Sawmus 34 - Uhokri Gahegbetawni Nukune akak Sawmus

Uhokri gabay

¹ Nah avanenekwa kabayhanek Kiyavwiye Uhokri Dehetniye akak nubiyuh. Nah kabayhignek takunipti.

² Nah kabayhignek adahan madikte arikna ku pariye gikehni. Hiyeg tuwatavye igkis timapninek igkis bateknek giminkis.

³ Akkanay payak nukakuh in Kiyavwiye Uhokri Dehetniye gikiytani. Uyay kabayha giw kabubuk.

⁴ Nah amnihswe git Kiyavwiye Uhokri, igme kaytwe nuwnuh. Ig wiwhpen ariw madikte aviska.

⁵ Neras ku pariye kene tuwatevyebe igkis iveg gimkat. Igkis bateke giminkis. Igkis ka mabukwa akak maraki.

⁶ Nahme kewa pahavwi madiptivyebe hiyepne mbeyne. Nah ayep git Kiyavwiye Uhokri igme timevun ig wiwhpen abetitak kiyimwiki.

⁷ Kiyavwiye Uhokri Dehetniye giwatni ahj misakwa ganwavrikkis neras ku pariye kiyathenevwi giw. Ig mpithigkis ariw mbeyne.

⁸ Hiyaknay yiwnteknewa ku samah ig Kiyavwiye Uhokri Dehetniye ka gabaysima. Ka aynsima kabayka gidahan ner pahavwi ku pariye kamaxwa givitit.

⁹ Avisnay gibohri Kiyavwiye Uhokri, yis, gihiyegavu, mmanawa neras ku pariye kane taraksekere gikak igkis ka muwakti ariknawnama gitkis.

¹⁰ He igkiswa kawokwine yuma gimanakis, igkis kamax mativwa, heneme ka muwakti ariknawnama gitkis neras ku pariye amnihswenevwi git Kiyavwiye Uhokri Dehetniye.

¹¹ Aytninay, nukamagdavu takwaviye, hawata timapnay, nah kannuhyite adahan avis gibohri Kiyavwiye Uhokri Dehetniye.

¹² Pariye muwaka uti gidehetni? Pariye muwaka dahwa ayivwite ay amadga inin hawkri adahan hiyepne kabayka?

¹³ Nikwe ka yi muwaka awna iwit mbeyviye ine kawnata yi kinetihwa amin wasaymka.

¹⁴ Miniwnay ariw mbeyne, kehnay kabayka; ivegvanay pasamraka adahan yis wew nikak.

¹⁵ Ig Kiyavwiye Uhokri hiyap ku pariye kibeynevwi. Ig timap gayapnikis.

¹⁶ Heneme ig givetunyakis neras ku pariye kehnevwi mbayka; hene, ku aysaw igkis miyarapnek, ig keh igkis miyehavepkanek kibehtenwa.

¹⁷ Ku aysaw hiyeg barewvityevwi amnhiswa git Kiyavwiye Uhokri Dehetniye, igme timavgikis. Ig wiwhgikis ariw madikte kiyimwiki.

¹⁸ Ig misakwa kennesa gihumwakis neras ku pariye wakaymniyevwi hawata ig amnih neras ku pariye biyuksevye gikamaxwankis.

¹⁹ Igkis kibeynevwi mpiyasa ka aynsima kiyimwiki, heneme ig Kiyavwiye Uhokri wiwhgikis ariw madikte ini.

²⁰ Ig mpithigkis pahavwite. Yuma pahatnama givitakis dunihne.

²¹ Hiyeg ku pariye kehnevwi mbeyne innewa mbeyne giwmeptenkisnek. Igkisme ku pariye amiyhenevwi wadityevwi igkis hiyapkiskanek mbeyne gitkis.

²² Heneme ig Kiyavwiye Uhokri Dehetniye amnih neras ku pariye kannivwiye gidahan. Madikte ku pariye ayemwenevwi git ig bayahminigkisnek.