Sawmus 42 - Uhokri Gahegbetawni Nukune akak Sawmus

Nah ka muwaka nah kiyimarnema

¹ Kiyavwiye, nah ka aynsima mpiksaw piharit avititak nuyakni, ke pahavwi itbe arabyuvye un, ig ivegva parewni akak madikte gimaviswangimaviswan.

² Nah piharitne ka aynsima! Pisnewa dehetniye. Heneme ke nutuhbe pis yumahbe ay nukakuh. Aysaw nah utivi akiw? Aysaw nah hiyak ku pis ay nukakuh?

³ Nah tihene piharit hewke tiyegem, mataytak. Nah ka kiye naxni. Nukantak wageswe ke numanabe. Takunipti nuvetunyavu awna nutuh: “Mmah piwohkiga ig yuma ay? Kitwikig?”

⁴ Ku aysaw nah kiyeminene amin minikwak, nah kayah ka aynsima. Minikwak ku aysaw hiyeg atak lamesya kabubukuh nah aygewata gikakkis. Nahwa waywe gavitkigkis. Avim ini usuh batekye. Usuh waywe pekempi avat adahan kabeyhene Kiyavwiye Uhokri. Kurime ka henema akiw.

⁵ Nah kayah ke wotbe nah piyawakad piw. Mmahki hene? Nah ka muwaka nah kiyimanema. Nah kamaxwate givitit Kiyavwiye Uhokri akiw. Nah kabayhate giw akiw, mmanawa ignewa namnihten, ignewa nuwohkiga.

⁶ Nuyakni avanenekwa kiyimarnenekwa, Kiyavwiye, ke wotbe pis yumahbe ay. Heneme ka sam. Nah kiyete ku samah pis ay nukakuh minikwak. Avim ini pis amnihpen ayge ahumwa egu warik Jordawh. Hawata pis amnihpen ku aysaw nah avit ini waxri kewye Ermoh. Hawata ku aysaw nah ayntehan Mizar. Nah kiye madikte ini in iki nawaygi akiw.

⁷ Heneme nudukwenewa nah kayah. Kiyimwiki biwh abet nuhiyekemni ka ahawnasima ke avetetnibe. Ke wotbe nah tabirnebe abet paraw eg biwh nuvitit ka ahawnasima adahan nutukepten kahadbe nah tuguhe.

⁸ Ka sam. Hewkevye ig Kiyavwiye Uhokri ka gamnihrasima nukakuh. Hawata tiyegem ig keh nah pak avat, ig keh nah piriyepkaw git, mmanawa ignewa keh nah aymuhwa amadga inin.

⁹ Nah awna git: “Kiyavwiye, pisnewa nawayghetni. Mmahki nah kayah ke wotbe pis piyawakad nuwhu? Mmahki nuvetunyavu matekevun?”

¹⁰ Ku aysaw igkis mahivwihun nah kayah pahavwite ke wotbe nuvituhwa katiw. Takunipti igkis awna: “Mmah piwohkiga ig yuma ay? Kitwikig?”

¹¹ Nah kayah ke wotbe nah piyawakad piw. Mmahki hene? Nah ka muwaka nah kiyimarnema. Ka sam, nah kamaxwate givitit Kiyavwiye Uhokri akiw. Nah kabayhate giw akiw. Mmanawa ignewa namnihten, ignewa nuwohkiga.