikakkis puwvavye hawata gikakkis meksatruvye. Igkis madikte ikis gewkanbetkis gidahankis nawenyevwi hiyeg. 11 Ini gimewkis wageswanek giwskekikis. Ayge igkis misakwanek avanenekwa. Hiyawa igkis kadahan ka aynsima waxri igkisnewa ikiswin. 12 Hiyawa pahavwi kiyatye ay amadga hawkri, heneme ig ka bisik ariw miyaka. Ku samah puwikne miya, ig hawata miyavwata. 13 Avuriwnay kabayntiwa ku pariye danuh gitkis neras ku pariye kamaxwenevwi ta givititkiswa akiw, avuriwnay gimaksemnikis neras ku pariye bateknene giminkis akak gidahankis igiska. 14 Ku samah muwtohvutne huwitha givigvu, inme miyaka gihuwtentenkis arimkanit biyukwiki. Givitkisme busipdipnek ariku gimewkis, piyawakad ariw givinkis. Ayteke ariwnteke ini, ku aysaw Kiyavwiye Uhokri nukuneh hawkri akiw, igkisme gihiyegavu kumadukigkisnek. 15 Nah hawata! Nah hiyak ku ig Kiyavwiye Uhokri wiwhunnek ariw miyaka adatni hawata ig amavannek ta givineut. 16 Ka yi muwaka kiyimwihwa ku aysaw pahavwi ka aynsima igis, hawata ku aysaw gikakura wagehnene akiw. 17 Mmanawa ku aysaw ig miyapnek, ka hiya igma iwi ariknawnama igiska ku pariye ig kadahan. Gidahan igiska ka ik adahan tivik gihapti arikut imewti. 18 Hiyawa ig keh gibetki ku aysaw ig ay amadga inin, hiyawa hiyeg kabayhig ku samah ig hiyakan muwapuw gavit gannivwi, 19 heneme ku aysaw ig miyapnek, ig tivik pahadguhwenek gikakkis gihawkrivwi aynte abet ini amisnavye dahawnene adahan avanenekwa. 20 Hiyawa pahavwi kiyatye ay amadga hawkri, heneme ig ka bisik ariw miyaka. Ku samah puwikne miya, ig hawata miyavwata. |
© 2018, Wycliffe Bible Translators, Inc. All rights reserved.
Wycliffe Bible Translators, Inc.