Sawmus 44 - Uhokri Gahegbetawni Nukune akak Sawmus

Uya amnih mpitha usuh ariw mbeyne

¹ Kiyavwiye Uhokri, usuh timap akakwa utaybi ini ku pariye wahawkrivwi kinetihwe wotuh. Usuh timap inetit amin ka aynsima arikna ku pariye pis kehe abetnewa ku samah igkis ivegnete. Ka aynsima kamukri kuwis.

² Igkis kinetihwe amin mmahpa pis pekise hiyeg ku pariye kane ihpekere piwn, pis ike pihiyegavu avitit giwaxigkis. Igkis kinetihwe amin mmahpa pis hiyapkise gitkis nawenyevwi hiyegviyenevwi. Pihiyegavume pis kehe igkis kibihwe.

³ Ka akakma giwanakis igkis mateke ini waxri. Kawnata akakma gidatnikis igkis mateke neras hiyeg aygenevwi. Igkis matekevgikis akak pidatni, akak pannu hawata akak ku samah pis ay gikakkis. Hene pis ekke gitkis ku pis batek gikakkis.

⁴ Pisnewa nukivara nuwohkiga, pis keh pihiyegavu mataka givetunyavukis.

⁵ Akak pidatni usuh mateke uvetunyavu hawata akak ku samah pis ay ukakuh igkis uvetunyavu biyuk utivut.

⁶ Ka avititma numedga nah kamaxwa hawata ka nuwanama keh nah mataka nuvetunyavu.

⁷ Mmanawa pisnewa wiwhe usuh giwakutakkis uvetunyavu. Hawata pis mateke ignes ku pariye amiyhenevwi usuh.

⁸ Usuh kibenapnek madikte hawkri. Usuh kabayhapnek adahan avanenekwa.

⁹ Hiyaksa kuri, Kiyavwiye Uhokri, in ke wotbe pis tukuhe usuh mmanawa pis isakse usuh matak gitkis. Ku aysaw usuh abet kerka pis yuma ayge gikakkis usuwtatavu akiw. Mmahki hene?

¹⁰ Pis keh usuh bisike gavitkis uvetunyavu, igkisme iwavave madikte ku pariye udahan wewkanbet.

¹¹ Pis ike usuh kewa muwtohbe ku pariye tivikwiye arimkat umehket. Hawata pis ibekhe usuh givuwiwkis nawenyevwi nawwotunyevwi.

¹² Pis piyukise pihiyegavu ka katiwenema ke wotbe igkis ka kawihbe adahan ariknawnama.

¹³ Hiyegviyenevwi ku pariye kennesa womkat, igkis hiyap ku pariye pis keh ukakuh, nikwe igkis mahivwih usuh hawata igkis miyatha usuh.

¹⁴ Pis keh usuh he adahan mahivwihkanenwa gavitkis nawenyevwi hiyegviyenevwi. Nawenyevwi hiyegviyenevwi igkis hiyaraptih usuh.

¹⁵ Nahme kayah ka aynsima maraki gitivutkis hiyegviyenevwi.

¹⁶ Mmanawa nuvetunyavu ku pariye namiyhetnivwi igkis mahivwihun, igkis miyathan.

¹⁷ Madikte inin danuh wotuh, heneme usuh ka miyehpi, usuh kawnata dunih ahegbetawka ku pariye pis kehe gikakkis pihiyegavu.

¹⁸ Usuh avanenekwa kamaxwenenekwa pivitit, usuh ka dunih pikumadukan.

¹⁹ Hiyaksa kuri in ke wotbe pis tukuhe usuh gibetitkis puwikneviyene ahavwikunevwi, pis ikise usuh aynte abet amisnavye ku pariye kane aynsima misanapnene.

²⁰ Wake usuh miniwviyebe piw, uwohkiga, wake usuh piriyepkawbe git nawenyewatbe uhokri akiw,

²¹ pis hiyaknikama madikte. Mmanawa pis hiyak mpuse hiyeg gihiyekemnikis ayemewnene.

²² Heneme awaku ku samah usuh kamaxwa pivitit, usuh abet miyaka mataytak pivatra; usuh ikaka kewa muwtohbe ku pariye tivikwiye arimkat ariwmhekri.

²³ Wadisnaba, Kiyavwiye! Mmahki pis himeke mpiynevevye? Kannikawnaba! Ka ba tukuhpima usuh adahan avanenekwatma.

²⁴ Mmahki pis ayemwe wowhu? Mmahki pis miyehe uhiyvan mbeyne akak uwakemni?

²⁵ Usuh kuwis mihenevye, tuguhevye waykborit. Usuh kuwis matekepka, padekwika abetit hew.

²⁶ Kannikawnaba, ba ayta ayava usuh! Amnih usuh akak pamnihra!