Sawmus 39 - Uhokri Gahegbetawni Nukune akak Sawmus

Hiyapka mbeyne akak akkawka

¹ Nah awna: “Nah misakwate avuriw nuhiyekemni kahadbe ku aysaw nah awnane nah ka dagehpimanek. Ku aysaw igkis mbayavye ay nanwa, nah ka awnanek ariknawnama.”

² Ayge nikwe nah misekwe tinwo. Nah ka awna pahatnama iwit. Ine nah kawnata kinetihwa amin kabayka. Heneme in keh nah kayehpiva nutaraksan akiw.

³ Avim ini nuyakni kiyimwih ka aynsima. Ku aysaw nah pi ivegminate nuhiyekemni nimin, nah pi kiyimwihwate akiw. Nah hiyapni hene, nah awna git Kiyavwiye Uhokri, nuwnuh:

⁴ “Kiyavwiye, uya akka nutuh aysaw ayivwi nah misakwa ay amadga inin hawkri akiw. Akka nutuh amaksemni nudehetni kahadbe nah pukuhpa ku samah nah hiyeg ka dehwevyema ay?”

⁵ Nudehetni ku pariye pis ike nutuh in matkusa! Pis hiyap nayivwi amadga inin in ka ariknawnama piwtrik. Madikte hiyeg gidehetnikis in kewa pahaywowa kahikanawkabe ta pit. Henewatbaki in.

⁶ Usuh mpiya kibehtenwa ke anmaptibe. Usuh battukaw adahan uvit waditnevyenen. Usuh ahiw udahan igiska, heneme usuh ka hiyak ku pariye hiyeg misekwevye nikaknek.

⁷ Kiyavwiye, pariye nuwhpan kuri? Nah kamaxwa pivititnenwa.

⁸ Sagahptanuba ariw madikte nuvathawni kahadbe ignes puwvavye ka ik adahan mahivwihun.

⁹ Nah ka awna pahatnama iwit pitivut. Nah ka awnptaw amin inin nuhiyvan mbeyne. Mmanawa pisnewa ku pariye isakse in danuhe nutuh.

¹⁰ Kiyavwiye, ikevi kuri pis hiyapkis mbeyne nutuh. In ke wotbe pis ka aynsima biptevunbe akak tigay. Nah me miyapmet awaku ini pimahra!

¹¹ Ini uvathawni keh pis himah usuh. In keh pis hiyapkis wotuh nivatra. In keh pis meh madikte ku pariye ka avigasima wotuh hawata ku samah masumsu keh. Inyewa usuh hiyeg udehetni in kewa pahaywowa kahikanawkabe ta pit!

¹² Kiyavwiye Uhokri, uya amnih ataybiswa arimkat nuviryepkawni! Timapnaba ku pariye namnihswan pit. Ka ba mataybiswa nuwhu ku aysaw nah tihene. Mmanawa nah hawata ke madikte nahawkrivwibe. Nah ka misekwevyema ay ayivwad adahan pis navuriwnten.

¹³ Uya kavigsan, Kiyavwiye. Keh nah uti aynesa batekka akiw avit nutepkemni amadgatak inin.