Sawmus 31 - Uhokri Gahegbetawni Nukune akak Sawmus

Pisnewa nayemwekri

¹ Kiyavwiye Uhokri, pivititnewa nah iveg. Uya amnih wiwhun ariw inin maraki ku samah nah hahwa. Mmanawna pisnewa waditye. Nikwe nah muwaka pis parak abet nuhawkan.

² Timapnaba namnihswan pit. Nah muwaka pis humaw nudahan kewa pahow tipbe ku kiney ik adahan nah ayamwa ganmavrikut, paha mpitheket adahan namnihten.

³ Pisnewa nayemwekri kuri kewa tipbe nudahan adahan numaptenten kabayntiwa. Uya huwitha nudahan nuhiyekemni ku samah pikaksan nutuh.

⁴ Ka ba isaksa nah tuguhpima arikut nuvetunyavu giteynikis ku pariye igkis ahegbete adahan nukamaxwitni, mmanawa pisnewa nayemwekri.

⁵ Ta piwakurit nah akka naymuhwan. Mmanawa nah hiyak ku pis amnihunnek, Kiyavwiye. Pisnewa Uhokri ku pariye avanenekwa keh ku samah piwn.

⁶ Pis hawata amiyha hiyeg ku pariye kiyathenevwi giwohkigakis ahehpakti bataka ku pariye kane igyewatma Uhokri. Nahme kamaxwa pivititnenwa, Kiyavwiye.

⁷ Inneki keh nah bateknek ka aynsima adahan ini pamnihra nukakuh. Mmanawa pis hiyap nukayhawni akak nuwakemni.

⁸ Kibeyne, Kiyavwiye, nah hiyak ku pis ka isaksa nuventunyavu kamaxun. Heneme pis amnihpen wiwhpen giwkis.

⁹ Kiyavwiye Uhokri, uya amnihun kurinewa, mmanawa nah ka aynsima wakaymni. Nuwtyak ka aynsima mabip awaku tihaki; nuvituh hawata kuwis madikte mabimne.

¹⁰ Nuwakemni keh nah yuma nawaygi akiw adahan nah tiviknene aymuhwenene. Nah ka aynsima mabimne awaku nuvathawni, he nuvita ka ik adahan amava nuvituh akiw.

¹¹ Igkis nuvetunyavu mahivwihun. He igkis nukagmadavu hawata mahivwihun. Igkisme nuhiyaknivwi avis nubohri. Ku aysaw igkis hiyavun igkis ayemwe navituh.

¹² Madikte igkis miyehpen, ke wotbe nah kuwis miyavibe. Nah ke ariknabe gitkis yuma ariknawnama nawaygih.

¹³ Nah timap ka aynsima nuvetunyavu igkis minimnihak pawtak, igkis awna wasaymkanenwa numinuh. Igkis keh gahegbetawnikis adahan pisenwevye nukakuh.

¹⁴ Heneme nukamaxwan ta pivitit, Kiyavwiye Uhokri; pisnewa nuwohkiga.

¹⁵ Mmanawa pisnewa avanenekwa avuriwhun. Uya amnih wiwhun giwakutakkis nuvetunyavu, giwkis neras ku pariye nuharaksetnivwi.

¹⁶ Uya sarayh pivegi numkanit akak pabay, nah pibuk; uya amnihun akak pamnihra.

¹⁷ Kiyavwiye Uhokri, timapnanuba ku samah nah kanumpi. Uya amnih wiwhun ariw inin maraki ku samah nah hahwa. Uya sarayh inin maraki givititkis neras mbayavye gihiyekemnikis. Uya tinwohawsevgikis arit miyaravye giwetrikis.

¹⁸ Uya keh neras wasaymavye misakwa tinwobet, neras kawantiyavye payak gikakkis karatunavye, ku pariye awna akak madikte gamiyhankis giminkis hiyeg kibeynevwi!

¹⁹ Gidahankisme neras kibeynevwi ku pariye ihpenevwi piwn, pis bayehe ka aynsima pamnihra gidahankis. Madikte igkis hiyavenek ku samah pis akkin gitkis. Mmanawa pis kavigsa neras ku pariye kamaxwenevwi pivitit.

²⁰ Pis mpithigkis ariw gahegbetawnikis neras mbayavye gihiyekemnikis. Hawata ku samah pis ay kennesa gihumwakis pis humaw kewa pahayku ayemweketbe ku kiney yuma ariknawnama hiya gisamanakkis atere.

²¹ Kibeyne gidahan Kiyavwiye Uhokri! Mmanawa ku aysaw nuvetunyavu kiyaraniwhpen igkis ivukwe nuvitit, igme hiyapkise gamnihra nutuh akiw.

²² Nahme avisasew, nah nuvewkanukama ig ka hiyakkam nukakuh akiw. Bawa igme timep namnihswan git.

²³ Bateknabay gikak Kiyavwiye Uhokri, madikte yis ku pariye kamaxwenevwi inyewa givitit! Mmanawa ig avuriwyi akak madikte gamnihra. Igkisme neras kawantiyavye ku pariye kane timepkere gak ig hiyapkisnek gitkis ku samah gimawkankis.

²⁴ Nikwe iwinabay yawaygi payak akak yiboka, madikte yis ku pariye kamaxwenevwi givitit Kiyavwiye Uhokri!