Sawmus 40 - Uhokri Gahegbetawni Nukune akak Sawmus

Kiyavwiye Uhokri wiwhpen arikutak pahayku miyokwiye mihadnene

¹ Nah wahep akak kiyaknihwaki adahan igme Kiyavwiye Uhokri Dehetniye ayta amnihun. Kibeyne, ig ataybiswe nutuh ig timep namnihswan git.

² Avim ini nah hiyepne ka aynsima mbeyne. In ke wotbe nah aynte arikube pahayku miyokwiye mihadnene. In ke wotbe nah ayge abet ibug. Igme Kiyavwiye Uhokri wiwhpen ayteke. Ig ikevun ke wotbe ta avititbe pahow tip imuwadnano ku kiney nah avawyewa ariw mbayka. Ayge ig keh ke wotbe nah sigubetnabe adahan nah ka tuguh akiw.

³ Pisenwa ig keh nah pak avat, nukunewa avat adahan kabeyhene uwohkigawiy. Ku aysaw hiyeg hiyapnek ku pariye ig kehe nudahan, ka aynsima gaytakkis wakaymnibdinek, igkis kamaxwanek givitit Kiyavwiye Uhokri.

⁴ Ka aynsima kabaykanek gidahan pahavwi ku pariye kamaxwa givititnenwa Kiyavwiye Uhokri Dehetniye, ku pariye ka atak wew gikakkis hiyeg kane kumadukasewkere git Kiyavwiye Uhokri, ine ig kawnata darihwak gikakkis hiyeg kinisekevutnevwi.

⁵ Kiyavwiye Uhokri Dehetniye, uwohkiga, pis kuwis kehe ka aynsima kabayka udahan. Pis kuwis ahegbet pihiyekemni adahan pis kehne ka aynsima akiw. Yuma pahavwinema hiyeg kema pisma. Hiyawa nah kinetihwekere amin madikte ini kabayka ku pariye pis kehe udahan, heneme ka hiyak arakaknek. In ba nikebantenwa, ka ikwa adahan nah kinetihwa nimin madikte.

⁶ Ini ku samah hiyeg akka puwikne gimigkis pivetunat, ini ku samah igkis keh kakanhawka pit akak gamutrakis ayak, ka innema huwitne avigkutavrik ku samah pimawkan. Inneki keh pis kehe nuvituh humaw adahan nah kehnenekwa pibetki. Pis ka inyewatma batek akak puwikne ku pariye bukahka pahavwite pivetunat. Pis kawnata batek akak puwikne ku pariye umahka gidukwenavrikkis hiyeg adahan katiwnihne gitaraksankis. Ka innema huwit avigkutavrik ku samah pibetki.

⁷ Nah hiyapni hene, nah awna pit: “Kiyavwiye Uhokri, nop nah ay kuri adahan nah kehne ku pariye inyewa pimawkan hawata ku samah pannasan awna nudahan.

⁸ Kiyavwiye nuwohkiga, nah batek keh pibetki! Nah ihpa pikumadukan avititakwa nuyakni.”

⁹ Kiyavwiye, nah kuwis ekke inakni kibeyne inetit amin pabay gitkis madikte pihiyegavu abet ku samah usuh pahadguvunene. Pis hiyakni ku nah ka matiswati adahan nah akkin.

¹⁰ Nah ka misakwa tinwonama adahan nah darihne pihiyekemni nudahanenwatma. Pihiyekemni kibeyne hiyakemniki. Nah kinetihwa avanenekwa amin ku samah pis kis adahan usuh iveg pivitit, amin ku samah pis keh usuh isahptaw ariw uvathawni. Abet givahdukawnikis madikte pihiyegavu nah ekke gitkis ku pis ka pamnihrasima, piwn avanenekwa in inyewa. Nah ka ayam pahatnama iwit giwkis.

¹¹ Kiyavwiye Uhokri, nah hiyak ku pis avanenekwa kabay nukakuh. Ini pamnihra ini pihiyekemni inyewatnene in avanenekwa mpithannek ariw mbeyne.

Amnihnan; nah kiyaran akak mbayka

¹² Nuhawkan matekbet. Nah kiyaran akak ka aynsima mbayka. In ba nikebantenwa, ka ik adahan nah kinetihwa nimin. Nudahanwa nutaraksan matekevun. In keh nah ka hiyak ku kiw bisiket akiw. Nutaraksan ba nikebantenwa in kibite ariw nusemnu. Inneki keh nah yuma aynesnima nawaygi akiw.

¹³ Kiyavwiye, uya amnihun! Uya parak abet nuhawkan kurinewa.

¹⁴ Matekbetanaba gihiyekemnikis neras ku pariye aharitwiyevwi nuwmepten. Kehnaba igkis hahwa. Keh igkis kawih maraki. Ivukepnigkis ignekis ku pariye muwaka pisenwevye akak nuhawkan. Marekepnigkis nudahan.

¹⁵ Marekepnigkis akak ini ku pariye gikehnikis. Kehnaba neras ku pariye numiythetni misakwa kivun akak matekbetka!

¹⁶ Ignesme ku pariye mpiksewnevwi piharit, kehnaba igkis batek giminkis piwntak. Igkis ku pariye batekyevwi akak pamnihra, kehnigkis kabayha piw avanenekwa han: “Kiyavwiye, pis ka pikiytanisima!”

¹⁷ Kiyavwiye, ka aynsima muwaka kabayka nutuh. Nuwnteknewa nah ka ariknawnama. Heneme kibeyne, Kiyavwiye, pisnewa avuriwhun kabayntiwa. Pisnewa nayavetni. Pisnewa mpithan ariw mbeyne. Nuwohkiga, ka ba ayivwihwa adahan ayta amnihun!