Sawmus 41 - Uhokri Gahegbetawni Nukune akak Sawmus

Uya keh nah makniw akiw

¹ Ka aynsima kabaykanek gidahan pahavwi ku pariye kiyene hiyeg madiptavye. Mmanawa Kiyavwiye Uhokri Dehetniye hawata kiyeginek ku aysaw ig abetnek mbeyne!

² Ig Kiyavwiye Uhokri mpithignek ariw mbeyne hawata ariw miyaka. Ig keh ig utinek ka aynsima kabayka ku samah ig ay amadga inin. Ig ka isaksanek givetunyavu kamaxgi.

³ Ku aysaw ig haritnek kakahriye amadga gisivamna, ig Kiyavwiye Uhokri ikinek gawaygi, ig kehnek ig makniw pahaynewata akiw.

⁴ Nah awne git Kiyavwiye Uhokri: “Kiyavwiye, nah kakahrip avatra nutaraksan pikak. Amnih bayahminan. Uya keh nah makniw akiw.”

⁵ Igkisme nuvetunyavu awna numinuh, giwnkis: “Aysawneki ig miyapnek adahan ig miyehpika?”

⁶ Ku pahavwi gaytakkis ayta iwasavun ig ikawvari ke wotbe ig wakayminebe nudahan bawa ig he isenenwa. Ig iwasavun he adahannen nuhiyvetni ba nah tiviknenema mihenene. Ayteke ig pes adahan ig kinetihwene numinuh gitkis gikagmadavu.

⁷ Madikte ku pariye namiyhetnivwi igkis kinetihwa numinuh akak minimnika. Igkis aharitne nah hiyapte mbeyne akiw.

⁸ Igkis awna: “Kibeyne, ig mihenevye kuwis. Ig ka kannikaw akiw.”

⁹ He igwa nudahewekten ku pariye nah ka aynsima iveg givitit, ku pariye ax payak nukakuh, he igwa hawata wageswe nuvetunya.

¹⁰ Pisme, Kiyavwiye, ka miniwti nuwhu. Uya amnihun kannikasan adahan nah iki gitkis neras ku pariye gimawkankis!

¹¹ Ini ku samah nuvetunyavu ka matakunnek, in keh nah hiyaknek ku pis batek nukakuh.

¹² Pis keh nah kabimnahwanek akiw awaku nah keh ku pariye wadit. Pis keh nah misakwanek avanenekwa ay pimun.

¹³ Ig izhaewyenevwi giwohkigakis, Kiyavwiye Uhokri, ignewa kis adahan kabayhaka! Ignewa kis adahan kabayhaka, ku akak inin hawata adahan avanenekwa! Ameh! Ameh! Henewatbaki.