Sawmus 33 - Uhokri Gahegbetawni Nukune akak Sawmus

Kabayhanay Kiyavwiye Uhokri

¹ Madikte yis ku pariye wadityevwi, bateknay giwntakwa Kiyavwiye Uhokri Dehetniye, bateknay akak gabay. In kis adahan yis kabayha Kiyavwiye Uhokri awaku yis wewne akak gihiyekemni.

² Kabayhanay Kiyavwiye Uhokri akak yagigni hebek. Paknay adahan kabeyhene Kiyavwiye Uhokri akak yagigni kimsaku.

³ Paknay git Kiyavwiye Uhokri nukune avat. Tesnay yagigni kabayntiwa. Paknay kihaw.

⁴ Mmanawa Kiyavwiye Uhokri giwn in inyewa. Madikte ku pariye ig keh in kis adahan wis kamaxwa nivit.

⁵ Ig Kiyavwiye Uhokri Dehetniye batek akak ku pariye hiyeg keh kabayntiwa, wadit. Gamnihra muwapuw amadga hawkri.

⁶ Akak giwnenwa, ig Kiyavwiye Uhokri Dehetniye humawase en inurik; akak gimaygibinenwa ig kehe kamuw akak kayg hawata akak warukmebdi akiw.

⁷ Ig pahadguhe madikte parahwokwa amun pahayruknene iwetrit. Ig ike madikte un ariku abeyhekri mihadnene.

⁸ Madikte yis amadgayavu inin wakaymni gimin Kiyavwiye Uhokri Dehetniye! Madikte yis misekwenevwi ay amadga inin kiyathanigbay!

⁹ Mmanawa ig he awnevi, ikevi. Madikte ariknebdi humaw git. Ku aysaw ig awna, madikte kahayak git.

¹⁰ Ig Kiyavwiye Uhokri Dehetniye mpitha madikte hiyegviyenevwi gahegbetawnikis, ig ka isaksa igkis keh ini ku pariye gimawkankis.

¹¹ Heneme ku pariye ig Kiyavwiye Uhokri ahegbeta, in dahwa adahan avananekwa. Ku pariye ig kaniy in dahwa adahan akiwka akiwnek.

¹² Ka aynsima kabayka ay gidahankis hiyegviyenevwi ku pariye kawohkigahaw git Kiyavwiye Uhokri! Ka aynsima kabayka ay gidahankis neras ku pariye gikanyanvu adahan igkis humaw gihiyegavu!

¹³ Ig Kiyavwiye Uhokri Dehetniye iveg womkanit ayta inuriktak. Ig hiyap madikte hiyegviyenevwi atan amadgat inin.

¹⁴ Ariwntak giwetri ku kiney ig misakwa, ig iveg gimkanitkis madikte amedgenevwi inin.

¹⁵ Ignewa Kiyavwiye Uhokri ku pariye keh uhiyekemni. Ig hiyak madikte ku pariye ukehni.

¹⁶ Hiyawa pahavwi ikivarat kadahan ka aynsima gisuwtatavu, heneme ka igkisma keh ig isahptaw giwkis givetunyavu. Ine suwtatviyene gidatnikis ik adahan keh igkis mataka kerka.

¹⁷ Kawnata ik adahan wis kamaxwa givitit kaway kerkevutne adahan ig keh wis mataka uvetunya; in gidatni kane aynsima ka ik adahan mpithaw giw.

¹⁸ Ignewa Kiyavwiye Uhokri Dehetniye ku pariye gimaptentenkis neras kiyathenevwi giw, ignewa kavigsa neras ku pariye kamaxwenevwi avitit gamnihra.

¹⁹ Ig keh igkis isahptaw ariw miyaka. Hiyawa igkis abet mihetniki, heneme ig keh igkis aymuhwenene amadga inin.

²⁰ Kibeyne wixwiy kamaxwene givititnewa Kiyavwiye Uhokri Dehetniye. Ignewa wayavetniwiy. Ignewa mpithawiy ariw mbeyne.

²¹ Ignewa Kiyavwiye Uhokri keh uyakniwiy batek, mmanawa wixwiy kamaxwa avit giw barewvitye.

²² Kiyavwiye Uhokri, kehnaba ini pamnihra ay ukakuh, usuh madikte, mmanawa pivititnewa usuh iki ukamaxwan!