Sawmus 35 - Uhokri Gahegbetawni Nukune akak Sawmus

Uya amnih mpithamnihun giwkis nuvetunyavu

¹ Kiyavwiye Uhokri, uya amnih mpithamnihun giwkis neras nuvetunyavu. Ker gitivutkis neras ku pariye keryevwi nukakuh.

² Iwinaba pimarduk payak akak pimaptenten adahan pis ayta mayuw nutuh.

³ Iwinaba nor piyakwok kurumwi payak gukak nor pimegwan adahan kerka. Kernaba nudahan gitivutkis neras ku pariye nuharaksetnivwi. Kehnaba nah hiyak ku pis inyewa amnihunnek giwkis.

⁴ Numawkan pis matekevgikis nudahan hawata pis marekevgikis ignes ku pariye aharitwiye nuwmepten. Keh igkis bisike akak madikte gimarankis ignes ku pariye ahegbetenevwi mbeyne nudahan.

⁵ Keh igkis humaw ke ahamnabe bohka gavit kamaygviye ta gitivut Ahj, Uhokri giwatni, ku aysaw ig keryenek gikakkis.

⁶ Keh gihinakis misakwa misanap hawata ka akikinisima gitkis ku aysaw ig Ahj, Uhokri giwatni, haraksevgikisnek.

⁷ Mmanawa nah yuma ariknawnama nukehni gikakkis. Hiyaksa igkis ahegbete tey nudahan; igkis atike pahayku miyokwiye mihad adahan nukamaxwitni.

⁸ Heneme, ku aysaw igkis ka wahapnimanek, igkis umahavepkanek. Innewa giteynikis ku pariye gahegbetankis kamaxwigkisnek; igkis tuguhenek atere arikut, ayge igkis miyarapnek.

⁹ Nahme bateknek ka aynsima adahan ku pariye Kiyavwiye Uhokri gikehni; mmanawa ignewa amnihpen ariw miyaka.

¹⁰ Nah awnanek git avitakwa nuyakni: “Yuma pahavwinema hiyeg kewa pisbe, Kiyavwiye! Pisnewa mpithamni neras ku pariye yumanene gawaygikis gitivutkis hiyeg detyevwi. Pisnewa amnih hiyeg madiptavye gikakkis ku pariye abetnenevwi mbeyne giwakukis neras ku pariye kabukhewnevwi gitkis.”

¹¹ Hiyegme mbayavye igkis kehbeta wasaymka numinuh, igkis awna ku nah tarakse, bawa nah yuma ariknawnama nukehni.

¹² Inme kabayka ku pariye nah nukehni gidahankis, igkis katiwnihun akak mbeyne. Inneki keh nah ka aynsima wakaymni.

¹³ Heneme, ku aysaw igkis kakahriye, nah wakaymniye gidahankis, nah kawih sak kasiwboye, nah hawata maxhaw adahan kiyene Uhokri gidahankis.

¹⁴ Nah piriyepkewne ke wotbe gidahan pahavwibe nukagmadabe ba gidahan nukebyibe. Nah wew mabubeti awaku nuwakemni gidahankis, kewa nah wakaymniyebe guharit nnaguh.

¹⁵ Heneme, ku aysaw nahme abet kiyimwiki, igkisme batek ka aynsima nudahan, igkis madikte misakwa pahadguvu adahan ahegbetne ginetnikis adahan nuwmepten. Hiyeg ku pariye nah kane hiyakti avim ini igkis hawata madikte ahegbet adahan pisenwevye nukakuh.

¹⁶ Igkis hiyavun akak madikte mahivwihka, akak madikte gamiyhankis, inneki keh nuvetunyavu batek giminkis.

¹⁷ Kiyavwiye Uhokri, aysawhki ayivwi pis misakwanek he iveg numkanit? Uya amnihun, wiwhun giwkis neras arewhavyempu kene axtigibe ku pariye aharit pisenwevye nuhawkan.

¹⁸ Nahme kabayhapnek aynte gibetkis pihiyegavu, ku kiney igkis pahadguvunene kabeyhene piw.

¹⁹ Ka ba isaksa neras nuvetunyavu wasaymavye batek adahan ku samah nah hahwa. Ka ba isaksa neras ku pariye amiyhan waditnevyenen yuma kavatranesima hiyaraptan akak madikte gibetkis ku samah nah abet mbeyne.

²⁰ Mmanawa igkis ka kannu awna amin pasamraki; madikte ku pariye giwnkis in he adahan kinisakanenwa, igkis ahegbet adahan pisenwevye gikakkis hiyeg ku pariye batekyevwi akak pasamraki.

²¹ Igkis kamiyan akak kabimanka, igkis awna: “Usuh hiyap akakwa wowtyak ku pariye pikehni!”

²² Pisme, Kiyavwiye, pis hiyap madikte ku pariye gikehnikis. Nikwe ka ba tinwonama giwkis, hawata ka ba ikiswenuma nah pahapo.

²³ Wadisnaba, Kiyavwiye, ba ayta mpithamnihun. Amnihun parak abet nuhawkan, uya hiyavun akak waditka.

²⁴ Mmanawa pisnewa waditye, Kiyavwiye; nikwe numawkan piswa awna nutuh ku nah barewvit ariw taraksaki. Nuwohkiga, ka ba isaksa nuvetunyavu batek giminkis nuharavrik!

²⁵ Ka ba isaksa igkis awna: “Ka kuyenema usuh aharit adahan pisenwevye gikak, metakwa usuh matakig. Kuri usuh pisenwa gihawkan.”

²⁶ Kiyavwiye, uya pisenwa gikakkis madikte neras ku pariye batekyevwi akak nuhiyvan mbeyne, neras ku pariye aharitnevwi nuwmepten abetnewa nah yumanene nawaygi. Kehnaba igkis marakwa givitkis givetunkis madikte pihiyegavu.

²⁷ Nerasme ku pariye muwaka hiyavun ku nah yuma nutaraksan, kivunsinigkisba akak batekka. Keh igkis awna: “Kibeyne gidahan Kiyavwiye Uhokri, mmanawa ig ka gamnihrasima gikak gibuk.”

²⁸ Nikwe nahme kabayhapnek adahan ku samah pis hiyavun akak madikte waditka. Nah hawata paksapnek mataytak akiw.