Sawmus 46 - Uhokri Gahegbetawni Nukune akak Sawmus

Uhokri ay ukakwiy; hiyawa wixwiy karisaw

¹ Kiyavwiye Uhokri ignewa umaptenten ariw mbeyne. Ignewa hawata iki udatni adahan mpiyasene mbeyne ku pariye danuh wot. Avanenekwa ku aysaw wis abet mbeyne igme kennesa uhumwa adahan wamnihten.

² Inneki keh wixwiy ka avisnek aynesnima. Hiyawa waxri mukuse in ayguhwe, heneme ka sam. Hiyawa waxri imuwadnene mehwe in ayguhwe parahwokwate, heneme wixwiy kawnata avis.

³ Hiyawa paraw kiman ke digidgiyebe aman, kawnata sam. Hiyawa sagkaki hakuhave waxribdi, heneme wis ka muwaka avis.

⁴ Gimun Kiyavwiye Uhokri, ayge ka aynsima batekka, ke unbe kamiyani avigku pahatra warik kane makarti. Ig Kiyavwiye Uhokri avitmin madikte ayge.

⁵ Ku kiney ig Kiyavwiye Uhokri misakwa, ayge yuma ariknawnama mukusene. In dahwa adahan avanenekwa. Mmanawa avanenekwa ig Kiyavwiye Uhokri avuriwnene.

⁶ Wake madikte hiyegviyenevwi kavetunsabe Kiyavwiye Uhokri, igkis mehwepkama pahayewvi madikte, mmanawa ik adahan Kiyavwiye Uhokri mehe inin waxri adug akak pahatwowa iwit.

⁷ Kibeyne, ig Kiyavwiye Uhokri ku pariye keh inin madikte, ig ay ukakwiy. Ig Kiyavwiye Uhokri ku pariye gikavriwten amekene Jakó, igwata wavuriwtenwiy.

⁸ Ba yi ayta, ivegnay arimkat ku pariye Kiyavwiye Uhokri Dehetniye gikehni! Mmanawa ig keh ka aynsima annut ay amadga inin ku pariye keh wixwiy wakaymni.

⁹ Ig pisenwa akak kerka muwapuw amadga hawkri. Ig dunihbeta iyakoktibet. Ig bukah kahos kerkevutno akiw.

¹⁰ Ig awna: “Karisahwanay. Nah muwaka yis hiyak ku nahnewa Kiyavwiye Uhokri. Nah avitmin madikte hiyeg. Aysawnemenek madikte hiyeg kiyathannek amadga inin.”

¹¹ Kibeyne, ig Kiyavwiye Uhokri Detye, ignewa ay ukakwiy. Ig Kiyavwiye Uhokri ku pariye gikavriwten amekene Jakó, igwata wavuriwtenwiy.