Sawmus 45 - Uhokri Gahegbetawni Nukune akak Sawmus

Avatman adahan ikivarat maripkewviye

¹ Barewyevwinenwa iwit kivunsa nuyakni ku aysaw nah anha inin avat gidahan ukivarawiy. Nuyakni kivun akak iwit kewa pahamku tomawribe kivunanobe akak higapka, dimubdi awaku eg kivunpi mpiynevevye.

² Nukivara, pis barewte giwkis madikte awaykemni. Pis hawata ka pannusima yamamna barewyevwinenwa iwit. Inneki keh ig Kiyavwiye Uhokri ike kabayka ta pivitit adahan avanenekwa.

³ Parisnaba piwana ta pibutikminat, nukivara kerkevutne detye, pis ku pariye kane pikiytanisima!

⁴ Ayteke, kivun akak pikiytani, ataknaba kavetunsa pivetunyavu adahan pis matekevgikis. Mpithamni ku pariye inyewatnene payak akak ku pariye waditnene. Pidatni in matakanek ka aynsima pivetunyavunek!

⁵ Piyaka egkis ka guyawikisima, egkis parak mpiyvi giyaknikis pivetunyavu; hene pis tuguhkis hiyegviyenevwi ta pivetunat.

⁶ Kiyavwiye Uhokri, pis kumadukanek adahan avanenekwa. Avanenekwa pikumadukan waditnenekwa.

⁷ Pis batek keh ku pariye wadit. Pis ka batek akak ku pariye kane wadit. Innebaki keh piwohkiga Kiyavwiye Uhokri kivunsap akak ka aynsima batekka mpiy madikte hiyeg.

⁸ Kibeyne kuri pis maripkewviye gukak pihayo. Pikawihni in imihe kewa kariwgube avan amihyi, kewa ahbe kewyo “miha” akak amutri “aloes” gumihyikis. Agigwoknevwi tes pidahan ariku pivin barewhaki akak akisyi kehka akak lefah gatuw.

⁹ Egme pihayo pimagyesa tabir ayge pihumwa, eg bereswavu akak karukri wahano egyekata. Yis kiyaran gukakkis avanaktivyanovwi, Gaytakkis egkis tinogben ku pariye ikivaratpiyenevwi gikamkayhkis kane gukiytanisima.

¹⁰ Kiyavuno, pis ku pariye ikivarat gibetki, timapnaba nuwnuh pit: Amawka pis miyeh pihiyegavu gikakkis pikebyuvwi ku pariye ayntehan avit piwaxig minikweknene.

¹¹ Pis barewyo tino, inneki keh ig ikivarat piharitwiyo kuri. Ihpanaba giwn, mmanawa ignewa pikivara kuri.

¹² Ay gimun pikivara pis misakwa akak kabaykanenwa. Hiyegviyenevwi avititak paytwempu Tiro ewknek pit kakanhawka. Ka aynsima hiyeg igisavye igkis muwaka kinistapnek akak kakanhawka.” Henewatbaki nuwnuh pit amun inin navanwekey.

¹³ Kibeyne! Eg ikivarat gihayo atekne atere givinwat ikivarat adahan eg misakwano ayge gimun. Eg ka gubewisima! Gubereswetni kehka akak akati karukri wahanobukye.

¹⁴ Akak gukawihni kasisiboye, eg waxwaka gavitkis avanaktivyanovwi kiyatyovwi ta git ig ikivarat.

¹⁵ Akak madikte gubetkikis egkis danuh atere, egkis parak arikut ikivarat givin.

¹⁶ Nukivara, pis kadahannek ka aynsima pikamkayuvwinek, igkisme hawatanek ikivaratyekuye kewa pahawkrivwibe; pisme, nukivara, kehnek igkis kumadukanek muwapuw amadga hawkri.

¹⁷ Inakni navanman kiyekispinek adahan avanenekwa. Ayge nikwe madikte hiyegviyenevwi kabayhapnek adahan avanenekwa.